*_ലോകത്തിലെ ചെറിയ രാജ്യങ്ങള്‍_* 🏮ഭൂമിയില്‍ ആകെ വലുതും ചെറുതുമായ 195 രാജ്യങ്ങളുണ്ടെന്നാണ് കണക്ക്. ലോകത്തിലെ ഏറ്റവും ചെറിയ 10 രാജ്യങ്ങള്‍ ഒന്നിച്ചുചേര്‍ന്നാല്‍, ഇന്ത്യയിലെ ഏറ്റവും ചെറിയ സംസ്ഥാനമായ ഗോവയെക്കാള്‍ ചെറുതായിരിക്കുമെന്നു കേട്ടിട്ട് അദ്ഭുതം തോന്നുന്നുണ്ടോ? അത്തരം ചില കുഞ്ഞന്‍ രാജ്യങ്ങളെക്കുറിച്ചു പറയാം. 🌟 *മാള്‍ട്ട* 🏮മെഡിറ്ററേനിയന്‍ കടലില്‍ സിസിലിയുടെയും നോര്‍ത്ത് ആഫ്രിക്കയുടെയും മധ്യത്തിലുള്ള, യൂറോപ്പിലെ ഒരു ദ്വീപ് രാജ്യമാണ് മാള്‍ട്ട. 7000 വര്‍ഷത്തെ പഴക്കമുള്ള ഈ രാജ്യത്ത് കൂറ്റന്‍ ക്ഷേത്രങ്ങള്‍, റോമന്‍ കെട്ടിടങ്ങള്‍, നോര്‍മന്‍ പള്ളികള്‍ എന്നിവയൊക്കെ കാണാം. തലസ്ഥാനമായ വലേറ്റ 2018-ല്‍ യൂറോപ്പിലെ സാംസ്‌കാരിക തലസ്ഥാനമായി തിരഞ്ഞെടുക്കപ്പെട്ടു. റിപ്പബ്ലിക് ഓഫ് മാള്‍ട്ടയില്‍ കോമിനോ, ഗോസോ, മാള്‍ട്ട എന്നിമൂന്ന് ദ്വീപുകളുണ്ട്. സൂര്യപ്രകാശമേറിയ കാലാവസ്ഥ, ആകര്‍ഷകമായ ബീച്ചുകള്‍ എന്നിങ്ങനെ നീളുന്നു മാള്‍ട്ടയിലെ ആകര്‍ഷണങ്ങള്‍. 🌟 *സെന്‍റ് കിറ്റ്സും നെവിസും* 🏮ഫെഡറേഷന്‍ ഓഫ് സെയ്ന്റ് ക്രിസ്റ്റഫര്‍ ആന്‍ഡ് നെവിസ് എന്നാണ് ഔദോഗികമായി ഈ രാജ്യം അറിയപ്പെടുന്നത്. വെസ്റ്റ് ഇന്‍ഡീസ് ദ്വീപ് സമൂഹത്തില്‍ സ്ഥിതി ചെയ്യുന്ന ഒരു ദ്വീപ് രാഷ്ട്രമാണിത്. യൂറോപ്യന്മാര്‍ കൈവശപ്പെടുത്തിയ ആദ്യത്തെ ദ്വീപുകളിലൊന്നായ രാജ്യത്തെ സമ്ബദ്‌വ്യവസ്ഥ പ്രധാനമായും ടൂറിസത്തെയും ചെറുകിട ഉല്‍‌പാദന വ്യവസായത്തെയും കൃഷിയെയും ആശ്രയിച്ചിരിക്കുന്നു. അതിമനോഹരമായ സമുദ്രജീവിതം കാരണം, സെന്റ് കിറ്റ്സും നെവിസും മുങ്ങല്‍ വിദഗ്ധരുടെ പ്രിയസ്ഥലമാണ്. ഈ ദ്വീപിന്റെ ഉള്‍നാടന്‍ യാത്രയിലൂടെ, നിര്‍ജീവമായ അഗ്നിപര്‍വതം മൗണ്ട് ലിയാമുഗയും ഗര്‍ത്തതടാകവുമെല്ലാം കാണാം. 