_July 3rd വെള്ളി_ *(വായിക്കേണ്ടുന്ന ഭാഷ്യ ഭാഗം👇)* കസ്മാത് പുനഃ കാരണാത് കർമസന്ന്യാസമാത്രാദ് ഏവ ജ്ഞാനരഹിതാത് സിദ്ധിം നൈഷ്‌കർമ്യലക്ഷണാം പുരുഷഃ ന അധിഗച്ഛതി ഇതി ഹേത്വാകാംക്ഷായാം ആഹ - *ന ഹി കശ്ചിത്ക്ഷണമപി ജാതു തിഷ്ഠത്യകർമകൃത്* *കാര്യതേ ഹ്യവശഃ കർമ സർവഃ പ്രകൃതിജൈർഗുണൈഃ* 5 ന ഹി യസ്മാത് ക്ഷണം അപി കാലം ജാതു കദാചിത് കശ്ചിത് തിഷ്ഠതി അകർമകൃത് സൻ. കസ്മാത് കാര്യതേ ഹി യസ്മാദ് അവശഃ ഏവ കർമ സർവഃ പ്രാണീഃ പ്രകൃതിജൈഃ പ്രകൃതിതോജാതൈഃ സത്ത്വരജസ്തമോഭിഃ ഗുണൈഃ. അജ്ഞഃ ഇതി വാക്യശേഷഃ യതോ വക്ഷ്യതി - 'ഗുണൈർയോ ന വിചാല്യതേ' ഇതി സാംഖ്യാനാം പൃഥക്കരണാദ് അജ്ഞാനാം ഏവ ഹി കർമയോഗഃ ന ജ്ഞാനിനാം. ജ്ഞാനിനാം തു ഗുണൈഃ അചാല്യമാനാനാം സ്വതഃ ചലനാഭാവാത് കർമയോഗഃ ന ഉപപദ്യതേ. തഥാ ച വ്യാഖ്യാതം വേദാവിനാശിനം ഇതി അത്ര. 5 യഃ തു അനാത്മജ്ഞഃ ചോദിതം കർമ ന ആരഭതേ ഇതി തദ് അസദ് ഏവ ഇതി ആഹ - *കർമേന്ദ്രിയാണി സംയമ്യ യ ആസ്തേ മനസാ സ്മരൻ* *ഇന്ദ്രിയാർഥാന്വിമൂഢാത്മാ മിഥ്യാചാരഃ സ ഉച്യതേ* 6 കർമേന്ദ്രിയാണി ഹസ്താദീനി സംയമ്യ സംഹൃത്യ യഃ ആസ്തേ തിഷ്ഠതി മനസാ സ്മരൻ ചിന്തയൻ ഇന്ദ്രിയാർത്ഥാൻ വിഷയാൻ വിമൂഢാത്മാ വിമൂഢാന്തഃകരണഃ മിഥ്യാചാരഃ മൃഷാചാരഃ പാപാചാരഃ സഃ ഉച്യതേ . 6 *യസ്ത്വിന്ദ്രിയാണി മനസാ നിയമ്യാരഭതേഽർജുന* *കർമേന്ദ്രിയൈഃ കർമയോഗമസക്തഃ സ വിശിഷ്യതേ* 7 യഃ തു പുനഃ കർമണി അധികൃതഃ അജ്ഞഃ ബുദ്ധീന്ദ്രിയാണി മനസാ നിയമ്യ ആരഭതേ അർജുന കർമേന്ദ്രിയൈഃ വാക്പാണ്യാദിഭിഃ. കിം ആരഭതേ ഇതി ആഹ. കർമയോഗം അസക്തഃ സൻ സ വിശിഷ്യതേ ഇതരസ്മാദ് മിഥ്യാചാരാദ് . 7 യതഃ ഏവം അതഃ - *നിയതം കുരു കർമ ത്വം കർമ ജ്യായോ ഹ്യകർമണഃ* *ശരീരയാത്രാപി ച തേ ന പ്രസിദ്ധ്യേദകർമണഃ* 8 നിയതം നിത്യം യഃ യസ്മിൻ കർമണി അധികൃതഃ ഫലായ ച അശ്രുതം തത് നിയതം കർമ തത് കുരു ത്വം ഹേ അർജുന. യതഃ കർമഃ ജ്യായഃ അധികതരം ഫലതഃ ഹി യസ്മാത് അകർമണഃ അകരണാദ് അനാരംഭാത്. കഥം ശരീരയാത്രാ ശരീരസ്ഥിതിഃ അപി ച തേ തവ ന പ്രസിദ്ധ്യേത് പ്രസിദ്ധിം ന ഗച്ഛേദ് അകർമണഃ അകരണാദ്. അതഃ ദൃഷ്ടഃ കർമാകർമണോഃ വിശേഷഃ ലോകേ . 