ശ്രീകൃഷ്ണകർണാമൃതം  .. പ്രഥമാശ്വാസഃ . . ചിന്താമണിർജയതി സോമഗിരിർഗുരുർമേ ശിക്ഷാഗുരുശ്ച ഭഗവാൻ ശിഖിപിഞ്ഛമൗലിഃ . യത്പാദകല്പതരുപല്ലവശേഖരേഷു ലീലാസ്വയംവരരസം ലഭതേ ജയശ്രീഃ .. 1.1.. അസ്തി സ്വസ്തരുണീകരാഗ്രവിഗലത്കല്പപ്രസൂനാപ്ലുതം വസ്തുപ്രസ്തുതവേണുനാദലഹരീനിർവാണനിർവ്യാകുലം . സ്രസ്തസ്രസ്തനിരുദ്ധനീവിവിലസദ്ഗോപീസഹസ്രാവൃതം ഹസ്തന്യസ്തനതാപവർഗമഖിലോദാരം കിശോരാകൃതി .. 1.2.. ചാതുര്യൈകനിധാനസീമചപലാഽപാംഗച്ഛടാമന്ദരം ലാവണ്യാമൃതവീചിലാലിതദൃശം ലക്ഷ്മീകടക്ഷാദൃതം . കാലിന്ദീപുലിനാംഗണപ്രണയിനം കാമാവതാരാങ്കുരം ബാലം നീലമമീ വയം മധുരിമസ്വാരാജ്യമാരാധ്നുമഃ .. 1.3.. ബർഹോത്തംസവിലാസികുന്തലഭരം മാധുര്യമഗ്നാനനം പ്രോന്മീലന്നവയൗവനം പ്രവിലസദ്വേണുപ്രണാദാമൃതം . ആപീനസ്തനകുഡ്മലാഭിരഭിതോ ഗോപീഭിരാരാധിതം ജ്യോതിശ്ചേതസി നശ്ചകാസ്തി ജഗതാമേകാഭിരാമാദ്ഭുതം .. 1.4.. മധുരതരസ്മിതാമൃതവിമുഗ്ധമുഖാംബുരുഹം മദശിഖിപിഞ്ഛലാഞ്ഛിതമനോജ്ഞകചപ്രചയം . വിഷയവിഷാമിഷഗ്രസനഗൃധ്നുഷി ചേതസി മേ വിപുലവിലോചനം കിമപി ധാമ ചകാസ്തി ചിരം .. 1.5.. മുകുലായമാനനയനാംബുജം വിഭോർമുരലീനിനാദമകരന്ദനിർഭരം . മുകുരായമാണമൃദുഗണ്ഡമണ്ഡലം മുഖപങ്കജം മനസി മേ വിജൃംഭതാം .. 1.6.. കമനീയകിശോരമുഗ്ധമൂർതേഃ കലവേണുക്വണിതാദൃതാനനേന്ദോഃ . മമ വാചി വിജൃംഭതാം മുരാരേർമധുരിമ്ണഃ കണികാപി കാപി കാപി .. 1.7.. മദശിഖണ്ഡിശിഖണ്ഡവിഭൂഷണം മദനമന്ഥരമുഗ്ധമുഖാംബുജം . വ്രജവധൂനയനാഞ്ജനരഞ്ജിതം വിജയതാം മമ വാങ്മയജീവിതം .. 1.8.. പല്ലവാരുണപാണിപങ്കജസംഗിവേണുരവാകുലം ഫുല്ലപാടലപാടലീപരിവാദിപാദസരോരുഹം . ഉല്ലസന്മധുരാധരദ്യുതിമഞ്ജരീസരസാനനം വല്ലവീകുചകുംഭകുങ്കുമപങ്കിലം പ്രഭുമാശ്രയേ .. 1.9.. അപാംഗരേഖാഭിരഭംഗുരാഭിരനംഗലീലാരസരഞ്ജിതാഭിഃ . അനുക്ഷണം വല്ലവസുന്ദരീഭിരഭ്യർചമാനം വിഭുമാശ്രയാമഃ .. 1.10.. ഹൃദയേ മമ ഹൃദ്യവിഭ്രമാണാം ഹൃദയം ഹർഷവിശാലലോലനേത്രം . തരുണം വ്രജബാലസുന്ദരീണാം തരലം കിഞ്ചന ധാമ സന്നിധത്താം .. 1.11.. നിഖിലഭുവനലക്ഷ്മീനിത്യലീലാസ്പദാഭ്യാം കമലവിപിനവീഥീഗർവസർവങ്കഷാഭ്യാം . പ്രണമദഭയദാനപ്രൗഢഗാഢോദ്ധതാഭ്യാം കിമപി വഹതു ചേതഃ കൃഷ്ണപാദാംബുജാഭ്യാം .. 1.12.. പ്രണയപരിണതാഭ്യാം പ്രാഭവാലംബനാഭ്യാം പ്രതിപദലലിതാഭ്യാം പ്രത്യഹം നൂതനാഭ്യാം . പ്രതിമുഹുരധികാഭ്യാം പ്രസ്നുവല്ലോചനാഭ്യാം പ്രഭവതു ഹൃദയേ നഃ പ്രാണനാഥഃ കിശോരഃ .. 1.13.. മാധുര്യവാരിധിമദാന്ധതരംഗഭംഗീശൃംഗാരസങ്കലിതശീതകിശോരവേഷം . ആമന്ദഹാസലലിതാനനചന്ദ്രബിംബമാനന്ദസമ്പ്ലവമനുപ്ലവതാം മനോ മേ .. 1.14.. അവ്യാജമഞ്ജുലമുഖാംബുജമുഗ്ധഭാവൈരാസ്വാദ്യമാനനിജവേണുവിനോദനാദം . ആക്രീഡതാമരുണപാദസരോരുഹാഭ്യാമാർദ്രേ മദീയഹൃദയേ ഭുവനാർദ്രമോജഃ .. 1.15.. മണിനൂപുരവാചാലം വന്ദേ തച്ചരണം വിഭോഃ . ലലിതാനി യദീയാനി ലക്ഷ്മാണി വ്രജവീഥിഷു .. 1.16.. മമ ചേതസി സ്ഫുരതു വല്ലവീവിഭോർമണിനൂപുരപ്രണയിമഞ്ജുശിഞ്ജിതം . കമലാവനേചരകലിന്ദകന്യകാകലഹംസകണ്ഠകലകൂജിതാദൃതം .. 1. 17.. തരുണാരുണകരുണാമയവിപുലായതനയനം കമലാകുചകലശീഭരപുലകീകൃതഹൃദയം . മുരലീരവതരലീകൃതമുനിമാനസനലിനം മമ ഖേലതി മദചേതസി മധുരാധരമമൃതം .. 1.18.. ആമുഗ്ധമർധനയനാംബുജചുംബ്യമാന- ഹർഷാകുലവ്രജവധൂമധുരാനനേന്ദോഃ . ആരബ്ധവേണുരവമാദികിശോരമൂർതേ- രാവിർഭവന്തി മമ ചേതസി കേഽപി ഭാവാഃ .. 1.19.. കലക്വണിതകങ്കണം കരനിരുദ്ധപീതാംബരം ക്രമപ്രസൃതകുന്തലം കലിതബർഹഭൂഷം വിഭോഃ . പുനഃ പ്രസൃതിചാപലം പ്രണയിനീഭുജായന്ത്രിതം മമ സ്ഫുരതു മാനസേ മദനകേലിശയ്യോത്ഥിതം .. 1.20.. സ്തോകസ്തോകനിരുധ്യമാനമൃദുലപ്രസ്യന്ദിമന്ദസ്മിതം പ്രേമോദ്ഭേദനിരർഗലപ്രസൃമരപ്രവ്യക്തരോമോദ്ഗമം . ശ്രോതൃശ്രോത്രമനോഹരവ്രജവധൂലീലാമിഥോ ജല്പിതം മിഥ്യാസ്വാപമുപാസ്മഹേ ഭഗവതഃ ക്രീഡാനിമീലദ്ദൃശഃ .. 1.21.. വിചിത്രപത്രാങ്കുരശാലിബാലാസ്തനാന്തരം മൗനിമനോഽന്തരം വാ . അപാസ്യ വൃന്ദാവനപാദപാസ്യമുപാസ്യമന്യന്ന വിലോകയാമഃ .. 1.22.. സാർധം സമൃദ്ധൈരമൃതായമാനൈരാധ്യായമാനൈർമുരലീനിനാദൈഃ . മൂർധാഭിഷിക്തം മധുരാകൃതീനാം ബാലം കദാ നാമ വിലോകയിഷ്യേ .. 1.23.. ശിശിരീകുരുതേ കദാ നു നഃ ശിഖിപിഞ്ഛാഭരണശ്ശിശുർദൃശോഃ . യുഗലം വിഗലന്മധുദ്രവസ്മിതമുദ്രാമൃദുനാ മുഖേന്ദുനാ .. 1.24.. കാരുണ്യകർബുരകടാക്ഷനിരീക്ഷണേന താരുണ്യസംവലിതശൈശവവൈഭവേന . ആപുഷ്ണതാ ഭുവനമദ്ഭുതവിഭ്രമേണ ശ്രീകൃഷ്ണചന്ദ്ര ശിശിരീകുരു ലോചനം മേ .. 1.25.. കദാ വാ കാലിന്ദീകുവലയദലശ്യാമലതരാഃ കടാക്ഷാ ലക്ഷ്യന്തേ കിമപി കരുണാവീചിനിചിതാഃ . കദാ വാ കന്ദർപപ്രതിഭടജടാചന്ദ്രശിശിരാഃ കിമപ്യന്തസ്തോഷം ദദതി മുരലീകേലിനിനദാഃ .. 1.26.. അധീരമാലോകിതമാർദ്രജല്പിതം ഗതം ച ഗംഭീരവിലാസമന്ഥരം . അമന്ദമാലിംഗിതമാകുലോന്മദസ്മിതം ച തേ നാഥ വദന്തി ഗോപികാഃ .. 1.27.. അസ്തോകസ്മിതഭരമായതായതാക്ഷം നിഃശേഷസ്തനമൃദിതം വ്രജാംഗനാഭിഃ . നിസ്സീമസ്തബകിതനീലകാന്തിധാരം ദൃശ്യാസം ത്രിഭുവനസുന്ദരം മഹസ്തേ .. 1.28.. മയി പ്രസാദം മധുരൈഃ കടാക്ഷൈർവംശീനിനാദാനുചരൈർവിധേഹി . ത്വയി പ്രസന്നേ കിമിഹാപരൈർനസ്ത്വയ്യപ്രസന്നേ കിമിഹാപരൈർനഃ .. 1.29.. നിബദ്ധമുഗ്ധാഞ്ജലിരേഷ യാചേ നീരന്ധ്രദൈന്യോന്നതമുക്തകണ്ഠം . ദയാംബുധേ ദേവ ഭവത്കടാക്ഷദാക്ഷിണ്യലേശേന സകൃന്നിഷിഞ്ച .. 1.30.. പിഞ്ഛാവതംസരചനോചിതകേശപാശേ പീനസ്തനീനയനപങ്കജപൂജനീയേ . ചന്ദ്രാരവിന്ദവിജയോദ്യതവക്ത്രബിംബേ ചാപല്യമേതി നയനം തവ ശൈശവേ നഃ .. 1.31.. ത്വച്ഛൈശവം ത്രിഭുവനാദ്ഭുതമിത്യവൈമി യച്ചാപലം ച മമ വാഗവിവാദഗമ്യം . തത് കിം കരോമി വിരണന്മുരലീവിലാസമുഗ്ധം മുഖാംബുജമുദീക്ഷിതുമീക്ഷണാഭ്യാം .. 1.32.. പര്യാചിതാമൃതരസാനി പദാർഥഭംഗീഫൽഗൂനി വൽഗിതവിശാലവിലോചനനാനി . ബാല്യാധികാനി മദവല്ലവഭാവിതാനി ഭാവേ ലുഠന്തി സുദൃശാം തവ ജല്പിതാനി .. 1.33.. പുനഃ പ്രസന്നേന മുഖേന്ദുതേജസാ പുരോഽവതീർണസ്യ കൃപാമഹാംബുധേഃ . തദേവ ലീലാമുരലീരവാമൃതം സമാധിവിഘ്നായ കദാ നു മേ ഭവേത് .. 1.34.. ഭാവേന മുഗ്ധചപലേന വിലോകനേന മന്മാനസേ കിമപി ചാപലമുദ്വഹന്തം . ലോലേന ലോചനരസായനമീക്ഷണേന ലീലാകിശോരമുപഗൂഹിതുമുത്സുകോഽസ്മി .. 1.35.. അധീരബിംബാധരവിഭ്രമേണ ഹർഷാർദ്രവേണുസ്വരസമ്പദാ ച . അനേന കേനാപി മനോഹരേണ ഹാ ഹന്ത ഹാ ഹന്ത മനോ ധുനോതി .. 1.36.. യാവന്ന മേ നിഖിലമർമദൃഢാഭിഘാതനിസ്സന്ധിബന്ധനമുദേത്യസവോപതാപഃ . താവദ്വിഭോ ഭവതു താവകവക്ത്രചന്ദ്രചന്ദ്രാതപദ്വിഗുണിതാ മമ ചിത്തധാരാ .. 1.37.. യാവന്ന മേ നരദശാ ദശമീ ദൃശോഽപി രന്ധ്രാദുദേതി തിമിരീകൃതസർവഭാവാ . ലാവണ്യകേലിഭവനം തവ താവദേതു ലക്ഷ്മ്യാഃ സമുത്ക്വണിതവേണുമുഖേന്ദുബിംബം .. 1.38.. ആലോലലോചനവിലോകിതകേലിധാരാനീരാജിതാഗ്രസരണേഃ കരുണാംബുരാശേഃ . ആർദ്രാണി വേണുനിനദൈഃ പ്രതിനാദപൂരൈരാകർണയാമി മണിനൂപുരശിഞ്ജിതാനി .. 1.39.. ഹേ ദേവ ഹേ ദയിത ഹേ ജഗദേകബന്ധോ കേ കൃഷ്ണ ഹേ ചപല ഹേ കരുണൈകസിന്ധോ . ഹേ നാഥ ഹേ രമണ ഹേ നയനാഭിരാമ ഹാ ഹാ കദാ നു ഭവിതാസി പദം ദൃശോർമേ .. 