ശ്രീസരസ്വതീ സൂക്തം 
ഋഗ്വേദം ഷഷ്ഠം മണ്ഡലം 61 സൂക്തം ।
ഇയമദദാദ്രഭസമൃണച്യുതം ദിവോദാസം വധ്ര്യശ്വായം ദാശുഷേ ।
യാ ശശ്വന്തമാചഖശദാവസം പണിം താ തേ ദാത്രാണി തവിഷാ സരസ്വതീ ॥ 1॥

ഇയം ശുഷ്മേഭിര്‍ബിസഖാ ഇവാരുജത്സാനും ഗിരീണാം തവിഷേഭിരൂര്‍മിഭിഃ ।
പാരാവതഘ്നീമവസേ സുവൃക്തിഭിഃ സരസ്വതീ മാ വിവാസേമ ധീതിഭിഃ ॥ 2॥

സരസ്വതി ദേവനിദോ നി ബര്‍ഹയ പ്രജാം വിശ്വസ്യ ബൃസയസ്യ മായിനഃ ।
ഉത ക്ഷിതിഭ്യോഽവനീരവിന്ദോ വിഷമേഭ്യോ അസ്രവോ വാജിനീവതി ॥ 3॥

പ്രണോ ദേവീ സരസ്വതീ വാജേഭിര്‍വാജിനീവതീ । ധീനാമവിത്ര്യവതു ॥ 4।
യസ്ത്വാ ദേവി സരസ്വത്യുപബ്രൂതേ ധനേ ഹിതേ । ഇന്ദ്രം ന വൃത്രതൂര്യേ ॥ 5॥

ത്വം ദേവി സരസ്വത്യവാ വാജേഷു വാജിനി । രദാ പൂഷേവ നഃ സനിം ॥ 6॥

ഉത സ്യാ നഃ സരസ്വതീ ഘോരാ ഹിരണ്യവര്‍തനിഃ । വൃത്രഘ്നീ വഷ്ടി സുഷ്ടുതിം ॥ 7॥

യസ്യാ അനന്തോ അഹ്രുതസ്ത്വേഷശ്ചരിഷ്ണുരര്‍ണവഃ । അമശ്ചരതി രോരുവത് ॥ 8॥

സാ നോ വിശ്വാ അതി ദ്വിഷഃ സ്വസൄരന്യാ ഋതാവരീ । അതന്നഹേവ സൂര്യഃ ॥ 9॥

ഉത നഃ പ്രിയാ പ്രിയാസു സപ്തസ്വസാ സുജുഷ്ടാ । സരസ്വതീ സ്തോംയാ ഭൂത് ॥ 10॥

ആപപ്രുഷീ പാര്‍ഥിവാന്യുരു രജോ അന്തരിക്ഷം । സരസ്വതീ നിദസ്പാതു ॥ 11॥

ത്രിഷധസ്ഥാ സപ്തധാതുഃ പഞ്ചം ജാതാ വര്‍ധയന്തീ । വാജേവാജേ ഹവ്യാഭൂത് ॥ 12॥

പ്ര യാ മഹിംനാ മഹിനാസു ചേകിതേ ദ്യുംനേഭിരന്യാ അപസാമപസ്തമാ ।
രഥ ഇവ ബൃഹതീ വിഭ്വനേ കൃതോപസ്തുത്യാ ചികിതുഷാ സരസ്വതീ ॥ 13॥

സരസ്വത്യഭി നോ നേഷി വസ്യോ മാപ സ്ഫരീഃ പയസാ മാ ന ആ ധക് ।
ജുഷസ്വ നഃ സഖ്യാ വേശ്യാ ച മാ ത്വത് ക്ഷേത്രാണ്യരേണാനി ഗന്‍മ ॥ 14॥