8 യത് ച മന്യസേ ബന്ധാർത്ഥത്വാത് കർമ ന കർതവ്യം ഇതി തദ് അപി അസത്, കഥം - *യജ്ഞാർത്ഥാത് കർമണോഽന്യത്ര ലോകോഽയം കർമബന്ധനഃ* *തദർത്ഥം കർമ കൗന്തേയ മുക്തസങ്ഗഃ സമാചര* 9 'യജ്ഞോ വൈ വിഷ്ണുഃ' ( തൈ. സം. 1. 7. 4 ) ഇതി ശ്രുതേഃ യജ്ഞഃ ഈശ്വരഃ തദർത്ഥം യത് ക്രിയതേ തദ് യജ്ഞാർത്ഥം കർമ തസ്മാത് 'കർമണഃ അന്യത്ര' അന്യേന കർമണാ ലോകഃ അയം അധികൃതഃ കർമകൃത് കർമബന്ധനഃ കർമബന്ധനം യസ്യ സഃ അയം കർമബന്ധനഃ ലോകഃ ന തു യജ്ഞാർത്ഥാത് അതഃ തദർത്ഥം, യജ്ഞാർത്ഥം കർമ കൗന്തേയ മുക്തസംഗഃ കർമഫലസംഗവർജ്ജിതഃ സൻ സമാചര നിർവർതയ. 9 ഇതഃ ച അധികൃതേന കർമ കർതവ്യം - *സഹയജ്ഞാഃ പ്രജാഃ സൃഷ്ട്വാ പുരോവാച പ്രജാപതിഃ* *അനേന പ്രസവിഷ്യധ്വമേഷ വോഽസ്ത്വിഷ്ടകാമധുക്* 10 സഹയജ്ഞാ യജ്ഞസഹിതാഃ പ്രജാഃ ത്രയഃ വർണാഃ താഃ സൃഷ്ട്വാ ഉത്പാദ്യ, പുരാ സർഗാദൗ ഉവാച ഉക്തവാൻ പ്രജാപതിഃ പ്രജാനാം സ്രഷ്ടാ, അനേന യജ്ഞേന പ്രസവിഷ്യദ്ധ്വം പ്രസവോ വൃദ്ധിഃ ഉത്പത്തിഃ താം കുരുദ്ധ്വം ഏഷഃ യജ്ഞഃ വഃ യുഷ്മാകം അസ്തു ഭവതു ഇഷ്ടകാമധുക് ഇഷ്ടാൻ അഭിപ്രേതാൻ കാമാൻ ഫലവിശേഷാൻ ദോഗ്ധി ഇതി ഇഷ്ട കാമധുക് . 10 കഥം - *ദേവാൻഭാവയതാനേന തേ ദേവാ ഭാവയന്തു വഃ* *പരസ്പരം ഭാവയന്തഃ ശ്രേയഃ പരമവാപ്സ്യഥ* 11 ദേവാൻ ഇന്ദ്രാദീൻ ഭാവയത വർദ്ധയത അനേന യജ്ഞേന തേ ദേവാഃ ഭാവയന്തു ആപ്യായയന്തു വൃഷ്ട്യാദിനാ വഃ യുഷ്മാൻ ഏവം പരസ്പരം അന്യോന്യം ഭാവയന്തഃ ശ്രേയഃ പരം മോക്ഷലക്ഷണം ജ്ഞാനപ്രാപ്തിക്രമേണ അവാപ്സ്യഥ സ്വർഗം വാ പരം ശ്രേയഃ അവാപ്സ്യഥ. 11 കിം ച - *ഇഷ്ടാൻഭോഗാൻഹി വോ ദേവാഃ ദാസ്യന്തേ യജ്ഞഭാവിതാഃ* *തൈർദത്താനപ്രദായൈഭ്യോ യോ ഭുങ്ക്തേ സ്തേന ഏവ സഃ* 12 ഇഷ്ടാൻ അഭിപ്രേതാൻ ഭോഗാൻ ഹി വഃ യുഷ്മഭ്യം ദേവാഃ ദാസ്യന്തേ വിതരിഷ്യന്തി സ്ത്രീപശുപുത്രാദീൻ യജ്ഞഭാവിതാഃ യജ്ഞൈഃ വർധിതാഃ തോഷിതാഃ ഇത്യർത്ഥഃ . തൈഃ ദേവൈഃ ദത്താൻ ഭോഗാൻ അപ്രദായ അദത്ത്വാ ആനൃണ്യം അകൃത്വാ ഇത്യർത്ഥഃ ഏഭ്യഃ ദേവേഭ്യഃ , യോ ഭുങ്‌ക്തേ സ്വദേഹേന്ദ്രിയാണി ഏവ തർപയതി, സ്തേന ഏവ തസ്കരഃ ഏവ സഃ ദേവാദി സ്വാപഹാരീ . 