1.40.. അമൂന്യധന്യാനി ദിനാന്തരാണി ഹരേ ത്വദാലോകനമന്തരേണ . അനാഥബന്ധോ കരുണൈകസിന്ധോ ഹാ ഹന്ത ഹാ ഹന്ത കഥം നയാമി .. 1.41.. കിമിവ ശൃണുമഃ കസ്യ ബ്രൂമഃ കഥം കൃതമാശയാ കഥയത കഥാം ധന്യാമന്യാമഹോ ഹൃദയേശയഃ . മധുരമധുരസ്മേരാകാരേ മനോനയനോത്സവേ കൃപണകൃപണാ കൃഷ്ണേ തൃഷ്ണാ ചിരം ബത ലംബതേ .. 1.42.. ആഭ്യാം വിലോചനാഭ്യാമംബുജദലലലിതലോചനം ബാലം . ദ്വാഭ്യാമപി പരിരബ്ധും ദൂരേ മമ ഹന്ത ദൈവസമാഗ്രീ .. 1.43.. അശ്രാന്തസ്മിതമരുണാരുണാധരോഷ്ഠം ഹർഷാർദ്രദ്വിഗുണമനോജ്ഞവേണുഗീതം . വിഭ്രാമ്യദ്വിപുലവിലോചനാർധമുഗ്ധം വീക്ഷിഷ്യേ തവ വദനാംബുജം കദാ നു .. 1.44.. ലീലായതാഭ്യാം രസശീതലാഭ്യാം നീലാരുണാഭ്യാം നയനാംബുജാഭ്യാം . ആലോകയേദദ്ഭുതവിഭ്രമാഭ്യാം ബാലഃ കദാ കാരുണികഃ കിശോരഃ .. 1.45.. ബഹുലചികുരഭാരം ബദ്ധപിഞ്ഛാവതംസം ചപലചപലനേത്രം ചാരുബിംബാധരോഷ്ഠം . മധുരമൃദുലഹാസം മന്ഥരോദാരലീലം മൃഗയതി നയനം മേ മുഗ്ധവേഷം മുരാരേഃ .. 1.46.. ബഹുലജലദച്ഛായാചോരം വിലാസഭരാലസം മദശിഖിശിഖാലീലോത്തംസം മനോജ്ഞമുഖാംബുജം . കമപി കമലാപാങ്കോദഗ്രപ്രപന്നജഗജ്ജിതം മധുരിമപരീപാകോദ്രേകം വയം മൃഗയാമഹേ .. 1.47.. പരാമൃശ്യം ദൂരേ പരിഷദി മുനീനാം വ്രജവധൂ- ദൃശാം ദൃശ്യം ശശ്വത് ത്രിഭുവനമനോഹാരിവപുഷം . അനാമൃശ്യം വാചാമനിദമുദയാനാമപി കദാ ദരീദൃശ്യേ ദേവ ദരദലിതനീലോത്പലനിഭം .. 1.48.. ലീലാനനാംബുജമധീരമുദീക്ഷമാണം നർമാണി വേണുവിവരേഷു നിവേശയന്തം . ഡോലായമാനനയനം നയനാഭിരാമം ദേവം കദാ നു ദയിതം വ്യതിലോകയിഷ്യേ .. 1.49.. ലഗ്നം മുഹുർമനസി ലമ്പടസമ്പ്രദായി- ലേഖാവിലേഖനരസജ്ഞമനോജ്ഞവേഷം . ലജ്ജന്മൃദുസ്മിതമധുസ്നപിതാധരാംശു- രാകേന്ദുലാലിതമുഖേന്ദുമുകുന്ദബാല്യം .. 1.50.. അഹിമകരകരനികരമൃദുമൃദിതലക്ഷ്മീ- സരസതരസരസിരുഹസദൃശദൃശി ദേവേ . വ്രജയുവതിരതികലഹവിജയിനിജലീലാ- മദമുദിതവദനശശിമധുരിമണി ലീയേ .. 1.51.. കരകമലദലദലിതലലിതതരവംശീ കലനിനദഗലദമൃതഘനസരസി ദേവേ . സഹജരസഭരഭരിതദരഹസിതവീഥീ- സതതവഹദധരമണിമധുരിമണി ലീയേ .. 1.52.. കുസുമശരശരസമരകുപിതമദഗോപീ- കുചകലശഘുസൃണരസലസദുരസി ദേവേ . മദലുലിതമൃദുഹസിതമുഷിതശശിശോഭാ- മുഹുരധികമുഖകമലമധുരിമണി ലീയേ .. 1.53.. ആനമ്രാമസിതഭ്രുവോരുപചിതാമക്ഷീണപക്ഷ്മാങ്കുരേ- ഷ്വാലോലാമനുരാഗിണോർനയനയോരാർദ്രാം മൃദൗ ജല്പിതേ . ആതാമ്രാമധരാമൃതേ മദകലാമമ്ലാനവംശീരവേ- ഷ്വാശാസ്തേ മമ ലോചനം വ്രജശിശോർമൂർതിം ജഗന്മോഹിനീം .. 1.54.. തത്കൈശോരം തച്ച വക്ത്രാരവിന്ദം തത്കാരുണ്യം തേ ച ലീലാകടാക്ഷാഃ . തത്സൗന്ദര്യം സാ ച മന്ദസ്മിതശ്രീഃ സത്യം സത്യം ദുർലഭം ദൈവതേഷു .. 1.55.. വിശ്വോപപ്ലവശമനൈകബദ്ധദീക്ഷം വിശ്വാസസ്തവകിതചേതസാം ജനാനാം . പശ്യാമഃ പ്രതിനവകാന്തികന്ദലാർദ്രം പശ്യാമഃ പഥി പഥി ശൈശവം മുരാരേഃ .. 1.56.. മൗലിശ്ചന്ദ്രകഭൂഷണാ മരകതസ്തംഭാഭിരാമം വപു- ര്വക്ത്രം ചിത്രവിമുഗ്ധഹാസമധുരം ബാലേ വിലോലേ ദൃശൗ . വാചശ്ശൈശവശീതലാമദഗജശ്ലാഘ്യാ വിലാസസ്ഥിതി- ര്മന്ദം മന്ദമയേ ക ഏഷ മഥുരാവീഥീമിതോ ഗാഹതേ .. 1.57.. പാദൗ പാദവിനിർജിതാംബുജവനൗ പദ്മാലയാലങ്കൃതൗ പാണീ വേണുവിനോദനപ്രണയിനൗ പര്യന്തശില്പശ്രിയൗ . ബാഹൂ ദോഹദഭാജനം മൃഗദൃശാം മാധുര്യധാരാ ഗിരോ വക്ത്രം വാഗ്വിഭവാതിലംഘിതമഹോ ബാലം കിമേതന്മഹഃ .. 1.58.. ബർഹം നാമ വിഭൂഷണം ബഹുമതം വേഷായ ശേഷൈരലം വക്ത്രം ദ്വിത്രിവിശേഷകാന്തിലഹരീവിന്യാസധന്യാധരം . ശീലൈരല്പധിയാമഗമ്യവിഭവൈഃ ശൃംഗാരഭംഗീമയം ചിത്രം ചിത്രമഹോ വിചിത്രമഹഹോ ചിത്രം വിചിത്രം മഹഃ .. 11.59.. അഗ്രേ സമഗ്രയതി കാമപി കേലിലക്ഷ്മീ- മന്യാസു ദിക്ഷ്വപി വിലോചനമേവ സാക്ഷീ . ഹാ ഹന്ത ഹസ്തപഥദൂരമഹോ കിമേത- ദാസീത് കിശോരമയമംബ ജഗത്ത്രയം മേ .. 1.60.. ചികുരം ബഹുലം വിരലം ഭ്രമരം മൃദുലം വചനം വിപുലം നയനം . അധരം മധുരം വദനം ലലിതം ചപലം ചരിതന്തു കദാഽനുഭവേ .. 1.61.. പരിപാലയ നഃ കൃപാലയേത്യസകൃജ്ജല്പിതമാത്മബാന്ധവഃ . മുരലീമൃദുലസ്വനാന്തരേ വിഭുരാകർണയിതാ കദാ നു നഃ .. 1.62.. കദാ നു കസ്യാം നു വിപദ്ദശായാം കൈശോരഗന്ധിഃ കരുണാംബുധിർനഃ . വിലോചനാഭ്യാം വിപുലായതാഭ്യാം വ്യാലോകയിഷ്യൻ വിഷയീകരോതി .. 1.63.. മധുരമധരബിംബേ മഞ്ജുലം മന്ദഹാസേ ശിശിരമമൃതവാക്യേ ശീതലം ദൃഷ്ടിപാതേ . വിപുലമരുണനേത്രേ വിശ്രുതം വേണുനാദേ മരകതമണിനീലം ബാലമാലോകയേ നു .. 1.64.. മാധുര്യാദപി മധുരം മന്മഥതാതസ്യ കിമപി കൈശോരം . ചാപല്യാദപി ചപലം ചേതോ മമ ഹരതി ഹന്ത കിം കുർമഃ .. 1.65.. വക്ഷഃസ്ഥലേ ച വിപുലം നയനോത്പലേ ച മന്ദസ്മിതേ ച മൃദുലം മദജല്പിതേ ച . ബിംബാധരേ ച മധുരം മുരലീരവേ ച ബാലം വിലാസനിധിമാകലയേ കദാ നു .. 1.66.. ആർദ്രാവലോകിതദയാപരിണദ്ധനേത്രമാവിഷ്കൃതസ്മിതസുധാമധുരാധരോഷ്ഠം . ആദ്യം പുമാംസമവതംസിതബർഹിബർഹമാലോകയന്തി കൃതിനഃ കൃതപുണ്യപുഞ്ജാഃ .. 1.67.. മാരഃ സ്വയം നു മധുരദ്യുതിമണ്ഡലം നു മാധുര്യമേവ നു മനോനയനാമൃതം നു . വാണീമൃജാ നു മമ ജീവിതവല്ലഭോ നു ബാലോഽയമഭ്യുദയതേ മമ ലോചനായ .. 1.68.. ബാലോഽയമാലോലവിലോചനേന വക്ത്രേണ ചിത്രീകൃതദിങ്മുഖേന . വേഷേണ ഘോഷോചിതഭൂഷണേന മുഗ്ധേന ദുഗ്ധേ നയനോത്സുകം നഃ .. 1.69.. ആന്ദോലിതാഗ്രഭുജമാകുലനേത്രലീലമാർദ്രസ്മിതാർദ്രവദനാംബുജചന്ദ്രബിംബം . ശിഞ്ജാനഭൂഷണശതം ശിഖിപിഞ്ഛമൗലിം ശീതം വിലോചനരസായനമഭ്യുപൈതി .. 1.70.. പശുപാലപാലപരിഷദ്വിഭൂഷണം ശിശുരേഷ ശീതലവിലോലലോചനഃ . മൃദുലസ്മിതാർദ്രവദനേന്ദുസമ്പദാ മദയന്മദീയഹൃദയം വിഗാഹതേ .. 1.71.. var De's version has additional verse. Numbers are not changed wi De's. കിമിദമധരവീഥീകൢപ്തവംശീനിനാദം കിരതി നയനയോർനഃ കാമപി പ്രേമധാരാം . തദിദമമരവീഥീദുർലഭം വല്ലഭം നഃ ത്രിഭുവനകമനീയം ദൈവതം ജീവിതം ച .. 1.72.. var തദിദമുപനതം തമാലനീലം തരലവിലോചനതാരകാഭിരാമം . മുദിതമുദിതവക്ത്രചന്ദ്രബിംബം മുഖരിതവേണുവിലാസജീവിതം മേ .. 1.72.. ചാപല്യസീമ ചപലാനുഭവൈകസീമ ചാതുര്യസീമ ചതുരാനനശില്പസീമ . സൗരഭ്യസീമ സകലാദ്ഭുതകേലിസീമ സൗഭാഗ്യസീമ തദിദം വ്രജഭാഗ്യസീമ .. 1.73.. മാധുര്യേണ ദ്വിഗുണശിശിരം വക്ത്രചന്ദ്രം വഹന്തീ വംശീവീഥീവിഗലദമൃതസ്രോതസാ സേചയന്തീ . മദ്വാണീനാം വിഹരണപദം മത്തസൗഭാഗ്യഭാജാം മത്പുണ്യാനാം പരിണതിരഹോ നേത്രയോസ്സന്നിധത്തേ .. 1.74.. തേജസേഽസ്തു നമോ ധേനുപാലിനേ ലോകപാലിനേ . രാധാപയോധരോത്സംഗശായിനേ ശേഷശായിനേ .. 1.75.. ധേനുപാലദയിതാസ്തനസ്ഥലീധന്യകുങ്കുമസനാഥകാന്തയേ . വേണുഗീതഗതിമൂലവേധസേ തേജസേ തദിദമോം നമോ നമഃ .. 1.76.. മൃദുക്വണന്നൂപുരമന്ഥരേണ ബാലേന പാദാംബുജപല്ലവേന . അനുക്വണന്മഞ്ജുലവേണുഗീതമായാതി മേ ജീവിതമാത്തകേലി .. 1.77.. സോഽയം വിലാസമുരലീനിനദാമൃതേന സിഞ്ചന്നുദഞ്ചിതമിദം മമ കർണയുഗ്മം . ആയാതി മേ നയനബന്ധുരനന്യബന്ധുരാനന്ദകന്ദലിതകേലികടാക്ഷലക്ഷ്യഃ .. 