പ്ര ക്ഷോസാ ധായസാ സസ്ര ഏഷാ സരസ്വതീ ധരുണമായ⁠സീ പൂഃ ।
പ്രബാബധാനാ രഥ്യേവ യാതി വിശ്വാ അപോ മഹിനാ സിന്ധുരന്യാഃ ॥ 15॥

ഏകാചേതത് സരസ്വതീ നദീനാം ശുചിര്യതീ ഗിരിഭ്യ ആ സമുദ്രാത് ।
രായശ്ചേതന്തീ ഭുവനസ്യ ഭൂരേര്‍ഘൃതം പയോ ദുദുഹേ നാഹുഷായ ॥ 16॥

സ വാവൃധേ നര്യോ യോഷണാസു വൃഷാ ശിശുര്‍വൃഷഭോ യജ്ഞിയാസു ।
സ വാജിനം മഘവദ്ഭ്യോ ദധാതി വി സാതയേ തന്വം മാമൃജീത ॥ 17॥

ഉത സ്യാ നഃ സരസ്വതീ ജുഷാണോപ ശ്രവത് സുഭഗാ യജ്ഞേ അസ്മിന്‍ ।
മിതജ്ഞുഭിര്‍നമസ്യൈരിയാനാ രായാ യുജാ ചിദുത്തരാ സഖിഭ്യഃ ॥ 18॥

ഇമാ ജുഹ്വാനാ യുപ്മദാ നമോഭിഃ പ്രതി സ്തോമം സരസ്വതി ജുഷസ്വ ।
തവ ശര്‍മന്‍ പ്രിയതമേ ദധാനാ ഉപ സ്ഥേയാമ ശരണം ന വൃക്ഷം ॥ 19॥

അപമു തേ സരസ്വതി വസിഷ്ഠോ ദ്വാരാവൃതസ്യ സുഭഗേ വ്യാവഃ ।
വര്‍ധ ശുഭ്രേ സ്തുവതേ രാസി വാജാന്‍ യൂയം പാത സ്വസ്തിഭിഃ സദാ നഃ ॥ 20॥

ബൃഹദു ഗായിഷേ വചോഽസുര്യാ നദീനാം ।
സരസ്വതീമിന്‍മഹയാ സുവൃക്തിഭിഃ സ്തോമൈര്‍വസിഷ്ഠ രോദസീ ॥ 21॥

ഉഭേ യത്തേ മഹിനാ ശുഭ്രേ അന്ധസീ അധിക്ഷിയന്തി പൂരവഃ ।
സാ നോ ബോധ്യവിത്രീ മരുത്സഖാ ചോദ രാധോ മഘോനാം ॥ 22॥

ഭദ്രമിദ് ഭദ്രാ കൃണവത് സരസ്വത്യകവാരീ ചേതതി വാജിനീവതീ ।
ഗൃണാനാ ജമദഗ്നിവത് സ്തുവാനാ ച വസിഷ്ഠവത് ॥ 23॥

ജനീയന്തോ ന്വഗ്രവഃ പുത്രീയന്തഃ സുദാനവഃ । സരസ്വന്തം ഹവാമഹേ ॥ 24॥

യേ തേ സരസ്വ ഊര്‍മയോ മധുമന്തോ ഘൃതശ്ചുതഃ । തേഭിര്‍നോഽവിതാ ഭവ ॥ 25॥

പീപിവാംസം സരസ്വതഃ സ്തനം യോ വിശ്വദര്‍ശതഃ ।
ഭക്ഷീമഹി പ്രജാമിഷം ॥ 26॥

അംബിതമേ നദീതമേ ദേവിതമേ സരസ്വതി ।
അപ്രശസ്താ ഇവ സ്മസി പ്രശസ്തിമംബ നസ്കൃധി ॥ 27॥

ത്വേ വിശ്വാ സരസ്വതി ചിതായൂംഷി ദേവ്യാം ।
ശുനഹോത്രേഷു മത്സ്വ പ്രജാം ദേവി ദിദിഡ്ഢി നഃ ॥ 28॥