🌟 *മാര്‍ഷല്‍ ഐലന്‍ഡ്* 🏮മധ്യ പസഫിക് സമുദ്രത്തിലെ അഗ്നിപര്‍വത ദ്വീപുകളുടെയും പവിഴപ്പുറ്റുകളുടേയും ഒരു ശൃംഖലയായി, ഫിലിപ്പീന്‍സിനും ഹവായിക്കും ഇടയില്‍ സ്ഥിതി ചെയ്യുന്ന കുഞ്ഞു രാജ്യമാണ് മാര്‍ഷല്‍ ഐലന്‍ഡ്.അവിശ്വസനീയമാംവിധം ജൈവവൈവിധ്യമുള്ള പ്രദേശമാണ് റിപ്പബ്ലിക് ഓഫ് മാര്‍ഷല്‍ ദ്വീപുകള്‍, 800 ലധികം മത്സ്യങ്ങളും 160 പവിഴങ്ങളും ഇവിടുത്തെ അപൂര്‍വതകളാണ്. 2019 ലെ ഏറ്റവും പുതിയ കണക്ക പ്രകാരം 60,000 ല്‍ താഴെയാണ് ഇവിടുത്തെ ജനസംഖ്യ. 🌟 *ലിക്റ്റന്‍സ്റ്റൈന്‍* 🏮പൂര്‍ണമായും കരയാല്‍ ചുറ്റപ്പെട്ട ഈ ആല്‍പൈന്‍ രാജ്യം പടിഞ്ഞാറ് സ്വിറ്റ്സര്‍ലന്‍ഡുമായും കിഴക്ക് ഓസ്ട്രിയയുമായും അതിര്‍ത്തി പങ്കിടുന്നു. പടിഞ്ഞാറന്‍ യൂറോപ്പിലെ നാലാമത്തെ ചെറിയ രാജ്യമാണ് ലിക്റ്റന്‍സ്റ്റൈന്‍. യൂറോപ്പിലെ ഒരു പ്രധാന വിനോദ സഞ്ചാര മേഖല കൂടിയാണിത്. ശ്രദ്ധേയമായ മധ്യകാല കോട്ടകള്‍, ആകര്‍ഷകമായ ഗ്രാമങ്ങള്‍, ആല്‍പൈന്‍ ലാന്‍ഡ്സ്കേപ്പുകള്‍ എന്നിവയിലൂടെയാണ് ലിക്റ്റന്‍‌സ്റ്റൈന്‍ പ്രധാനമായും അറിയപ്പെടുന്നത്. മാള്‍ട്ടയില്‍നിന്ന തികച്ചും വിഭിന്നമായി, ജനസാന്ദ്രത കുറഞ്ഞ രാജ്യങ്ങളിലൊന്നാണിത്. വളരെ ഉയര്‍ന്ന ജിഡിപിയാണ് രാജ്യത്തിന്റേത്. 🌟 *നൗറു* 🏮ഏറ്റവും ചെറിയരാജ്യങ്ങളുടെ പട്ടികയില്‍ മൂന്നാം സ്ഥാനമുള്ള രാജ്യമാണ് നൗറു. പസിഫിക്കിന്റെ മധ്യഭാഗത്താണ് നൗറു. ഔദ്യോഗികമായി ഒരു തലസ്‌ഥാനമോ പൊതുഗതാഗത സൗകര്യങ്ങളോ ഈ നാട്ടിലില്ല. ആകെ 25 കിലോമീറ്ററിനുള്ളില്‍ ഒതുങ്ങുന്ന റോഡുകളാണ് രാജ്യത്ത് ഉള്ളത്. സ്വകാര്യ വാഹനങ്ങള്‍ മാത്രമേ നിരത്തില്‍ കാണൂ. പതിമൂവായിരം ജനങ്ങള്‍ താമസിക്കുന്ന ഈ ചെറുരാജ്യത്തിന്റെ വിസ്തീര്‍ണ്ണം 21 ചതുരശ്ര കിലോമീറ്റര്‍ മാത്രമാണ്. 