1.78.. ദൂരാദ്വിലോകയതി വാരണഖേലഗാമീ ധാരാകടാക്ഷഭരിതേന വിലോചനേന . ആരാദുപൈതി ഹൃദയംഗമവേണുനാദവേണീദുഘേന ദശനാവരണേന ദേവഃ .. 1.79.. ത്രിഭുവനസരസാഭ്യാം ദീപ്തഭൂഷാപദാഭ്യാം ദൃശി ദൃശി ശിശിരാഭ്യാം ദിവ്യലീലാകുലാഭ്യാം . അശരണശരണാഭ്യാമദ്ഭുതാഭ്യാം പദാഭ്യാ- മയമയമനുകൂജദ്വേണുരായാതി ദേവഃ .. 1.80.. സോഽയം മുനീന്ദ്രജനമാനസതാപഹാരീ സോഽയം മദവ്രജവധൂവസനാപഹാരീ . സോഽയം തൃതീയഭുവനേശ്വരദർപഹാരീ സോഽയം മദീയഹൃദയാംബുരുഹാപഹാരീ .. 1.81.. സർവജ്ഞത്വേ ച മൗഗ്ധ്യേ ച സാർവഭൗമമിദം മമ . നിർവിശന്നയനം തേജോ നിർവാണപദമശ്നുതേ .. 1.82.. പുഷ്ണാനമേതത്പുനരുക്തശോഭമുഷ്ണേതരാംശോരുദയാന്മുഖേന്ദോഃ . തൃഷ്ണാംബുരാശിം ദ്വിഗുണീകരോതി കൃഷ്ണാഹ്വയം കിഞ്ചന ജീവിതം മേ .. 1.83.. തദേതദാതാമ്രവിലോചനശ്രീസംഭാവിതാശേഷവിനമ്രവർഗം . മുഹുർമുരാരേർമധുരാധരോഷ്ഠം മുഖാംബുജം ചുംബതി മാനസം മേ .. 1.84.. കരൗ ശരദുദഞ്ചിതാംബുജവിലാസശിക്ഷാഗുരൂ പദൗ വിബുധപാദപപ്രഥമപല്ലവോല്ലംഘിനൗ . ദൃശൗ ദലിതദുർമദത്രിഭുവനോപമാനശ്രിയൗ വിലോക്യ സുവിലോചനാമൃതമഹോ മഹച്ഛൈശവം .. 1.85.. ആചിന്വാനമഹന്യഹന്യഹനി സാകാരാൻ വിഹാരക്രമാ- നാരുന്ധാനമരുന്ധതീഹൃദയമപ്യാർദ്രസ്മിതാസ്യശ്രിയാ . ആതന്വാനമനന്യജന്മനയനശ്ലാഘ്യാമനർഘ്യാം ദശാ- മാനന്ദം വ്രജസുന്ദരീസ്തനതടീസാമ്രാജ്യമാജ്ജൃംഭതേ .. 1.86.. സമുച്ഛ്വസിതയൗവനം തരലശൈശവാലങ്കൃതം മദച്ഛുരിതലോചനം മദനമുഗ്ധഹാസാമൃതം . പ്രതിക്ഷണവിലോകനം പ്രണയപീതവംശീമുഖം ജഗത്ത്രയവിമോഹനം ജയതി മാമകം ജീവിതം .. 1.87.. ചിത്രം തദേതച്ചരണാരവിന്ദം ചിത്രം തദേതന്നയനാരവിന്ദം . ചിത്രം തദേതദ്വദനാരവിന്ദം ചിത്രം തദേതത്പുനരംബ ചിത്രം .. 1.88.. അഖിലഭുവനൈകഭൂഷമധിഭൂഷിതജലധിദുഹിതൃകുചകുംഭം . വ്രജയുവതീഹാരവല്ലീമരകതനായകമഹാമണിം വന്ദേ .. 1.89.. കാന്താകചഗ്രഹണവിഗ്രഹബദ്ധലക്ഷ്മീഖണ്ഡാംഗരാഗരസരഞ്ജിതമഞ്ജുലശ്രീഃ . ഗണ്ഡസ്ഥലീമുകുരമണ്ഡലഖേലമാനഘർമാങ്കുരം കിമപി ഖേലതി കൃഷ്ണതേജഃ .. 1.90.. മധുരം മധുരം വപുരസ്യ വിഭോർമധുരം മധുരം വദനം മധുരം . മധുഗന്ധി മൃദുസ്മിതമേതദഹോ മധുരം മധുരം മധുരം മധുരം .. 1.91.. ശൃംഗാരരസസർവസ്വം ശിഖിപിഞ്ഛവിഭൂഷണം . അംഗീകൃതനരാകാരമാശ്രയേ ഭുവനാശ്രയം .. 1.92.. നാദ്യാപി പശ്യതി കദാചന ദർശനേന ചിത്തേന ചോപനിഷദാ സുദൃശാം സഹസ്രം . സ ത്വം ചിരം നയനയോരനയോഃ പദവ്യാം സ്വാമിൻ കയാ നു കൃപയാ മമ സന്നിധത്സേ .. 1.93.. കേയം കാന്തിഃ കേശവ ത്വന്മുഖേന്ദോഃ കോഽയം വേഷഃ കോഽപി വാചാമഭൂമിഃ . സേയം സോഽയം സ്വാദുതാ മഞ്ജുലശ്രീഃ ഭൂയോ ഭൂയോ ഭൂയശസ്താം നമാമി .. 1.94.. വദനേന്ദുവിനിർജിതശ്ശശീ ദശധാ ദേവ പദം പ്രപദ്യതേ . അധികാം ശ്രിയമശ്നുതേതരാം തവ കാരുണ്യവിജൃംഭിതം കിയത് .. 1.95.. തത്വന്മുഖം കഥമിവാബ്ജസമാനകക്ഷം വാങ്മാധുരീബഹുലപർവകലാസമൃദ്ധം . തത് കിം ബ്രുവേ കിമപരം ഭുവനൈകകാന്തം യസ്യ ത്വദാനനസമാ സുഷമാ സദാ സ്യാത് .. 1.96.. ശുശ്രൂഷസേ യദി വചഃ ശൃണു മാമകീനം പൂർവൈരപൂർവകവിഭിർന കടാക്ഷിതം യത് . നീരാജനക്രമധുരം ഭവദാനനേന്ദോഃ നിർവ്യാജമർഹതി ചിരായാ ശശിപ്രദീപഃ .. 1.97.. അഖണ്ഡനിർവാണരസപ്രവാഹൈർവിഖണ്ഡിതാശേഷരസാന്തരാണി . അയന്ത്രിതോദ്വാന്തസുധാർണവാനി ജയന്തി ശീതാനി തവ സ്മിതാനി .. 1.98.. കാമം സന്തു സഹസ്രശഃ കതിപയേ സ്വാരസ്യധൗരേയകാഃ കാമം വാ കമനീയതാപരിണതിസ്വാരാജ്യബദ്ധവ്രതാഃ . തൈർനൈവം വിവദാമഹേ ന ച വയം ദേവ പ്രിയം ബ്രൂമഹേ യത്സത്യം രമണീയതാപരിണതിസ്ത്വയ്യേവ പാരംഗതാ .. 1.99.. മന്ദാരമൂലേ മദനാഭിരാമം ബിംബാധരാപൂരിതവേണുനാദം . ഗോഗോപഗോപീജനമധ്യസംസ്ഥം ഗോപം ഭജേ ഗോകുലപൂർണചന്ദ്രം .. 1.100.. ഗലദ്വ്രീഡാ ലോലാ മദനവനിതാ ഗോപവനിതാ മധുസ്ഫീതം ഗീതം കിമപി മധുരാ ചാപലധുരാ . സമുജ്ജൃംഭാ ഗുംഫാ മധുരിമഗിരാം മാദൃശഗിരാം ത്വയി സ്ഥാനേ ജാതേ ദധതി ചപലം ജന്മ ച ഫലം .. 1.101.. ഭുവനം ഭവനം വിലാസിനീ ശ്രീസ്തനയസ്താമരസാസനഃ സ്മരശ്ച . പരിചാരപരമ്പരാഃ സുരേന്ദ്രാസ്തദപി ത്വച്ചരിതം വിഭോ വിചിത്രം .. 1.102.. ദേവസ്ത്രിലോകസൗഭാഗ്യകസ്തൂരീതിലകാങ്കുരഃ . ജീയാദ് വ്രജാംഗനാനംഗകേലീലലിതവിഭ്രമഃ .. 1.103.. പ്രേമദം ച മേ കാമദം ച മേ വേദനം ച മേ വൈഭവം ച മേ . ജീവനം ച മേ ജീവിതം ച മേ ദൈവതം ച മേ ദേവ നാപരം .. 1.104.. മാധുര്യേണ വിജൃംഭന്താം വാചോ നസ്തവ വൈഭവേ . ചാപല്യേന വിവർധന്താം ചിന്താ നസ്തവ ശൈശവേ .. 1.105.. യാനി ത്വച്ചരിതാമൃതാനി രസനാലേഹ്യാനി ധന്യാത്മനാം യേ വാ ചാപലശൈശവവ്യതികരാ രാധാപരാധോന്മുഖാഃ . യാ വാ ഭാവിതവേണുഗീതഗതയോ ലീലാമുഖാംഭോരുഹേ ധാരാവാഹികയാ വഹന്തു ഹൃദയേ താന്യേവ താന്യേവ മേ .. 1.106.. ഭക്തിസ്ത്വയി സ്ഥിരതരാ ഭഗവൻ യദി സ്യാ- ദ്ദൈവേന നഃ ഫലിതദിവ്യകിശോരവേഷേ . മുക്തിഃ സ്വയം മുകുലിതാഞ്ജലി സേവതേഽസ്മാൻ ധർമാർഥകാമഗതയഃ സമയപ്രതീക്ഷാഃ .. 1.107.. ജയ ജയ ജയ ദേവ ദേവ ദേവ ത്രിഭുവനമംഗലദിവ്യനാമധേയ . ജയ ജയ ജയ ബാലകൃഷ്ണദേവ ശ്രവണമനോനയനാമൃതാവതാര .. 1.108.. തുഭ്യം നിർഭരഹർഷവർഷവിവശാവേശസ്ഫുടാവിർഭവദ്- ഭൂയശ്ചാപലഭൂഷിതേഷു സുകൃതാം ഭാവേഷു നിർഭാസതേ . ശ്രീമദ്ഗോകുലമണ്ഡനായ മഹതേ വാചാം വിദൂരസ്ഫുടൻ- മാധുര്യൈകരസാർണവായ മഹസേ കസ്മൈ ചിദസ്മൈ നമഃ .. 1.109.. ഈശാനദേവചരണാഭരണേന നീവീദാമോദരസ്ഥിരയശഃ സ്തബകോദ്ഗമേന . ലീലാശുകേന രചിതം തവ ദേവ കൃഷ്ണകർണാമൃതം വഹതു കല്പശതാന്തരേഽപി .. 1.110.. var De's book has additional two verses ധന്യാനാം സരസാനുലാപസരണീസൗരഭ്യമഭ്യസ്യതാം കർണാനാം വിവരേഷു കാമപി സുധാവൃഷ്ടിം ദുഹാനം മുഹുഃ . വന്യാനാം സുദൃശാം മനോനയനയോർമഗ്നസ്യ ദേവസ്യ നഃ കർണാനാം വചസാം വിജൃംഭിതമഹോ കൃഷ്ണസ്യ കർണാമൃതം .. 1.111.. അനുഗ്രഹദ്വിഗുണവിശാലലോചനൈരനുസ്മരൻ മൃദുമുരലീരവാമൃതൈഃ . യതോ യതഃ പ്രസരതി മേ വിലോചനം തതസ്തതഃ സ്ഫുരതു തവൈവ വൈഭവം .. 1.112.. var .. ഇതി ശ്രീകൃഷ്ണകർണാമൃതേ പ്രഥമാശ്വാസഃ സമാപ്തഃ .. .. ദ്വിതീയാശ്വാസഃ .. അഭിനവനവനീതസ്നിഗ്ധമാപീതദുഗ്ധം ദധികണപരിദിഗ്ധം മുഗ്ധമങ്കം മുരാരേഃ . ദിശതു ഭുവനകൃച്ഛ്രച്ഛേദി താപിഞ്ഛഗുച്ഛ- ച്ഛവി നവശിഖിപിഞ്ഛാ ലാഞ്ഛിതം വാഞ്ഛിതം നഃ .. 2.1.. യാം ദൃഷ്ട്വാ യമുനാം പിപാസുരനിശം വ്യൂഹോ ഗവാം ഗാഹതേ വിദ്യുത്വാനിതി നീലകണ്ഠനിവഹോ യാം ദ്രഷ്ടുമുത്കണ്ഠതേ . ഉത്തംസായ തമാലപല്ലവമിതി ഛിന്ദന്തി യാം ഗോപികാഃ കന്തിഃ കാലിയശാസനസ്യ വപുഷഃ സാ പാവനീ പാതു നഃ .. 2.2.. ദേവഃ പായാത്പയസി വിമലേ യാമുനേ മജ്ജതീനാം യാചന്തീനാമനുനയപദൈർവഞ്ചിതാന്യംശുകാനി . ലജ്ജാലോലൈരലസവിലസൈരുന്മിഷത്പഞ്ചബാണൈ- ര്ഗോപസ്ത്രീണാം നയനകുസുമൈരർചിതഃ കേശവോ നഃ .. 2.3.. മാതർനാതഃപരമനുചിതം യത്ഖലാനാം പുരസ്താ- ദസ്താശങ്കം ജഠരപിഠരീപൂർതയേ നർതിതാസി . തത്ക്ഷന്തവ്യം സഹജസരലേ വത്സലേ വാണി കുര്യാം പ്രായശ്ചിത്തം ഗുണഗണനയാ ഗോപവേഷസ്യ വിഷ്ണോഃ .. 