ഇമാ ബ്രഹ്മ സരസ്വതി ജുഷസ്വ വാജിനീവതി ।
യാ തേ മന്‍മ ഗൃത്സമദാ ഋതാവരി പ്രിയാ ദേവേഷു ജുഹ്വതി ॥ 29॥

പാവകാ നഃ സരസ്വതീ ബാജേഭിര്‍വാജിനീവതീ । യജ്ഞ വഷ്ടു ധിയാവസൂഃ ॥ 30॥

ചോദായിത്രീ സൂനൃതാനാം ചേതന്തീ സുമതീനാം ।  യജ്ഞം ദധേ സരസ്വതീ ॥ 31॥

മഹോ അര്‍ണഃ സരസ്വതീ പ്ര ചേതയതി കേതുനാ । ധിയോ വിശ്വാ വി രീജതി ॥ 32॥

സരസ്വതീം ദൈവ്യന്തോ ഹവന്തേ സരസ്വതീമധ്വരേ തായമാനേ ।
സരസ്വതീം സുകൃതോ അഹ്വയന്ത സരസ്വതീ ദാശുഷേ വാര്യം ദാത് ॥ 33॥

സരസ്വതി യാ സരഥം യയാഥ സ്വധാഭിര്‍ദേവി പിതൃഭിര്‍മദന്തീ ।
ആസദ്യാസ്മിന്‍ ബര്‍ഹിഷി മാദയസ്വാനമീവാ ഇഷ ആ ധേഹ്യസ്മേ ॥ 34॥

സരസ്വതീം യാം പിതരോ ഹവന്തേ ദക്ഷിണാ യജ്ഞമഭിനക്ഷമാണാഃ ।
സഹസ്രാര്‍ഘമിളോ അത്ര ഭാഗം രായസ്പോഷം യജമാനേഷു ധേഹി ॥ 35॥

ആ നോ ദിവോ ബൃഹതഃ പര്‍വതാദാ സരസ്വതീ യജതാ ഗന്തു യജ്ഞം ।
ഹവം ദേവീ ജുജുഷാണാ ഘൃതാചീ ശഗ്മാം നോ വാചമുശതീ ശ‍ൃണോതു ॥ 36॥

രാകാമഹം സുഹവീം സുഷ്ടുതീ ഹുവേ ശ‍ൃണോതു നഃ സുഭഗാ ബോധതു ത്മനാ ।
സീവ്യത്വപഃ സൂച്യാച്ഛിദ്യമാനയാ ദദാതു വീരം ശതദായയമുക്ഥ്യം ॥ 37॥

യാസ്തേ രാകേ സുമതയഃ സുപേശസോ യാഭിര്‍ദദാസി ദാശുഷേ വസൂനി ।
താഭിര്‍നോ അദ്യ സുമനാ ഉപാഗഹി സഹസ്രപോഷം സുഭഗേ രരാണാ ॥ 38॥

സിനീവാലി പൃഥുഷ്ടുകേ യാ ദേവാനാമസി സ്വസാ ।
ജുഷസ്വ ഹവ്യമാഹുതം പ്രജാം ദേവി ദിദിഡ്ഢി നഃ ॥ 39॥

യാ സുബാഹുഃ സ്വങ്ഗുരിഃ സുഷൂമാ ബഹുസൂവരീ ।
തസ്യൈ വിശ്പന്ത്യൈ ഹവിഃ സിനീവാല്യൈ ജുഹോതന ॥ 40॥

യാ ഗുങ്ഗൂര്യാ സിനീവാലീ യാ രാകാ യാ സരസ്വതീ ।
ഇന്ദ്രാണീമഹ്വ ഊതയേ വരുണാനീം സ്വസ്തയേ ॥ 41॥

ഓം ശാന്തിഃ ശാന്തിഃ ശാന്തിഃ ॥


Encoded and proofread by PSA Easwaran