12 യേ പുനഃ - *യജ്ഞശിഷ്ടാശിനഃ സന്തഃ മുച്യന്തേ സർവകിൽബിഷൈഃ* *ഭുഞ്ജതേ തേ ത്വഘം പാപാഃ യേ പചന്ത്യാത്മകാരണാത്* 13 ദേവയജ്ഞാദീൻ നിർവർത്യ തച്ഛിഷ്ടം അശനം അമൃതാഖ്യം അശിതും ശീലം യേഷാം തേ യജ്ഞശിഷ്ടാശിനഃ സന്തഃ , മുച്യന്തേ സർവകില്ബിഷൈഃ സർവപാപൈഃ ചുല്യാദിപഞ്ചസൂനാകൃതൈഃ പ്രമാദകൃതഹിംസാദിജനിതൈഃ ച അന്യൈഃ . യേ തു ആത്മംഭരയഃ ഭുഞ്ജതേ തേ തു അഘം പാപം സ്വയം അപി പാപാഃ യേ പചന്തി പാകം നിർവർതയന്തി ആത്മകാരണാത് ആത്മഹേതോഃ. 13 ഇതഃ ച അധികൃതേന കർമ കർതവ്യം. ജഗച്ചക്രപ്രവൃത്തിഹേതുഃ ഹി കർമ. കഥം ഇതി ഉച്യതേ - *അന്നാദ്ഭവന്തി ഭൂതാനി പർജന്യാദന്നസംഭവഃ* *യജ്ഞാദ്ഭവതി പർജന്യഃ യജ്ഞഃ കർമസമുദ്ഭവഃ* 14 അന്നാദ് ഭുക്താദ് ലോഹിതരേതഃപരിണതാത് പ്രത്യക്ഷം ഭവന്തി ജായന്തേ ഭൂതാനി, പർജന്യാദ് വൃഷ്ടേഃ അന്നസ്യ സംഭവഃ അന്ന സംഭവഃ , യജ്ഞാദ് ഭവതി പർജന്യഃ - 'അഗ്നൗ പ്രാസ്താഹുതിഃ സമ്യഗാദിത്യമുപതിഷ്ഠതേ, ആദിത്യാജ്ജായതേ വൃഷ്ടിർവൃഷ്ടേരന്നം തതഃ പ്രജാഃ ( മ. സ്മൃ. 3. 76 ) ഇതി സ്മൃതേഃ . യജ്ഞഃ അപൂർവം സ ച യജ്ഞഃ കർമസമുദ്ഭവഃ ഋത്വിഗ്യജമാനയോഃ ച വ്യാപാരഃ കർമ തതഃ സമുദ്ഭവഃ യസ്യ യജ്ഞസ്യ അപൂർവസ്യ സ യജ്ഞഃ കർമസമുദ്ഭവഃ . 14 തത് ച - *കർമ ബ്രഹ്മോദ്ഭവം വിദ്ധി ബ്രഹ്മാക്ഷരസമുദ്ഭവം* *തസ്മാത്സർവഗതം ബ്രഹ്മ നിത്യം യജ്ഞേ പ്രതിഷ്ഠിതം* 15 കർമ ബ്രഹ്മോദ്ഭവം ബ്രഹ്മ വേദഃ സ ഉദ്ഭവഃ കാരണം യസ്യ തത് കർമ ബ്രഹ്മോദ്ഭവം വിദ്ധി ജാനീഹി. ബ്രഹ്മ പുനഃ വേദാഖ്യം അക്ഷരസമുദ്ഭവം അക്ഷരം ബ്രഹ്മ പരമാത്മാ സമുദ്ഭവഃ യസ്യ തദ് അക്ഷരസമുദ്ഭവം ബ്രഹ്മ വേദ ഇത്യർത്ഥഃ . യസ്മാത് സാക്ഷാത് പരമാത്മാഖ്യാദ് അക്ഷരാത് പുരുഷനിഃശ്വാസവത് സമുദ്ഭൂതം ബ്രഹ്മ, തസ്മാത് സർവാർത്ഥപ്രകാശകത്വാത് സർവഗതം. സർവഗതം അപി സദ് നിത്യം സദാ യജ്ഞവിധിപ്രധാനത്വാദ് യജ്ഞേ പ്രതിഷ്ഠിതം. 15 *ഏവം പ്രവർതിതം ചക്രം നാനുവർതയതീഹ യഃ* *അഘായുരിന്ദ്രിയാരാമോ മോഘം പാർഥ സ ജീവതി* 16 ഏവം ഈശ്വരേണ വേദയജ്ഞപൂർവകം ജഗത് ചക്രം വർതിതം ന അനുവർതയതി ഇഹ ലോകേ യഃ കർമണി അധികൃതഃ സൻ അഘായുഃ അഘം പാപം ആയുഃ ജീവനം യസ്യ സഃ അഘായുഃ പാപജീവനഃ ഇതി യാവത്, ഇന്ദ്രിയാരാമഃ ഇന്ദ്രിയൈഃ ആരാമഃ ആരമണം ആക്രീഡാ വിഷയേഷു യസ്യ സഃ ഇന്ദ്രിയാരാമഃ, മോഘം വൃഥാ ഹേ പാർത്ഥ സ ജീവതി . തസ്മാദ് അജ്ഞേന അധികൃതേന കർതവ്യം ഏവ കർമ ഇതി പ്രകരണാർത്ഥഃ .