2.4.. അംഗുല്യഗ്രൈരരുണകിരണൈർമുക്തസംരുദ്ധരന്ധ്രം വാരം വാരം വദനമരുതാ വേണുമാപൂരയന്തം . വ്യത്യസ്താംഘ്രിം വികചകമലച്ഛായവിസ്താരനേത്രം വന്ദേ വൃന്ദാവനസുചരിതം നന്ദഗോപാലസൂനും .. 2.5.. മന്ദം മന്ദം മധുരനിനദൈർവേണുമാപൂരയന്തം വൃന്ദം വൃന്ദാവനഭുവി ഗവാം ചാരയന്തം ചരന്തം . ഛന്ദോഭാഗേ ശതമഖമുഖധ്വംസിനാം ദാനവാനാം ഹന്താരം തം കഥയ രസനേ ഗോപകന്യാഭുജംഗം .. 2.6.. വേണീമൂലേ വിരചിതഘനശ്യാമപിഞ്ഛാവചൂഡോ വിദ്യുല്ലേഖാവലയിത ഇവ സ്നിഗ്ധപീതാംബരേണ . മാമാലിംഗന്മരകതമണിസ്തംഭഗംഭീരബാഹുഃ സ്വപ്നേ ദൃഷ്ടസ്തരുണതുലസീഭൂഷണോ നീലമേഘഃ .. 2.7.. കൃഷ്ണേ ഹൃത്വാ വസനനിചയം കൂലകുഞ്ജാധിരൂഢേ മുഗ്ധാ കാചിന്മുഹുരനുനയൈഃ കിം ന്വിതി വ്യാഹരന്തീ . സഭ്രൂഭംഗം സദരഹസിതം സത്രപം സാനുരാഗം ഛായാശൗരേഃ കരതലഗതാന്യംബരാണ്യാചകർഷ .. 2.8.. അപി ജനുഷി പരസ്മിന്നാത്തപുണ്യോ ഭവേയം തടഭുവി യമുനായാസ്താദൃശോ വംശനാലഃ . അനുഭവതി യ ഏഷഃ ശ്രീമദാഭീരസൂനോ- രധരമണിസമീപന്യാസധന്യാമവസ്ഥാം .. 2.9.. അയി പരിചിനു ചേതഃ പ്രാതരംഭോജനേത്രം കബരകലിതചഞ്ചത്പിഞ്ഛദാമാഭിരാമം . വലഭിദുപലനീലം വല്ലവീഭാഗധേയം നിഖിലനിഗമവല്ലീമൂലകന്ദം മുകുന്ദം .. 2.10. അയി മുരലി മുകുന്ദസ്മേരവക്ത്രാരവിന്ദ- ശ്വസനമധുരസജ്ഞേ ത്വാം പ്രണമ്യാദ്യ യാചേ . അധരമണിസമീപം പ്രാപ്തവത്യാം ഭവത്യാം കഥയ രഹസി കർണേ മദ്ദശാം നന്ദസൂനോഃ .. 2.11. സജലജലദനീലം വല്ലവീകേലിലോലം ശ്രിതസുരതരുമൂലം വിദ്യുദുല്ലാസിചേലം . സുരരിപുകുലകാലം സന്മനോബിംബലീലം നതസുരമുനിജാലം നൗമി ഗോപാലബാലം .. 2.12.. അധരബിംബവിഡംബിതവിദ്രുമം മധുരവേണുനിനാദവിനോദിനം . കമലകോമലകമ്രമുഖാംബുജം കമപി ഗോപകുമാരമുപാസ്മഹേ .. 2.13.. അധരേ വിനിവേശ്യ വംശനാലം വിവരാണ്യസ്യ സലീലമംഗുലീഭിഃ . മുഹുരന്തരയന്മുഹുർവിവർണൻ മധുരം ഗായതി മാധവോ വനാന്തേ .. 2.14.. വദനേ നവനീതഗന്ധവാഹം വചനേ തസ്കരചാതുരീധുരീണം . നയനേ കുഹനാശ്രുമാശ്രയേഥാശ്ചരണേ കോമലതാണ്ഡവം കുമാരം .. 2.15.. അമുനാഖിലഗോപഗോപനാർഥം യമുനാരോധസി നന്ദനന്ദനേന . ദമുനാ വനസംഭവഃ പപേ നഃ കിമു നാസൗ ശരണാർഥിനാം ശരണ്യഃ .. 2.16.. ജഗദാദരണീയജാരഭാവം ജലജാപത്യവചോവിചാരഗമ്യം . തനുതാം തനുതാം ശിവേതരാണാം സുരനാഥോപലസുന്ദരം മഹോ നഃ .. 2.17.. യാ ശേഖരേ ശ്രുതിഗിരാം ഹൃദി യോഗഭാജാം പാദാംബുജേ ച സുലഭാ വ്രജസുന്ദരീണാം . സാ കാഽപി സർവജഗതാമഭിരാമസീമാ കാമായ നോ ഭവതു ഗോപകിശോരമൂർതിഃ .. 2.18.. അത്യന്തബാലമതസീകുസുമപ്രകാശം ദിഗ്വാസസം കനകഭൂഷണഭൂഷിതാംഗം . വിസ്രസ്തകേശമരുണാധരമായതാക്ഷം കൃഷ്ണം നമാമി മനസാ വസുദേവസൂനും .. 2.19.. ഹസ്താംഘ്രിനിക്വണിതകങ്കണകിങ്കിണീകം മധ്യേ നിതംബമവലംബിതഹേമസൂത്രം . മുക്താകലാപമുകുലീകൃതകാകപക്ഷം വന്ദാമഹേ വ്രജവരം വസുദേവഭാഗ്യം .. 2.20.. വൃന്ദാവനദ്രുമതലേഷു ഗവാം ഗണേഷു വേദാവസാനസമയേഷു ച ദൃശ്യതേ യത് . തദ്വേണുനാദനപരം ശിഖിപിഞ്ഛചൂഡം ബ്രഹ്മ സ്മരാമി കമലേക്ഷണമഭ്രനീലം .. 2.21.. വ്യത്യസ്തപാദമവതംസിതബർഹിബർഹം സാചീകൃതാനനനിവേശിതവേണുരന്ധ്രം . തേജഃ പരം പരമകാരുണികം പുരസ്താത് പ്രാണപ്രയാണസമയേ മമ സന്നിധത്താം .. 2.22.. ഘോഷപ്രഘോഷശമനായ മഥോഗുണേന മധ്യേ ബബന്ധ ജനനീ നവനീതചോരം . തദ്ബന്ധനം ത്രിജഗതാമുദരാശ്രയാണാമാക്രോശകാരണമഹോ നിതരാം ബഭൂവ .. 2.23.. ശൈവാ വയം ന ഖലു തത്ര വിചാരണീയം പഞ്ചാക്ഷരീജപപരാ നിതരാം തഥാപി . ചേതോ മദീയമതസീകുസുമാവഭാസം സ്മേരാനനം സ്മരതി ഗോപവധൂകിശോരം .. 2.24.. രാധാ പുനാതു ജഗദച്യുതദത്തചിത്താ മന്ഥാനമാകലയതീ ദധിരിക്തപാത്രേ . തസ്യാഃ സ്തനസ്തബകചഞ്ചലലോലദൃഷ്ടിർദേവോഽപി ദോഹനധിയാ വൃഷഭം നിരുന്ധൻ .. 2.25.. ഗോധൂലിധൂസരിതകോമലകുന്തലാഗ്രം ഗോവർധനോദ്ധരണകേലികൃതപ്രയാസം . ഗോപീജനസ്യ കുചകുങ്കുമമുദ്രിതാംഗം ഗോവിന്ദമിന്ദുവദനം ശരണം ഭജാമഃ .. 2.26.. യദ്രോമരന്ധ്രപരിപൂർതിവിധാവദക്ഷാ വാരാഹജന്മനി ബഭൂവുരമീ സമുദ്രാഃ . തം നാമ നാഥമരവിന്ദദൃശം യശോദാ പാണിദ്വയാന്തരജലൈഃ സ്നപയാം ബഭൂവ .. 2.27.. വരമിമമുപദേശമാദ്രിയധ്വം നിഗമവനേഷു നിതാന്തചാരഖിന്നഃ . വിചിനുത ഭവനേഷു വല്ലവീനാമുപനിഷദർഥമുലൂഖലേ നിബദ്ധം .. 2.28.. ദേവകീതനയപൂജനപൂതഃ പൂതനാരിചരണോദകധൗതഃ . യദ്യഹം സ്മൃതധനഞ്ജയസൂതഃ കിം കരിഷ്യതി സ മേ യമദൂതഃ .. 2.29.. ഭാസതാം ഭവഭയൈകഭേഷജം മാനസേ മമ മുഹുർമുഹുർമുഹുഃ . ഗോപവേഷമുപസേദുഷസ്സ്വയം യാപി കാപി രമണീയതാ വിഭോഃ .. 2.30.. കർണലംബിതകദംബമഞ്ജരീ കേസരാരുണകപോലമണ്ഡലം . നിർമലം നിഗമവാഗഗോചരം നീലിമാനമവലോകയാമഹേ .. 2.31.. സാചി സഞ്ചലിതലോചനോത്പലം സാമികുഡ്മലിതകോമലാധരം . വേഗവൽഗിതകരാംഗുലീമുഖം വേണുനാദരസികം ഭജാമഹേ .. 2.32.. സ്യന്ദനേ ഗരുഡമണ്ഡിതധ്വജേ കുണ്ഡിനേശതനയാധിരോപിതാ . കേനചിന്നവതമാലപല്ലവശ്യാമലേന പുരുഷേണ നീയതേ .. 2.33.. മാ യാത പാന്ഥാഃ പഥി ഭീമരഥ്യാ ദിഗംബരഃ കോഽപി തമാലനീലഃ . വിന്യസ്തഹസ്തോഽപി നിതംബബിംബേ ധൂർതസ്സമാകർഷതി ചിത്തവിത്തം .. 2.34.. രാസക്രീഡാ അംഗനാമംഗനാമന്തരേ മാധവോ മാധവം മാധവം ചാന്തരേണാംഗനാ . ഇത്ഥമാകല്പിതേ മണ്ഡലേ മധ്യഗഃ സഞ്ജഗൗ വേണുനാ ദേവകീനന്ദനഃ .. 2.35.. കേകികേകാദൃതാനേകപങ്കേരുഹാലീനഹംസാവലീഹൃദ്യതാ ഹൃദ്യതാ . കംസവംശാടവീദാഹദാവാനലഃ സഞ്ജഗൗ വേണുനാ ദേവകീനന്ദനഃ . 2.36.. ക്വാപി വീണാഭിരാരാവിണാ കമ്പിതഃ ക്വാപി വീണാഭിരാകിങ്കിണീനർതിതഃ . ക്വാപി വീണാഭിരാമന്തരം ഗാപിതഃ സഞ്ജഗൗ വേണുനാ ദേവകീനന്ദനഃ . 2.37.. ചാരുചന്ദ്രാവലീലോചനൈശ്ചുംബിതോ ഗോപഗോവൃന്ദഗോപാലികാവല്ലഭഃ . വല്ലവീവൃന്ദവൃന്ദാരകഃ കാമുകഃ സഞ്ജഗൗ വേണുനാ ദേവകീനന്ദനഃ . 2.38.. മൗലിമാലാമിലന്മത്തഭൃംഗീലതാഭീതഭീതപ്രിയാവിഭ്രമാലിംഗിതഃ . സ്രസ്തഗോപീകുചാഭോഗസമ്മേലിതഃ സഞ്ജഗൗ വേണുനാ ദേവകീനന്ദനഃ . 2.39.. ചാരുചാമീകരാഭാസഭാമാവിഭുർവൈജയന്തീലതാവാസിതോരഃസ്ഥലഃ . നന്ദവൃന്ദാവനേ വാസിതാമധ്യഗഃ സഞ്ജഗൗ വേണുനാ ദേവകീനന്ദനഃ . 2.40.. ബാലികാതാലികാതാലലീലാലയാസംഗസന്ദർശിതഭ്രൂലതാവിഭ്രമഃ . ഗോപികാഗീതദത്താവധാനസ്സ്വയം സഞ്ജഗൗ വേണുനാ ദേവകീനന്ദനഃ . 2.41.. പാരിജാതം സമുദ്ധൃത്യ രാധാവരോ രോപയാമാസ ഭാമാഗൃഹസ്യാങ്കണേ . ശീതശീതേ വടേ യാമുനീയേ തടേ സഞ്ജഗൗ വേണുനാ ദേവകീനന്ദനഃ . 2.42.. അഗ്രേ ദീർഘതരോഽയമർജുനതരുസ്തസ്യാഗ്രതോ വർതനിഃ സാ ഘോഷം സമുപൈതി തത്പരിസരേ ദേശേ കലിന്ദാത്മജാ . തസ്യാസ്തീരതമാലകാനനതലേ ചക്രം ഗവാം ചാരയൻ ഗോപഃ ക്രീഡതി ദർശയിഷ്യതി സഖേ പന്ഥാനമവ്യാഹതം .. 2.43.. ഗോധൂലിധൂസരിതകോമലഗോപവേഷം ഗോപാലബാലകശതൈരനുഗമ്യമാനം . സായന്തനേ പ്രതിഗൃഹം പശുബന്ധനാർഥം ഗച്ഛന്തമച്യുതശിശും പ്രണതോഽസ്മി നിത്യം .. 2.44.. നിധിം ലാവണ്യാനാം നിഖിലജഗദാശ്ചര്യനിലയം നിജാവാസം ഭാസാം നിരവധികനിഃശ്രേയസരസം . സുധാധാരാസാരം സുകൃതപരിപാകം മൃഗദൃശാം പ്രപദ്യേ മാംഗല്യം പ്രഥമമധിദൈവം കൃതധിയാം .. 2.45.. ആതാമ്രപാണികമലപ്രണയപ്രതോദമാലോലഹാരമണികുണ്ഡലഹേമസൂത്രം . ആവിശ്രമാംബുകണമംബുദനീലമവ്യാദാദ്യം ധനഞ്ജയരഥാഭരണം മഹോ നഃ .. 