_January 8th വ്യാഴം_ *(വായിക്കേണ്ടുന്ന ഭാഷ്യ ഭാഗം👇)* യാ പുനഃ ഭഗവതഃ വിശ്വരൂപസ്യ ഭാഃ തസ്യാ ഉപമാ ഉച്യതേ - *ദിവി സൂര്യസഹസ്രസ്യ ഭവേദ്യുഗപദുത്ഥിതാ* *യദി ഭാഃ സദൃശീ സാ സ്യാദ്ഭാസസ്തസ്യ മഹാത്മനഃ* 12 ദിവി അന്തഃരിക്ഷേ തൃതീയസ്യാം വാ ദിവി സൂര്യാണാം സഹസ്രം സൂര്യസഹസ്രം തസ്യ യുഗപദുത്ഥിതസ്യ യാ യുഗപത് ഉത്ഥിതാ ഭാഃ സാ യദി സദൃശീ സ്യാത് തസ്യ മഹാത്മനഃ വിശ്വരൂപസ്യ ഏവ ഭാസഃ യദി വാ ന സ്യാത് തതഃ അപി വിശ്വരൂപസ്യ ഏവ ഭാഃ അതിരിച്യതേ ഇതി അഭിപ്രായഃ. 12 കിം ച - *തത്രൈകസ്ഥം ജഗത്കൃത്സ്നം പ്രവിഭക്തമനേകധാ* *അപശ്യദ്ദേവദേവസ്യ ശരീരേ പാ‍ണ്ഡവസ്തദാ* 13 തത്ര തസ്മിൻ വിശ്വരൂപേ ഏകസ്മിൻ സ്ഥിതം ഏകസ്ഥം ജഗത് കൃത്സ്നം പ്രവിഭക്തം അനേകധാ ദേവപിതൃമനുഷ്യാദിഭേദൈഃ അപശ്യദ് ദൃഷ്ടവാൻ ദേവദേവസ്യ ഹരേഃ ശരീരേ പാണ്ഡവഃ അർജുനഃ തദാ. 13 *തതഃ സ വിസ്മയാവിഷ്ടോ ഹൃഷ്ടരോമാ ധനഞ്ജയഃ* *പ്രണമ്യ ശിരസാ ദേവം കൃതാഞ്ജലിരഭാഷത* 14 തതഃ തം ദൃഷ്ട്വാ സ വിസ്മയേന ആവിഷ്ടഃ വിസ്മയാവിഷ്ടഃ ഹൃഷ്ടാനി രോമാണി യസ്യ സഃ അയം ഹൃഷ്ടരോമാഃ ച അഭവദ് ധനഞ്ജയഃ. പ്രണമ്യ പ്രകർഷേണ നമനം കൃത്വാ പ്രഹ്വീഭൂതഃ സൻ ശിരസാ ദേവം വിശ്വരൂപധരം കൃതാഞ്ജലിഃ നമസ്കാരാർത്ഥം സംപുടീകൃതഹസ്തഃ സൻ അഭാഷത ഉക്തവാൻ. 14 കഥം യത് ത്വയാ ദർശിതം വിശ്വരൂപം തദ് അഹം പശ്യാമി ഇതി സ്വാനുഭവം ആവിഷ്കുർവൻ - *അർജുന ഉവാച* - *പശ്യാമി ദേവാംസ്തവ ദേവ ദേഹേ* *സർവാംസ്തഥാ ഭൂതവിശേഷസങ്ഘാൻബ്രഹ്മാണമീശം കമലാസനസ്ഥമൃഷീംശ്ച സർവാനുരഗാംശ്ച ദിവ്യാൻ* 15 പശ്യാമി ഉപലഭേ ഹേ ദേവ തവ ദേഹേ ദേവാൻ സർവാൻ തഥാ ഭൂതവിശേഷസംഘാൻ ഭൂതവിശേഷാണാം സ്ഥാവരജംഗമാനാം നാനാസംസ്ഥാനവിശേഷാണാം സംഘാഃ ഭൂതവിശേഷസംഘാഃ താൻ. കിം ച ബ്രഹ്മാണം ചതുർമുഖം ഈശം ഈശിതാരം പ്രജാനാം കമലാസനസ്ഥം പൃഥിവീപദ്മമദ്ധ്യേ മേരുകർണികാസനസ്ഥം ഇത്യർത്ഥഃ. ഋഷീൻ ച വസിഷ്ഠാദീൻ, സർവാൻ ഉരഗാൻ ച വാസുകിപ്രഭൃതീൻ ദിവ്യാൻ ദിവി ഭവാൻ. 15 *അനേകബാഹൂദരവക്ത്രനേത്രം* *പശ്യാമി ത്വാ സർവതോനന്തരൂപം* *നാന്തം ന മദ്ധ്യം ന പുനസ്തവാദിം പശ്യാമി വിശ്വേശ്വര വിശ്വരൂപ* 16 അനേകബാഹൂദരവക്ത്രനേത്രം അനേകേ ബാഹവഃ ഉദരാണി വക്ത്രാണി നേത്രാണി ച യസ്യ തവ സ ത്വം അനേകബാഹൂദരവക്ത്രനേത്രഃ തം അനേകബാഹൂദരവക്ത്രനേത്രം പശ്യാമി ത്വാ ത്വാം സർവതഃ സർവത്ര അനന്തരൂപം അനന്താനി രൂപാണി അസ്യ ഇതി അനന്തരൂപഃ തം അനന്തരൂപം. ന അന്തം അന്തഃ അവസാനം ന മദ്ധ്യം മദ്ധ്യം നാമ ദ്വയോഃ കോട്യോഃ അന്തരം ന പുനഃ തവ ആദിം, തവ ദേവസ്യ ന അന്തം പശ്യാമി ന മദ്ധ്യം