🏮കഴിഞ്ഞ കാലങ്ങളില്‍, ഫോസ്ഫേറ്റ് ഖനനം വലിയ തോതില്‍ ഇവിടെ നടന്നിരുന്നു. എന്നാല്‍ ഇന്ന് ഫോസ്ഫേറ്റ് നിക്ഷേപം കുറഞ്ഞു വരുന്ന സാഹചര്യത്തില്‍ നൗറുവിലെ തൊഴിലില്ലായ്മ 90% ആയി വര്‍ധിച്ചിരിക്കുകയാണ്. വിനോദസഞ്ചാരികളെ സംബന്ധിച്ചിടത്തോളം ശാന്തമായ ഒരിടമാണെങ്കിലും ഈ ചെറിയ ദ്വീപിനെക്കുറിച്ചുള്ള മറ്റൊരു അദ്ഭുതകരമായ വസ്തുത അമിതവണ്ണനിരക്കാണ്, 97% പുരുഷന്മാരും 93% സ്ത്രീകളും അമിതവണ്ണമുള്ളവരാണ്. ഇതു കാരണം, ലോകത്തിലെ ഏറ്റവും പൊണ്ണത്തടിയുള്ള ആളുകളുള്ള രാജ്യമായി നൗറു മുദ്രകുത്തപ്പെട്ടിരിക്കുന്നു. 🌟 *മൊണാക്കോ* 🏮ബെല്ലെ-എപോക്ക് കാസിനോ, ആഡംബര ബുട്ടിക്കുകള്‍, യാച്ച്‌-ലൈന്‍ഡ് ഹാര്‍ബര്‍ എന്നിവയൊക്കെയാണ് പടിഞ്ഞാറന്‍ യൂറോപ്പിലെ ഒരു ചെറിയ രാജ്യമായ മൊണാക്കോയിലെ ആകര്‍ഷണങ്ങള്‍. ഏറ്റവും കുറഞ്ഞ ദാരിദ്ര്യ നിരക്കുള്ള രാജ്യമാണ് മൊണാക്കോ. ജനസംഖ്യയുടെ സിംഹഭാഗവും കോടീശ്വരന്മാരാണ്. പൂര്‍വ ദിക്കില്‍ മെഡിറ്ററേനിയന്‍ കടല്‍ മൊണാക്കോയുടെ തീരങ്ങളോട് ചേരുന്നു. 2 കിലോമീറ്റര്‍ വിസ്തൃതിയും 40,000 ത്തോളം ജനസംഖ്യയും കണക്കിലെടുത്ത് മൊണാക്കോ ഏറ്റവും തിരക്കേറിയ രാജ്യങ്ങളിലൊന്നായി മാള്‍ട്ടയുമായി കൈകോര്‍ക്കുന്നു. 🌟 *വത്തിക്കാന്‍ സിറ്റി* 🏮റോമന്‍ കത്തോലിക്കാ സഭയുടെ ആസ്ഥാനമായ വത്തിക്കാന്‍ നഗരം വലുപ്പത്തിലും ജനസംഖ്യയിലും ലോകത്തെ ഏറ്റവും ചെറിയ രാജ്യമാണ്. ഇറ്റലിയുടെ ഉള്ളില്‍ സ്ഥിതി ചെയ്യുന്ന ഒരു പരമാധികാരരാഷ്ട്രമാണ് വത്തിക്കാന്‍. സെന്റ് പീറ്റേഴ്സ് ബസലിക്ക, സിസ്റ്റീന്‍ ചാപ്പല്‍, വത്തിക്കാന്‍ മ്യൂസിയം തുടങ്ങിയ ചരിത്ര പ്രസിദ്ധമായ നിരവധി സ്ഥലങ്ങള്‍ ഇവിടെയുണ്ട്. 110 ഏക്കര്‍ വിസ്തൃതിയുള്ള ഈ രാജ്യത്തിന്റെ ജനസംഖ്യ 1000 ല്‍ താഴെ മാത്രമാണ്. ജനസംഖ്യയിലും വിസ്തൃതിയിലും ഏറ്റവും ചെറിയ രാജ്യമെന്നറിയപ്പെടുന്നത് വത്തിക്കാന്‍ സിറ്റിയാണ്. 300 മീറ്റര്‍ മാത്രം നീളമുള്ള ഏറ്റവും ചെറിയ റെയില്‍വേ ശൃംഖല ഈ രാജ്യത്തിന് സ്വന്തമായുണ്ട്. പണമിടപാട് ലാറ്റിനില്‍ ചെയ്യാന്‍ സൗകര്യമുള്ള ലോകത്തെ ഏക എടിഎമ്മും ഇവിടെയാണ്.