2.46.. നഖനിയമിതകണ്ഡൂൻ പാണ്ഡവസ്യന്ദനാശ്വാനനുദിനമഭിഷിഞ്ചന്നഞ്ജലിസ്ഥൈഃ പയോഭിഃ . അവതു വിതതഗാത്രസ്തോത്രനിഷ്ഠ്യൂതമൗലിർദശനവിധൃതരശ്മിർദേവകീപുണ്യരാശിഃ .. 2.47.. വ്രജയുവതിസഹായേ യൗവനോല്ലാസികായേ സകലശുഭവിലാസേ കുന്ദമന്ദാരഹാസേ . നിവസതു മമ ചിത്തം തത്പദായത്തവൃത്തം മുനിസരസിജഭാനൗ നന്ദഗോപാലസൂനൗ .. 2.48.. അരണ്യാനീമാർദ്രസ്മിതമധുരബിംബാധരസുധാ സരണ്യാ സങ്ക്രാന്തൈസ്സപദി മദയൻ വേണുനിനദൈഃ . ധരണ്യാ സാനന്ദോത്പുലകമുപഗൂഢാംഘ്രികമലഃ ശരണ്യാനാമാദ്യസ്സ ജയതു ശരീരീ മധുരിമാ .. 2.49.. വിദഗ്ധഗോപാലവിലാസിനീനാം സംഭോഗചിഹ്നാങ്കിതസർവഗാത്രം . പവിത്രമാമ്നായഗിരാമഗമ്യം ബ്രഹ്മ പ്രപദ്യേ നവനീതചോരം .. 2.50.. var De's book. Numbers retained. മുഗ്ധാം സ്നിഗ്ധാം മധുരമുരലീമാധുരീധീരനാദൈഃ കാരം കാരം കരണവിവശം ഗോകുലവ്യാകുലത്വം . ശ്യാമം കാമം യുവജനമനോമോഹനം മോഹനത്വം ചിത്തേ നിത്യം നിവസതു മഹോ വല്ലവീവല്ലഭം നഃ .. 2.50.. var അന്തർഗൃഹേ കൃഷ്ണമവേക്ഷ്യ ചോരം ബദ്ധ്വാ കവാടം ജനനീം ഗതൈകാ . ഉലൂഖലേ ദാമനിബദ്ധമേനം തത്രാപി ദൃഷ്ട്വാ സ്തിമിതാ ബഭൂവ .. 2.51.. രത്നസ്ഥലേ ജാനുചരഃ കുമാരഃ സങ്ക്രാന്തമാത്മീയമുഖാരവിന്ദം . ആദാതുകാമസ്തദലാഭഖേദാദ്വിലോക്യ ധാത്രീവദനം രുരോദ .. 2.52.. ആനന്ദേന യശോദയാ സമദനം ഗോപാംഗനാഭിശ്ചിരം സാശങ്കം ബലവിദ്വിഷാ സകുസുമൈഃ സിദ്ധൈഃ പഥി വ്യാകുലം . സേർഷ്യം ഗോപകുമാരകൈസ്സകരുണം പൗരൈർജനൈഃ സസ്മിതം യോ ദൃഷ്ടഃ സ പുനാതു നോ മുരരിപുഃ പ്രോത്ക്ഷിപ്തഗോവർധനഃ .. 2.53.. ഉപാസതാമാത്മവിദഃ പുരാണാഃ പരം പുമാംസം നിഹിതം ഗുഹായാം . വയം യശോദാശിശുബാലലീലാകഥാസുധാസിന്ധുഷു ലീലയാമഃ .. 2.54.. വിക്രേതുകാമാ കില ഗോപകന്യാ മുരാരിപാദാർപിതചിത്തവൃത്തിഃ . ദധ്യാദികം മോഹവശാദവോചദ്ഗോവിന്ദ ദാമോദര മാധവേതി .. 2.55.. ഉലൂഖലം വാ യമിനാം മനോ വാ ഗോപാംഗനാനാം കുചകുഡ്മലം വാ . മുരാരിനാമ്നഃ കലഭസ്യ നൂനമാലാനമാസീത് ത്രയമേവ ഭൂമൗ .. 2.56.. കരാരവിന്ദേന പദാരവിന്ദം മുഖാരവിന്ദേ വിനിവേശയന്തം . വടസ്യ പത്രസ്യ പുടേ ശയാനം ബാലം മുകുന്ദം മനസാ സ്മരാമി .. 2.57.. ശംഭോ സ്വാഗതമാസ്യതാമിത ഇതോ വാമേന പദ്മാസന ക്രൗഞ്ചാരേ കുശലം സുഖം സുരപതേ വിത്തേശ നോ ദൃശ്യസേ . ഇത്ഥം സ്വപ്നഗതസ്യ കൈടഭജിതശ്ശ്രുത്വാ യശോദാ ഗിരഃ കിം കിം ബാലക ജല്പസീതി രചിതം ധൂധൂകൃതം പാതു നഃ .. 2.58.. മാതഃ കിം യദുനാഥ ദേഹി ചഷകം കിം തേന പാതും പയ- സ്തന്നാസ്ത്യദ്യ കദാസ്തി വാ നിശി നിശാ കാ വാഽന്ധകാരോദയേ . ആമീല്യാക്ഷിയുഗം നിശാപ്യുപഗതാ ദേഹീതി മാതുർമുഹു- ര്വക്ഷോജാംശുകകർഷണോദ്യതകരഃ കൃഷ്ണസ്യ പുഷ്ണാതു നഃ .. 2.59.. കാലിന്ദീപുലിനോദരേഷു മുസലീ യാവദ്ഗതഃ ഖേലിതും താവത്കാർപരികം പയഃ പിബ ഹരേ വർധിഷ്യതേ തേ ശിഖാ . ഇത്ഥം ബാലതയാ പ്രതാരണപരാഃ ശൃത്വാ യശോദാഗിരഃ പായാന്നസ്സ്വശിഖാം സ്പൃശൻ പ്രമുദിതഃ ക്ഷീരേഽർധപീതേ ഹരിഃ .. 2.60.. കൈലാസേ നവനീതതി ക്ഷിതിരിയം പ്രാഗ്ജഗ്ധമൃല്ലോഷ്ടതി ക്ഷീരോദോഽപി നിപീതദുഗ്ധതി ലസത് സ്മേരേ പ്രഫുല്ലേ മുഖേ . മാത്രാഽജീർണധിയാ ദൃഢം ചകിതയാ നഷ്ടാഽസ്മി ദൃഷ്ടാഃ കയാ ധൂധൂ വത്സക ജീവ ജീവ ചിരമിത്യുക്തോഽവതാന്നോ ഹരിഃ .. 2.61.. കിഞ്ചിത്കുഞ്ചിതലോചനസ്യ പിബതഃ പര്യായപീതസ്തനം സദ്യഃ പ്രസ്നുതദുഗ്ധബിന്ദുമപരം ഹസ്തേന സമ്മാർജതഃ . മാത്രൈകാംഗുലിലാലിതസ്യ ചുബുകേ സ്മേരാനനസ്യാധരേ ശൗരേഃ ക്ഷീണകണാന്വിതാ നിപതിതാ ദന്തദ്യുതിഃ പാതു നഃ .. 2.62.. ഉത്തുംഗസ്തനമണ്ഡലോപരിലസത്പ്രാലംബമുക്താമണേ- രന്തർബിംബിതമിന്ദ്രനീലനികരച്ഛായാനുകാരിദ്യുതേഃ . ലജ്ജാവ്യാജമുപേത്യ നമ്രവദനാ സ്പഷ്ടം മുരാരേർവപുഃ പശ്യന്തീ മുദിതാ മുദോഽസ്തു ഭവതാം ലക്ഷ്മീർവിവാഹോത്സവേ .. 2.63.. കൃഷ്ണേനാംബ ഗതേന രന്തുമധുനാ മൃദ്ഭക്ഷിതാ സ്വേച്ഛയാ തഥ്യം കൃഷ്ണ ക ഏവമാഹ മുസലീ മിഥ്യാംബ പശ്യാനനം . വ്യാദേഹീതി വിദാരിതേ ശിശുമുഖേ ദൃഷ്ട്വാ സമസ്തം ജഗത് മാതാ യസ്യ ജഗാമ വിസ്മയപദം പായാത് സ നഃ കേശവഃ .. 2.64.. സ്വാതീ സപത്നീ കില താരകാണാം മുക്താഫലാനാം ജനനീതി രോഷാത് . സാ രോഹിണീ നീലമസൂത രത്നം കൃതാസ്പദം ഗോപവധൂകുചേഷു .. 2.65.. നൃത്യന്തമത്യന്തവിലോകനീയം കൃഷ്ണം മണിസ്ഥംഭഗതം മൃഗാക്ഷീ . നിരീക്ഷ്യ സാക്ഷാദിവ കൃഷ്ണമഗ്രേ ദ്വിധാ വിതേനേ നവനീതമേകം .. 2.66.. വത്സ ജാഗൃഹി വിഭാതമാഗതം ജീവ കൃഷ്ണ ശരദാം ശതം ശതം . ഇത്യുദീര്യ സുചിരം യശോദയാ ദൃശ്യമനവദനം ഭജാമഹേ .. 2.67.. ഓഷ്ഠം ജിഘ്രൻ ശിശുരിതി ധിയാ ചുംബിതോ വല്ലവീഭിഃ കണ്ഠം ഗൃഹ്ണന്നരുണിതപദം ഗാഢമാലിംഗിതാംഗഃ . ദോഷ്ണാ ലജ്ജാപദമഭിമൃശന്നങ്കമാരോപിതാത്മാ ധൂർതസ്വാമീ ഹരതു ദുരിതം ദൂരതോ ബാലകൃഷ്ണഃ .. 2.68.. ഏതേ ലക്ഷ്മണ ജാനകീവിരഹിതം മാം ഖേദയന്ത്യംബുദാ മർമാണീവ ച ഘട്ടയന്ത്യലമമീ ക്രൂരാഃ കദംബാനിലാഃ . ഇത്ഥം വ്യഹൃതപൂർവജന്മചരിതം യോ രാധയാ വീക്ഷിതഃ സേർഷ്യം ശങ്കിതയാ സ നസ്സുഖയതു സ്വപ്നായമാനോ ഹരിഃ .. 2.69.. ഓഷ്ഠം മുഞ്ച ഹരേ ബിഭേമി ഭവതാ പാനൈർഹതാ പൂതനാ കണ്ഠാശ്ലേഷമമും ജഹീഹി ദലിതാവാലിംഗനേനാർജുനൗ . മാ ദേഹി ഛുരിതം ഹിരണ്യകശിപുർനീതോ നഖൈഃ പഞ്ചതാ- മിത്ഥം വാരിതരാത്രികേലിരവതാല്ലക്ഷ്മ്യാപഹാസാദ്ധരിഃ .. 2.70.. രാമോ നാമ ബഭൂവ ഹും തദബലാ സീതേതി ഹും തൗ പിതു- ര്വാചാ പഞ്ചവടീതടേ വിഹരതസ്താമാഹരദ്രാവണഃ . നിദ്രാർഥം ജനനീ കഥാമിതി ഹരേർഹുങ്കാരതഃ ശൃണ്വതഃ സൗമിത്രേ ക്വ ധനുർധനുർധനുരിതി വ്യഗ്രാ ഗിരഃ പാതു നഃ .. 2.71.. ബാലോഽപി ശൈലോദ്ധരണാഗ്രപാണിർനീലോഽപി നീരന്ധ്രതമഃ പ്രദീപഃ . ധീരോഽപി രാധാനയനാവബദ്ധോ ജാരോഽപി സംസാരഹരഃ കുതസ്ത്വം .. 2.72.. ബാലായ നീലവപുഷേ നവകിങ്കിണീകജാലാഭിരാമജഘനായ ദിഗംബരായ . ശാർദൂലദിവ്യനഖഭൂഷണഭൂഷിതായ നന്ദാത്മജായ നവനീതമുഷേ നമസ്തേ .. 2.73.. പാണൗ പായസഭക്തമാഹിതരസം ബിഭ്രന്മുദാ ദക്ഷിണേ സവ്യേ ശാരദചന്ദ്രമണ്ഡലനിഭം ഹയ്യംഗവീനം ദധത് . കണ്ഠേ കല്പിതപുണ്ഡരീകനഖമപ്യുദ്ദാമദീപ്തിം വഹൻ ദേവോ ദിവ്യദിഗംബരോ ദിശതു നസ്സൗഖ്യം യശോദാശിശുഃ .. 2.74.. കിങ്കിണികിണികിണിരഭസൈരംഗണഭുവി രിംഗണൈഃ സദാഽടന്തം . കുങ്കുണുകുണുപദയുഗലം കങ്കണകരഭൂഷണം ഹരിം വന്ദേ .. 2.75.. സംബാധേ സുരഭീണാമംബാമായാസയന്തമനുയാന്തീം . ലംബാലകമവലംബേ തം ബാലം തനുവിലഗ്നജംബാലം .. 2.76.. അഞ്ചിതപിഞ്ഛാചൂഡം സഞ്ചിതസൗജന്യവല്ലവീവലയം . അധരമണിനിഹിതവേണും ബാലം ഗോപാലമനിശമവലംബേ .. 2.77.. പ്രഹ്ലാദഭാഗധേയം നിഗമമഹാദ്രേർഗുഹാന്തരാധേയം . നരഹരിപദാഭിധേയം വിബുധവിധേയം മമാനുസന്ധേയം .. 2.78.. സംസാരേ കിം സാരം കംസാരേശ്ചരണകമലപരിവസനം . ജ്യോതിഃ കിമന്ധകാരേ യദന്ധകാരേരനുസ്മരണം .. 2.79.. കലശനവനീതചോരേ കമലാദൃക്കുമുദചന്ദ്രികാപൂരേ . വിഹരതു നന്ദകുമാരേ ചേതോ മമ ഗോപസുന്ദരീജാരേ .. 2.80.. കസ്ത്വം ബാല ബലാനുജഃ കിമിഹ തേ മന്മന്ദിരാശങ്കയാ യുക്തം തന്നവനീതപാത്രവിവരേ ഹസ്തം കിമർഥം ന്യസേഃ . മാതഃ കഞ്ചന വത്സകം മൃഗയിതും മാ ഗാ വിഷാദം ക്ഷണാ- ദിത്യേവം വരവല്ലവീപ്രതിവചഃ കൃഷ്ണസ്യ പുഷ്ണാതു നഃ .. 