പശ്യാമി ന പുനഃ ആദിം പശ്യാമി ഹേ വിശ്വേശ്വര ഹേ വിശ്വരൂപ. 16 കി ച - *കിരീടിനം ഗദിനം ചക്രിണം ച തേജോരാശിം സർവതോ ദീപ്തിമന്തം* *പശ്യാമി ത്വാം ദുർനിരീക്ഷ്യം സമന്താദ്ദീപ്താനലാർകദ്യുതിമപ്രമേയം* 17 കിരീടിനം കിരീടം നാമ ശിരോഭൂഷണവിശേഷഃ തദ് യസ്യ അസ്തി സ കിരീടീ തം കിരീടിനം തഥാ ഗദിനം ഗദാ യസ്യ വിദ്യതേ ഇതി ഗദീ തം ഗദിനം തഥാ ചക്രിണം ചക്രം അസ്യ അസ്തി ഇതി ചക്രീ തം ചക്രിണം ച തേജോരാശിം തേജഃപുഞ്ജം സർവതോ ദീപ്തിമന്തം സർവതഃ ദീപ്തിഃ യസ്യ അസ്തി സഃ സർവതോദീപ്തിമാൻ തം സർവതോദീപ്തിമന്തം പശ്യാമി ത്വാം ദുർനിരീക്ഷ്യം ദുഃഖേന നിരീക്ഷ്യഃ ദുർനിരീക്ഷ്യഃ തം ദുർനിരീക്ഷ്യം സമന്താത് സമന്തതഃ സർവത്ര ദീപ്താനലാർകദ്യുതിം അനലഃ ച അർകഃ ച അനലാർകൗ ദീപ്തൗ അനലാർകൗ ദീപ്താനലാർകൗ തയോഃ ദീപ്താനലാർകയോഃ ദ്യുതിഃ ഇവ ദ്യുതിഃ തേജഃ യസ്യ തവ സ ത്വം ദീപ്താനലാർകദ്യുതിഃ തം ത്വാം ദീപ്താനലാർകദ്യുതിം. അപ്രമേയം ന പ്രമേയം അപ്രമേയം അശക്യപരിച്ഛേദം ഇത്യർത്ഥഃ. 17 ഇത ഏവ തേ യോഗശക്തിദർശനാദ് അനുമിനോമി - *ത്വമക്ഷരം പരമം വേദിതവ്യം ത്വമസ്യ വിശ്വസ്യ പരം നിധാനം* *ത്വമവ്യയഃ ശാശ്വതധർമഗോപ്താ സനാതനസ്ത്വം പുരുഷോ മതോ മേ* 18 ത്വം അക്ഷരം ന ക്ഷരതി ഇതി പരമം ബ്രഹ്മ വേദിതവ്യം ജ്ഞാതവ്യം മുമുക്ഷുഭിഃ, ത്വം അസ്യ വിശ്വസ്യ സമസ്തസ്യ ജഗതഃ പരം പ്രകൃഷ്ടം നിധാനം, നിധീയതേ അസ്മിൻ ഇതി നിധാനം പരഃ ആശ്രയഃ ഇത്യർത്ഥഃ. കിം ച ത്വം അവ്യയഃ ന തവ വ്യയഃ വിദ്യതേ ഇതി അവ്യയഃ ശാശ്വതധർമഗോപ്താ ശശ്വദ് ഭവഃ ശാശ്വതഃ നിത്യഃ ധർമഃ തസ്യ ഗോപ്താ ശാശ്വതധർമഗോപ്താ സനാതനഃ ചിരന്തനഃ ത്വം പുരുഷഃ പരഃ മതഃ അഭിപ്രേതഃ മേ മമ. 18 കിം ച - *അനാദിമധ്യാന്തമനന്തവീര്യമ‌നന്തബാഹും ശശിസൂര്യനേത്രം* *പശ്യാമി ത്വാം ദീപ്തഹുതാശവക്ത്രം സ്വതേജസാ വിശ്വമിദം തപന്തം* 19 അനാദിമദ്ധ്യാന്തം ആദിഃ ച മദ്ധ്യം ച അന്തഃ ച ന വിദ്യതേ യസ്യ സഃ അയം അനാദിമദ്ധ്യാന്തഃ തം ത്വാം അനാദിമദ്ധ്യാന്തം, അനന്തവീര്യം ന തവ വീര്യസ്യ അന്തഃ അസ്തി ഇതി അനന്തവീര്യഃ തം ത്വാം അനന്തവീര്യം, തഥാ അനന്തബാഹും അനന്താ ബാഹവഃ യസ്യ തവ സഃ ത്വം അനന്തബാഹുഃ തം ത്വാം അനന്തബാഹും ശശിസൂര്യനേത്രം ശശിസൂര്യൗ നേത്രേ യസ്യ തവ സ ത്വം ശശിസൂര്യനേത്രഃ തം ത്വാം ശശിസൂര്യനേത്രം ചന്ദ്രാദിത്യനയനം പശ്യാമി, ത്വാം ദീപ്തഹുതാശവക്ത്രം ദീപ്തഃ ച അസൗ ഹുതാശഃ ച സ വക്ത്രം യസ്യ തവ സ ത്വം ദീപ്തഹുതാശവക്ത്രഃ തം ത്വാം ദീപ്തഹുതാശവക്ത്രം സ്വതേജസാ വിശ്വം ഇദം തപന്തം താപ യന്തം. 19