2.81.. ഗോപാലാജിരകർദമേ വിഹരസേ വിപ്രാധ്വരേ ലജ്ജസേ ബ്രൂഷേ ഗോകുലഹുങ്കൃതൈഃ സ്തുതിശതൈർമൗനം വിധത്സേ വിദാം . ദാസ്യം ഗോകുലപുംശ്ചലീഷു കുരുഷേ സ്വാമ്യം ന ദാന്താത്മസു ജ്ഞാതം കൃഷ്ണ തവാംഘ്രിപങ്കജയുഗം പ്രേമ്ണാചലം മഞ്ജുലം .. 2.82.. നമസ്തസ്മൈ യശോദായാ ദായാദായാസ്തു തേജസേ . യദ്ധി രാധാമുഖാംഭോജം ഭോജം ഭോജം വ്യവർധത .. 2.83.. അവതാരാഃ സന്ത്വന്യേ സരസിജനയനസ്യ സർവതോഭദ്രാഃ . കൃഷ്ണാദന്യഃ കോ വാ പ്രഭവതി ഗോഗോപഗോപികാമുക്ത്യൈ .. 2.84.. മധ്യേ ഗോകുലമണ്ഡലം പ്രതിദിശം ചാംബാരവോജ്ജൃംഭിതേ പ്രാതർദോഹമഹോത്സവേ നവഘനശ്യാമം രണന്നൂപുരം . ഫാലേ ബാലവിഭൂഷണം കടിരണത്സത്കിങ്കിണീമേഖലം കണ്ഠേ വ്യാഘ്രനഖം ച ശൈശവകലാകല്യാണകാർത്സ്ന്യം ഭജേ .. 2.85.. സജലജലദനീലം ദർശിതോദാരലീലം കരതലധൃതശൈലം വേണുനാദൈ രസാലം . വ്രജജനകുലപാലം കാമിനീകേലിലോലം കലിതലലിതമാലം നൗമി ഗോപാലബാലം .. 2.86.. സ്മിതലലിതകപോലം സ്നിഗ്ധസംഗീതലോലം ലലിതചികുരജാലം ചൗര്യചാതുര്യലീലം . ശതമഖരിപുകാലം ശാതകുംഭാഭചേലം കുവലയദലനീലം നൗമി ഗോപാലബാലം .. 2.87.. മുരലിനിനദലോലം മുഗ്ധമായൂരചൂഡം ദലിതദനുജജാലം ധന്യസൗജന്യലീലം . പരഹിതനവഹേലം പദ്മസദ്മാനുകൂലം നവജലധരനീലം നൗമി ഗോപാലബാലം .. 2.88.. സരസഗുണനികായം സച്ചിദാനന്ദകായം ശമിതസകലമായം സത്യലക്ഷ്മീസഹായം . ശമദമസമുദായം ശാന്തസർവാന്തരായം സുഹൃദയജനദായം നൗമി ഗോപാലബാലം .. 2.89.. ലക്ഷ്മീകലത്രം ലലിതാബ്ജനേത്രം പൂർണേന്ദുവക്ത്രം പുരുഹൂതമിത്രം . കാരുണ്യപാത്രം കമനീയഗാത്രം വന്ദേ പവിത്രം വസുദേവപുത്രം .. 2.90.. മദമയമദമയദുരഗം യമുനാമവതീര്യ വീര്യശാലീ യഃ . മമ രതിമമരതിരസ്കൃതിശമനപരസ്സ ക്രിയാത് കൃഷ്ണഃ .. 2.91.. മൗലൗ മായൂരബർഹം മൃഗമദതിലകം ചാരു ലാലാടപട്ടേ കർണദ്വന്ദ്വേ ച താലീദലമതിമൃദുലം മൗക്തികം നാസികായാം . ഹാരോ മന്ദാരമാലാപരിമലഭരിതേ കൗസ്തുഭസ്യോപകണ്ഠേ പാണൗ വേണുശ്ച യസ്യ വ്രജയുവതിയുതഃ പാതു പീതാംബരോ നഃ .. 2.92.. മുരാരിണാ വാരിവിഹാരകാലേ മൃഗേക്ഷണാനാം മുഷിതാംശുകാനാം . കരദ്വയം വാ കചസംഹതിർവാ പ്രമീലനം വാ പരിധാനമാസീത് .. 2.93.. യാസാം ഗോപാംഗനാനാം ലസദസിതതരാലോലലീലാകടാക്ഷാ യന്നാസാ ചാരു മുക്താമണിരുചിനികരവ്യോമഗംഗാപ്രവാഹേ . മീനായന്തേഽപി താസാമതിരഭസചലച്ചാരുനീലാലകാന്താ ഭൃംഗായന്തേ യദംഘ്രിദ്വയസരസിരുഹേ പാതു പീതാംബരോ നഃ .. 2.94.. യദ്വേണുശ്രേണിരൂപസ്ഥിതസുഷിരമുഖോദ്ഗീർണനാദപ്രഭിന്നാ ഏണാക്ഷ്യസ്തത്ക്ഷണേന ത്രുടിതനിജപതിപ്രേമബന്ധാ ബഭൂവുഃ .. അസ്തവ്യസ്താലകാന്താഃ സ്ഫുരദധരകുചദ്വന്ദ്വനാഭിപ്രദേശാഃ കാമാവേശപ്രകർഷപ്രകടിതപുലകാഃ പാതു പീതംബരോ നഃ .. 2.95.. ദേവക്യാ ജഠരാകരേ സമുദിതഃ ക്രീതോ ഗവാം പാലിനാ നന്ദേനാനകദുന്ദുഭേർനിജസുതാപണ്യേന പുണ്യാത്മനാ . ഗോപാലാവലിമുഗ്ധഹാരതരലോ ഗോപീജനാലങ്കൃതിഃ സ്ഥേയാന്നോ ഹൃദി സന്തതം സുമധുരഃ കോഽപീന്ദ്രനീലോ മണിഃ .. 2.96.. പീഠേ പീഠനിഷണ്ണബാലകഗലേ തിഷ്ഠൻ സ ഗോപാലകോ യന്ത്രാന്തഃസ്ഥിതദുഗ്ധഭാണ്ഡമപകൃഷ്യാച്ഛാദ്യ ഘണ്ടാരവം . വക്ത്രോപാന്തകൃതാഞ്ജലിഃ കൃതശിരഃകമ്പം പിബൻ യഃ പയഃ പായാദാഗതഗോപികാനയനയോർഗണ്ഡൂഷഫൂത്കാരകൃത് .. 2.97.. യജ്ഞൈരീജിമഹേ ധനം ദദിമഹേ പാത്രേഷു നൂനം വയം വൃദ്ധാൻ ഭേജിമഹേ തപശ്ചകൃമഹേ ജന്മാന്തരേ ദുശ്ചരം . യേനാസ്മാകമഭൂദനന്യസുലഭാ ഭക്തിർഭവദ്വേഷിണീ ചാണൂരദ്വിഷി ഭക്തകല്മഷമുഷി ശ്രേയഃപുഷി ശ്രീജുഷി .. 2.98.. ത്വയി പ്രസന്നേ മമ കിം ഗുണേന ത്വയ്യപ്രസന്നേ മമ കിം ഗുണേന . രക്തേ വിരക്തേ ച വരേ വധൂനാം നിരർഥകഃ കുങ്കുമപത്രഭംഗഃ .. 2.99.. ഗായന്തി ക്ഷണദാവസാനസമയേ സാനന്ദമിന്ദുപ്രഭാ രുന്ധന്ത്യോ നിജദന്തകാന്തിനിവഹൈർഗോപാംഗനാ ഗോകുലേ . മഥ്നന്ത്യോ ദധി പാണികങ്കണഝണത്കാരാനുകാരം ജവാദ് വ്യാവൽഗദ്വസനാഞ്ജലാ യമനിശം പീതാംബരോഽവ്യാത്സ നഃ .. 2.100.. അംസാലംബിതവാമകുണ്ഡലഭരം മന്ദോന്നതഭ്രൂലതം കിഞ്ചിത്കുഞ്ചിതകോമലാധരപുടം സാചി പ്രസാരേക്ഷണം . ആലോലാംഗുലിപല്ലവൈർമുരലികാമാപൂരയന്തം മുദാ മൂലേ കല്പതരോസ്ത്രിഭംഗിലലിതം ജാനേ ജഗന്മോഹനം .. 2.101.. മല്ലൈശ്ശൈലേന്ദ്രകല്പഃ ശിശുരിതജനൈഃ പുഷ്പചാപോഽംഗനാഭി- ര്ഗോപൈസ്തു പ്രാകൃതാത്മാ ദിവി കുലിശഭൃതാ വിശ്വകായോഽപ്രമേയഃ . ക്രുദ്ധഃ കംസേന കാലോ ഭയചകിതദൃശാ യോഗിഭിർധ്യേയമൂർതിഃ ദൃഷ്ടോ രംഗാവതാരേ ഹരിരമരഗണാനന്ദകൃത് പാതു യുഷ്മാൻ .. 2.102.. സംവിഷ്ടോ മണിവിഷ്ടരേഽങ്കതലമധ്യാസീനലക്ഷ്മീമുഖേ കസ്തൂരീതിലകം മുദാ വിരചയൻ ഹർഷാത്കുചൗ സംസ്പൃശൻ . അന്യോന്യസ്മിതചന്ദ്രികാകിസലയൈരാരാധയന്മന്മഥം ഗോപീഗോപപരീവൃതോ യദുപതിഃ പായാജ്ജഗന്മോഹനഃ .. 2.103.. ആകൃഷ്ടേ വസനാഞ്ചലേ കുവലയശ്യാമാ ത്രപാധഃകൃതാ ദൃഷ്ടിഃ സംവലിതാ രുചാ കുചയുഗേ സ്വർണപ്രഭേ ശ്രീമതി . ബാലഃ കശ്ചന ചൂതപല്ലവ ഇതി പ്രാന്തസ്മിതാസ്യശ്രിയം ശ്ലിഷ്യംസ്താമഥ രുക്മിണീം നതമുഖീം കൃഷ്ണസ്സ പുഷ്ണാതു നഃ .. 2.104.. ഉർവ്യാം കോഽപി മഹീധരോ ലഘുതരോ ദോർഭ്യാം ധൃതോ ലീലയാ തേന ത്വം ദിവി ഭൂതലേ ച സതതം ഗോവർധനോദ്ധാരകഃ . ത്വാം ത്രൈലോക്യധരം വഹാമി കുചയോരഗ്രേ ന തദ്ഗണ്യതേ കിം വാ കേശവ ഭാഷണേന ബഹുനാ പുണ്യൈര്യശോ ലഭ്യതേ .. 2.105.. സന്ധ്യാവന്ദന ഭദ്രമസ്തു ഭവതോ ഭോഃ സ്നാന തുഭ്യം നമോ ഭോ ദേവാഃ പിതരശ്ച തർപണവിധൗ നാഹം ക്ഷമഃ ക്ഷമ്യതാം . യത്ര ക്വാപി നിഷീദ്യ യാദവകുലോത്തംസസ്യ കംസദ്വിഷഃ സ്മാരം സ്മാരമഘം ഹരാമി തദലം മന്യേ കിമന്യേന മേ .. 2.106.. ഹേ ഗോപാലക ഹേ കൃപാജലനിധേ ഹേ സിന്ധുകന്യാപതേ ഹേ കംസാന്തക ഹേ ഗജേന്ദ്രകരുണാപാരീണ ഹേ മാധവ . ഹേ രാമാനുജ ഹേ ജഗത്ത്രയഗുരോ ഹേ പുണ്ഡരീകാക്ഷ മാം ഹേ ഗോപീജനനാഥ പാലയ പരം ജാനാമി ന ത്വാം വിനാ .. 2.107.. കസ്തൂരീതിലകം ലലാടഫലകേ വക്ഷഃസ്ഥലേ കൗസ്തുഭം നാസാഗ്രേ നവമൗക്തികം കരതലേ വേണും കരേ കങ്കണം . സർവാംഗേ ഹരിചന്ദനം ച കലയൻ കണ്ഠേ ച മുക്താവലിം ഗോപസ്ത്രീപരിവേഷ്ടിതോ വിജയതേ ഗോപാലചൂഡാമണിഃ .. 2.108.. ലോകാനുന്മദയൻ ശ്രുതീർമുഖരയൻ ശ്രോണീരുഹാൻഹർഷയൻ ശൈലാന്വിദ്രവയൻ മൃഗാന്വിവശയൻ ഗോവൃന്ദമാനന്ദയൻ . ഗോപാൻ സംഭ്രമയൻ മുനീന്മുകുലയൻ സപ്തസ്വരാൻ ജൃംഭയൻ ഓങ്കാരാർഥമുദീരയൻ വിജയതേ വംശീനിനാദശ്ശിശോഃ .. 2.109.. .. ഇതി ശ്രീകൃഷ്ണകർണാമൃതേ ദ്വിതീയാശ്വാസഃ സമാപ്തഃ .. .. തൃതീയാശ്വാസഃ .. അസ്തി സ്വസ്ത്യയനം സമസ്തജഗതാമഭ്യസ്തലക്ഷ്മീസ്തനം വസ്തു ധ്വസ്തരജസ്തമോഭിരനിശം ന്യസ്തം പുരസ്താദിവ . ഹസ്തോദസ്തഗിരീന്ദ്രമസ്തകതരുപ്രസ്താരവിസ്താരിത- സ്രസ്തസ്വസ്തരുസൂനസംസ്തരലസത്പ്രസ്താവി രാധാസ്തുതം .. 3.1.. രാധാരാധിതവിഭ്രമാദ്ഭുതരസം ലാവണ്യരത്നാകരം സാധാരണ്യപദവ്യതീതസഹജസ്മേരാനനാംഭോരുഹം . ആലംബേ ഹരിനീലഗർവഗുരുതാസർവസ്വനിർവാപണം ബാലം വൈണവികം വിമുഗ്ധമധുരം മൂർധാഭിഷിക്തം മഹഃ .. 3.2.. കരിണാമലഭ്യഗതിവൈഭവം ഭജേ കരുണാവലംബിതകിശോരവിഗ്രഹം . യമിനാമനാരതവിഹാരി മാനസേ യമുനാവനാന്തരസികം പരം മഹഃ .. 3.3.. അതന്ത്രിതത്രിജഗദപി വ്രജാംഗനാനിയന്ത്രിതം വിപുലവിലോചനാജ്ഞയാ . നിരന്തരം മമ ഹൃദയേ വിജ്ജൃംഭതാം സമന്തതഃ സരസതരം പരം മഹഃ .. 3.4.. കന്ദർപപ്രതിമല്ലകാന്തിവിഭവം കാദംബിനീബാന്ധവം വൃന്ദാരണ്യവിലാസിനീവ്യസനിനം വേഷേണ ഭൂഷാമയം . മന്ദസ്മേരമുഖാംബുജം മധുരിമവ്യാമൃഷ്ടബിംബാധരം വന്ദേ കന്ദലിതാർദ്രയൗവനവനം കൈശോരകം ശാർങ്ഗിണഃ .. 3.5.. ആമുക്തമാനുഷമമുക്തനിജാനുഭാവ- മാരൂഢയൗവനമഗൂഢവിദഗ്ധലീലം . ആമൃഷ്ടയൗവനമനഷ്ടകിശോരഭാവ- മാദ്യം മഹഃ കിമപി മാദ്യതി മാനസേ മേ .. 3.6.. തേ തേ ഭാവാസ്സകലജഗദീലോഭനീയപ്രഭാവാഃ നാനാതൃഷ്ണാസുഹൃദി ഹൃദി മേ കാമമാവിർഭവന്തു . വീണാവേണുക്വണിതലസിതസ്മേരവക്ത്രാരവിന്ദാ- ന്നാഹം ജാനേ മധുരമപരം നന്ദപുണ്യാംബുരാശേഃ .. 3.7.. സുകൃതിഭിരാദൃതേ സരസവേണുനിനാദസുധാ- രസലഹരീവിഹാരനിരവഗ്രഹകർണപുടേ . വ്രജവരസുന്ദരീമുഖസരോരുഹസാരസികേ മഹസി കദാ നു മജ്ജതി മദീയമിദം ഹൃദയം .. 3.8.. തൃഷ്ണാതുരേ ചേതസി ജൃംഭമാണം മുഷ്ണന്മുഹുർമോഹമഹാന്ധകാരം . പുഷ്ണാതു നഃ പുണ്യദയൈകസിന്ധോഃ കൃഷ്ണസ്യ കാരുണ്യകടാക്ഷകേലിഃ .. 3.9.. നിഖിലാഗമമൗലിലാലിതം പദകമലം പരമസ്യ തേജസഃ . വ്രജഭുവി ബഹുമന്മഹേതരാം സരസകരീഷവിശേഷരൂഷിതം .. 3.10.. ഉദാരമൃദുലസ്മിതവ്യതികരാഭിരാമാനനം മുദാ മുഹുരുദീർണയാ മുനിമനോഽംബുജാമ്രേഡിതം . മദാലസവിലോചനവ്രജവധൂമുഖാസ്വാദിതം കദാ നു കമലേക്ഷണം കമപി ബാലമാലോകയേ .. 3.11.. വ്രജജനമദയോഷില്ലോചനോച്ഛിഷ്ടശേഷീ- കൃതമതിചപലാഭ്യാം ലോചനാഭ്യാമുഭാഭ്യാം . സകൃദപി പരിപാതും തേ വയം പാരയാമഃ കുവലയദലനീലം കാന്തിപൂരം കദാ നു .. 3.12.. ഘോഷയോഷിദനുഗീതയൗവനം കോമലസ്തനിതവേണുനിസ്സ്വനം . സാരഭൂതമഭിരാമസമ്പദാം ധാമ താമരസലോചനം ഭജേ .. 3.13.. ലീലയാ ലലിതയാവലംബിതം മൂലഗേഹമിവ മൂർതിസമ്പദാം . നീലനീരദവികാസവിഭ്രമം ബാലമേവ വയമാദ്രിയാമഹേ .. 3.14.. വന്ദേ മുരാരേശ്ചരണാരവിന്ദദ്വന്ദ്വം ദയാദർശിതശൈശവസ്യ . വന്ദാരുവൃന്ദാരകവൃന്ദമൗലിമന്ദാരമാലാവിനിമർദഭീരു .. 3.15.. യസ്മിൻ നൃത്യതി യസ്യ ശേഖരഭരൈഃ ക്രൗഞ്ചദ്വിഷശ്ചന്ദ്രകീ യസ്മിൻ ദൃപ്യതി യസ്യ ഘോഷസുരഭിം ജിഘ്രൻ വൃഷോ ധൂർജടേഃ . യസ്മിൻ സജ്ജതി യസ്യ വിഭ്രമഗതിം വാഞ്ഛൻ ഹരേസ്സിന്ധുര- സ്തദ്വൃന്ദാവനകല്പകദ്രുമവനം തം വാ കിശോരം ഭജേ .. 3.16.. അരുണാധരാമൃതവിശേഷിതസ്മിതം വരുണാലയാനുഗതവർണവൈഭവം . തരുണാരവിന്ദദലദീർഘലോചനം കരുണാമയം കമപി ബാലമാശ്രയേ .. 3.17.. ലാവണ്യവീചീരചിതാംഗഭൂഷാം ഭൂഷാപദാരോപിതപുണ്യബർഹാം . കാരുണ്യധാരാലകടാക്ഷമാലാം ബാലാം ഭജേ വല്ലവവംശലക്ഷ്മീം .. 3.18. മധുരൈകരസം വപുർവിഭോർമഥുരാവീഥിചരം ഭജാമഹേ . നഗരീമൃഗശാബലോചനാനാം നയനേന്ദീവരവർഷവർഷിതം .. 3.19.. പര്യാകുലേന നയനാന്തവിജൃംഭിതേന വക്ത്രേണ കോമലദരസ്മിതവിഭ്രമേണ . മന്ദ്രേണ മഞ്ജുലതരേണ ച ജല്പിതേന നന്ദസ്യ ഹന്ത തനയോ ഹൃദയം ധുനോതി .. 3.20.. കന്ദർപകണ്ഡൂലകടാക്ഷവന്ദീരിന്ദീവരാക്ഷീരഭിലാഷമാണാൻ . മന്ദസ്മിതാധാരമുഖാരവിന്ദാൻ വന്ദാമഹേ വല്ലവധൂർതപാദാൻ .. 3.21. ലീലാടോപകടാക്ഷനിർഭരപരിഷ്വംഗപ്രസംഗാധിക- പ്രീതേ ഗീതിവിഭംഗസംഗരലസദ്വേണുപ്രണാദാമൃതേ . രാധാലോചനലാലിതസ്യ ലലിതസ്മേരേ മുരാരേർമുദാ മാധുര്യൈകരസേ മുഖേന്ദുകമലേ മഗ്നം മദീയം മനഃ .. 3.22.. ശരണാഗതവ്രജപഞ്ജരേ ശരണേ ശാർങ്ഗധരസ്യ വൈഭവേ . കൃപയാ ധൃതഗോപവിഗ്രഹേ കിയദന്യന്മൃഗയാമഹേ വയം .. 3.23.. ജഗത്ത്രയൈകാന്തമനോജ്ഞഭൂമിചേതസ്യജസ്രം മമ സന്നിധത്താം . രാമാസമാസ്വാദിതസൗകുമാര്യം രാധാസ്തനാഭോഗരസജ്ഞമോജഃ .. 3.24.. വയമേതേ വിശ്വസിമഃ കരുണാകര കൃഷ്ണ കിംവദന്തീം . അപി ച വിഭോ തവ ലലിതേ ചപലതരാ മതിരിയം ബാല്യേ .. 3.25.. വത്സപാലചരഃ കോഽപി വത്സഃ ശ്രീവത്സലാഞ്ഛനഃ . ഉത്സവായ കദാ ഭാവീത്യുത്സുകേ മമ ലോചനേ .. 3.26.. മധുരിമഭരിതേ മനോഭിരാമേ മൃദുലതരസ്മിതമുദ്രിതാനനേന്ദൗ . ത്രിഭുവനനയനൈകലോഭനീയേ മഹസി വയം വ്രജഭാജി ലാലസാഃ സ്മഃ .. 3.27.. മുഖാരവിന്ദേ മകരന്ദബിന്ദുനിഷ്യന്ദലീലാമുരലീനിനാദേ . വ്രജാംഗനാപാംഗതരംഗഭൃംഗസംഗ്രാമഭൂമൗ തവ ലാലസാഃ സ്മഃ .. 3.28.. ആതാമ്രായതലോചനാംശുലഹരീലീലാസുധാപ്യായിതൈഃ ഗീതാമ്രേഡിതദിവ്യകേലിഭരിതൈഃ സ്ഫീതം വ്രജസ്ത്രീജനൈഃ . സ്വേദാംഭഃകണഭൂഷിതേന കിമപി സ്മേരേണ വക്ത്രേന്ദുനാ പാദാംഭോജമൃദുപ്രചാരസുഭഗം പശ്യാമി ദൃശ്യം മഹഃ .. 3.29.. പാണൗ വേണുഃ പ്രകൃതിസുകുമാരാകൃതൗ ബാല്യലക്ഷ്മീഃ പാർശ്വേ ബാലാഃ പ്രണയസരസാലോകിതാപാംഗലീലാഃ . മൗലൗ ബർഹം മധുരവദനാംഭോരുഹേ മൗഗ്ധ്യമുദ്രേ- ത്യാർദ്രാകാരം കിമപി കിതവം ജ്യോതിരന്വേഷയാമഃ .. 3.30.. ആരൂഢവേണുതരുണാധരവിഭ്രമേണ മാധുര്യശാലിവദനാംബുജമുദ്വഹന്തീ . ആലോക്യതാം കിമനയാ വനദേവതാ വഃ കൈശോരകേ വയസി കാപി ച കാന്തിയഷ്ടിഃ .. 3.31.. അനന്യസാധാരണകാന്തികാന്തമാക്രാന്തഗോപീനയനാരവിന്ദം . പുംസഃ പുരാണസ്യ നവം വിലാസം പുണ്യേന പൂർണേന വിലോകയിഷ്യേ .. 3.32.. സാഷ്ടാംഗപാതമഭിവന്ദ്യ സമസ്തഭാവൈഃ സർവാൻ സുരേന്ദ്രനികരാനിദമേവ യാചേ . മന്ദസ്മിതാർദ്രമധുരാനനചന്ദ്രബിംബേ നന്ദസ്യ പുണ്യനിചയേ മമ ഭക്തിരസ്തു .. 3.33.. ഏഷു പ്രവാഹേഷു സ ഏവ മന്യേ ക്ഷണോഽപി ഗണ്യഃ പുരുഷായുഷേഷു . ആസ്വാദ്യതേ യത്ര കയാപി ഭക്ത്യാ നീലസ്യ ബാലസ്യ നിജം ചരിത്രം .. 3.34.. നിസർഗസരസാധരം നിജദയാർദ്രദിവ്യേക്ഷണം മനോജ്ഞമുഖപങ്കജം മധുരസാർദ്രമന്ദസ്മിതം . രസജ്ഞഹൃദയാസ്പദം രമിതവല്ലവീലോചനം പുനഃപുനരുപാസ്മഹേ ഭുവനലോഭനീയം മഹഃ .. 3.35.. സ കോഽപി ബാലസ്സരസീരുഹാക്ഷഃ സാ ച വ്രജസ്ത്രീജനപാദധൂലിഃ . മുഹുസ്തദേതദ്യുഗലം മദീയേ മോമുഹ്യമാനോഽപി മനസ്യുദേതു .. 3.36.. മയി പ്രയാണാഭിമുഖേ ച വല്ലവീസ്തനദ്വയീദുർലലിതസ്സ ബാലകഃ . ശനൈശ്ശനൈഃ ശ്രാവിതവേണുനിസ്വനോ വിലാസവേഷേണ പുരഃ പ്രതീയതാം .. 3.37.. അതിഭൂമിമഭൂമിമേവ വാ വചസാം വാസിതവല്ലവീസ്തനം . മനസാമപരം രസായനം മധുരാദ്വൈതമുപാസ്മഹേ മഹഃ .. 3.38.. ജനനാന്തരേഽപി ജഗദേകമണ്ഡനേ കമനീയധാമ്നി കമലായതേക്ഷണേ . വ്രജസുന്ദരീജനവിലോചനാമൃതേ ചപലാനി സന്തു സകലേന്ദ്രിയാണി മേ .. 3.39.. മുനിശ്രേണീവന്ദ്യം മദഭരലസദ്വല്ലവവധൂ- സ്തനശ്രോണീബിംബസ്തിമിതനയനാംഭോജസുഭഗം . പുനഃ ശ്ലാഘാഭൂമിം പുലകിതഗിരാം നൈഗമഗിരാം ഘനശ്യാമം വന്ദേ കിമപി കമനീയാകൃതി മഹഃ .. 3.40.. അനുചുംബതാമവിചലേന ചേതസാ മനുജാകൃതേർമധുരിമശ്രിയം വിഭോഃ . അയി ദേവ കൃഷ്ണ ദയിതേതി ജല്പതാമപി നോ ഭവേയുരപി നാമ താദൃശഃ .. 3.41.. കിശോരവേഷേണ കൃശോദരീദൃശാം വിശേഷദൃശ്യേന വിശാലലോചനം . യശോദയാ ലബ്ധയശോനവാംബുധേർനിശാമയേ നീലനിശാകരം കദാ .. 3.42.. പ്രകൃതിരവതു നോ വിലാസലക്ഷ്മ്യാഃ പ്രകൃതിജഡം പ്രണതാപരാധവീഥ്യാം . സുകൃതികൃതപദം കിശോരഭാവേ സുകൃതിമനഃ പ്രണിധാനപാത്രമോജഃ .. 3.43.. അപഹസിതസുധാമദാവലേപൈരതിസുമനോഹരമാർദ്രമന്ദഹാസൈഃ . വ്രജയുവതിവിലോചനാവലേഹ്യം രമയതു ധാമ രമാവരോധനം നഃ .. 3.44.. അങ്കുരിതസ്മേരദശാവിശേഷൈരശ്രാന്തഹർഷാമൃതവർഷമക്ഷ്ണാം . സങ്ക്രീഡതാം ചേതസി ഗോപകന്യാഘനസ്തനസ്വസ്ത്യയനം മഹോ നഃ .. 3.45.. മൃഗമദപങ്കസങ്കരവിശേഷിതവന്യമഹാ- ഗിരിതടഗണ്ഡഗൈരികഘനദ്രവവിദ്രുമിതം . അജിതഭുജാന്തരം ഭജത ഹേ വ്രജഗോപവധൂ- സ്തനകലശസ്ഥലീഘുസൃണമർദനകർദമിതം .. 3.46.. ആമൂലപല്ലവിതലീലമപാംഗജാലൈരാസിഞ്ചതീ ഭുവനമാദൃതഗോപവേഷാ . ബാലാകൃതിർമൃദുലമുഗ്ധമുഖേന്ദുബിംബാ മാധുര്യസിദ്ധിരവതാന്മധുവിദ്വിഷോ നഃ .. 3.47.. വിരണൻ മണിനൂപുരം വ്രജേ ചരണാംഭോജമുപാസ്സ്വ ശാർങ്ഗിണഃ . സരസേ സരസി ശ്രിയാശ്രിതം കമലം വാ കലഹംസനാദിതം .. 3.48.. ശരണമശരണാനാം ശാരദാംഭോജനേത്രം നിരവധിമധുരിമ്ണാ നീലവേഷേണ രമ്യം . സ്മരശരപരതന്ത്രസ്മേരനേത്രാംബുജാഭി- ര്വ്രജയുവതിഭിരവ്യാദ് ബ്രഹ്മ സംവേഷ്ടിതം നഃ .. 3.49.. സുവ്യക്തകാന്തിഭരസൗരഭദിവ്യഗാത്ര- മവ്യക്തയൗവനപരീതകിശോരഭാവം . ഗവ്യാനുപാലനവിധാവനുശിഷ്ടമവ്യാ- ദവ്യാജരമ്യമഖിലേശ്വരവൈഭവം നഃ .. 3.50.. അനുഗതമമരീണാമംബരാലംബിനീനാം നയനമധുരിമശ്രീനർമനിർമാണസീമ്നാം . വ്രജയുവതിവിലാസവ്യാപൃതാപാംഗമവ്യാത് ത്രിഭുവനസുകുമാരം ദേവകൈശോരകം നഃ .. 3.51.. ആപാദമാചൂഡമതിപ്രസക്തൈരാപീയമാനാ യമിനാം മനോഭിഃ . ഗോപീജനജ്ഞാതരസാഽവതാന്നോ ഗോപലഭൂപാലകുമാരമൂർതിഃ .. 3.52.. ദിഷ്ട്യാ വൃന്ദാവനമൃഗദൃശാം വിപ്രയോഗാകുലാനാം പ്രത്യാസന്നം പ്രണയചപലാപാംഗവീചീതരംഗൈഃ . ലക്ഷ്മീലീലാകുവലയദലശ്യാമലം ധാമ കാമാൻ പുഷ്ണീയാന്നഃ പുലകമുകുലാഭോഗഭൂഷാവിശേഷം .. 3.53.. ജയതി ഗുഹശിഖീന്ദ്രപിഞ്ഛമൗലിഃ സുരഗിരിഗൈരികകല്പിതാംഗരാഗഃ . സുരയുവതിവികീർണസൂനവർഷസ്നപിതവിഭൂഷിതകുന്തലഃ കുമാരഃ .. 3.54.. മധുരമന്ദശുചിസ്മിതമഞ്ജുലം വദനപങ്കജമംഗജവേല്ലിതം . വിജയതാം വ്രജബാലവധൂജനസ്തനതടീവിലുഠന്നയനം വിഭോഃ .. 3.55.. അലസവിലസന്മുഗ്ധസ്നിഗ്ധസ്മിതം വ്രജസുന്ദരീ- മദനകദനസ്വിന്നം ധന്യം മഹദ്വദനാംബുജം . തരുണമരുണജ്യോത്സ്നാകാർത്സ്ന്യാ സ്മിതസ്നപിതാധരം ജയതി വിജയശ്രേണീമേണീദൃശാം മദയന്മഹഃ .. 3.56.. രാധാകേലികടാക്ഷവീക്ഷിതമഹാവക്ഷഃസ്ഥലീമണ്ഡനാ ജീയാസുഃ പുലകാങ്കുരാസ്ത്രിഭുവനാസ്വാദീയസസ്തേജസഃ . ക്രീഡാന്തപ്രതിസുപ്തദുഗ്ധതനയാമുഗ്ധാവബോധക്ഷണ- ത്രാസാരൂഢദൃഢോപഗൂഹനമഹാസാമ്രാജ്യസാന്ദ്രശ്രിയഃ .. 3.57.. സ്മിതസ്നുതസുധാധരാ മദശിഖണ്ഡിബർഹാങ്കിതാ വിശാലനയനാംബുജാ വ്രജവിലാസിനീവാസിതാഃ . മനോജ്ഞമുഖപങ്കജാ മധുരവേണുനാദദ്രവാ ജയന്തി മമ ചേതസശ്ചിരമുപാസിതാ വാസനാഃ .. 3.58.. ജീയാദസൗ ശിഖിശിഖണ്ഡകൃതാവതംസാ സാംസിദ്ധികീ സരസകാന്തിസുധാസമൃദ്ധിഃ . യദ്ബിന്ദുലേശകണീകാപരിണാമഭാഗ്യാത് സൗഭാഗ്യസീമപദമഞ്ചതി പഞ്ചബാണഃ .. 3.59.. ആയാമേന ദൃശോർവിശാലതരയോരക്ഷയ്യമാർദ്രസ്മിത- ച്ഛായാധർഷിതശാരദേന്ദുലലിതം ചാപല്യമാത്രം ശിശോഃ . ആയാസാനപരാന്വിധൂയ രസികൈരാസ്വാദ്യമാനം മുഹു- ര്ജീയാദുന്മദവല്ലവീകുചഭരാധാരം കിശോരം മഹഃ .. 3.60.. സ്കന്ധാവാരസദോ വ്രജഃ കതിപയേ ഗോപാസ്സഹായാദയഃ സ്കന്ധാലംബിനി വത്സദാമ്നി ധനദാ ഗോപാംഗനാഃ സ്വാംഗനാഃ . ശൃംഗാരാ ഗിരിഗൈരികം ശിവ ശിവ ശ്രീമന്തി ബർഹാണി ച ശൃംഗഗ്രാഹികയാ തഥാപി തദിദം പ്രാഹുസ്ത്രിലോകേശ്വരം .. 3.61.. ശ്രീമദ്ബർഹിശിഖണ്ഡമണ്ഡനജുഷേ ശ്യാമാഭിരാമത്വിഷേ ലാവണ്യൈകരസാവസിക്തവപുഷേ ലക്ഷ്മീസരഃപ്രാവൃഷേ . ലീലാകൃഷ്ടരസജ്ഞധർമമനസേ ലീലാമൃതസ്രോതസേ കേ വാ ന സ്പൃഹയന്തി ഹന്ത മഹസേ ഗോപീജനപ്രേയസേ .. 3.62.. ആപാടലാധരമധീരവിലോലനേത്ര- മാമോദനിർഭരിതമദ്ഭുതകാന്തിപൂരം . ആവിസ്മിതാമൃതമനുസ്മൃതിലോഭനീയ- മാമുദ്രിതാനനമഹോ മധുരം മുരാരേഃ .. 3.63.. ജാഗൃഹി ജാഗൃഹി ചേതശ്ചിരായ ചരിതാർഥായ ഭവതഃ . അനുഭൂയതാമിദമിദം പുരഃ സ്ഥിതം പൂർണനിർവാണം .. 3.64.. ചരണയോരരുണം കരുണാർദ്രയോഃ കചഭരേ ബഹുലം വിപുലം ദൃശോഃ . വപുഷി മഞ്ജുലമഞ്ജനമേചകേ വയസി ബാലമഹോ മധുരം മഹഃ .. 3.65.. മാലാബർഹമനോജ്ഞകുന്തലഭരാം വന്യപ്രസൂനോക്ഷിതാം ശൈലേയദ്രവകൢപ്തചിത്രതിലകാം ശശ്വന്മനോഹാരിണീം ലീലാവേണുരവാമൃതൈകരസികാം ലാവണ്യലക്ഷ്മീമയീം ബാലാം ബാലതമാലനീലവപുഷം വന്ദേ പരാം ദേവതാം .. 3.66.. ഗുരു മൃദുപദേ ഗൂഢം ഗുൽഫേ ഘനം ജഘനസ്തലേ നലിനമുദരേ ദീർഘം ബാഹ്വോർവിശാലമുരസ്ഥലേ . മധുരമധരേ മുഗ്ധം വക്ത്രേ വിലാസി വിലോചനേ ബഹു കചഭരേ വന്യം വേഷേ മനോജ്ഞമഹോ മഹഃ .. 3.67.. ജിഹാനം ജിഹാനം സുജാനേന മൗഗ്ധ്യം ദുഹാനം ദുഹാനം സുധാം വേണുനാദൈഃ . ലിഹാനം ലിഹാനം സുധീർഘൈരപാംഗൈർമഹാനന്ദസർവസ്വമേതന്നമസ്താത് .. 3.68.. ലസദ്ബർഹാപീഡം ലലിതലലിതസ്മേരവദനം ഭ്രമത്ക്രീഡാപാംഗം പ്രണതജനതാനിർവൃതിപദം . നവാംഭോദശ്യാമം നിജമധുരിമാഭോഗഭരിതം പരം ദേവം വന്ദേ പരിമിലിതകൈശോരകരസം .. 3.69.. സാരസ്യസാമഗ്ര്യമിവാനനേന മാധുര്യചാതുര്യമിവ സ്മിതേന . കാരുണ്യതാരുണ്യമിവേക്ഷിതേന ചാപല്യസാഫല്യമിദം ദൃശോർമേ .. 3.70.. യത്ര വാ തത്ര വാ ദേവ യദി വിശ്വസിമസ്ത്വയി . നിർവാണമപി ദുർവാരമർവാചീനാനി കിം പുനഃ .. 3.71.. രാഗാന്ധഗോപീജനവന്ദിതാഭ്യാം യോഗീന്ദ്രഭൃംഗേന്ദ്രനിഷേവിതാഭ്യാം . ആതാമ്രപങ്കേരുഹവിഭ്രമാഭ്യാം സ്വാമിൻ പദാഭ്യാമയമഞ്ജലിസ്തേ .. 3.72.. അർധാനുലാപാന്വ്രജസുന്ദരീണാമകൃത്രിമാണാഞ്ച സരസ്വതീനാം . ആർദ്രാശയേന ശ്രവണാഞ്ചലേന സംഭാവയന്തം തരുണം ഗൃണീമഃ .. 3.73.. മനസി മമ സന്നിധത്താം മധുരമുഖാ മന്ഥരാപാംഗാ . കരകലിതലലിതവംശാ കാപി കിശോരീ കൃപാ ലഹരീ .. 3.74.. രക്ഷന്തു നഃ ശിക്ഷിതപാശുപാല്യാ ബാല്യാവൃതാ ബർഹിശിഖാവതംസാഃ . പ്രാണപ്രിയാഃ പ്രസ്തുതവേണുഗീതാഃ ശീതാ ദൃശോഃ ശീതലഗോപകന്യാഃ .. 3.75.. സ്മിതസ്തബകിതാധരം ശിശിരവേണുനാദാമൃതം മുഹുസ്തരലലോചനം മദകടാക്ഷമാലാകുലം . ഉരസ്ഥലവിലീനയാ കമലയാ സമാലിംഗിതം ഭുവസ്തലമുപാഗതം ഭുവനദൈവതം പാതു നഃ .. 3.76.. നയനാംബുജേ ഭജത കാമദുഘം ഹൃദയാംബുജേ കിമപി കാരുണികം . ചരണാംബുജേ മുനികുലൈകധനം വദനാംബുജേ വ്രജവധൂവിഭവം .. 3.77.. നിർവാസനം ഹന്ത രസാന്തരാണാം നിർവാണസാമ്രാജ്യമിവാവതീർണം . അവ്യാജമാധുര്യമഹാനിധാനമവ്യാദ്വ്രജാനാമധിദൈവതം നഃ .. 3.78.. ഗോപീനാമഭിമതഗീതവേഷഹർഷാദാപീനസ്തനഭരനിർഭരോപഗൂഢം . കേലീനാമവതു രസൈരുപാസ്യമാനം കാലിന്ദീപുലിനചരം പരം മഹോ നഃ .. 3.79.. ഖേലതാം മനസി ഖേചരാംഗനാമാനനീയമൃദുവേണുനിസ്വനൈഃ . കാനനേ കിമപി നഃ കൃപാസ്പദം കാലമേഘകലഹോദ്വഹം മഹഃ .. 3.80.. ഏണീശാബവിലോചനാഭിരലസശ്രോണീഭരപ്രൗഢിഭി- ര്വേണീഭൂതരസക്രമാഭിരഭിതശ്ശ്രേണീകൃതാഭിർവൃതഃ . പാണീ ദ്വൗ ച വിനോദയൻ രതിപതേസ്തൂണീശയൈസ്സായകൈ- ര്വാണീനാമപദം പരം വ്രജജനക്ഷോണീപതിഃ പാതു നഃ .. 3.81. കാലിന്ദീപുലിനേ തമാലനിബിഡച്ഛായേ പുരഃസഞ്ചരത് തോയേ തോയജപത്രപാത്രനിഹിതം ദധ്യന്നമശ്നാതി യഃ . വാമേ പാണിതലേ നിധായ മധുരം വേണും വിഷാണം കടി- പ്രാന്തേ ഗാശ്ച വിലോകയൻ പ്രതികലം തം ബാലമാലോകയേ .. 3.82.. യദ്ഗോപീവദനേന്ദുമണ്ഡനമഭൂത് കസ്തൂരികാപത്രകം യല്ലക്ഷ്മീകുചശാതകുംഭകലശവ്യാകോശമിന്ദീവരം . യന്നിർവാണനിധാനസാധനവിധൗ സിദ്ധാഞ്ജനം യോഗിനാം തന്നഃ ശ്യാമലമാവിരസ്തു ഹൃദയേ കൃഷ്ണാഭിധാനം മഹഃ .. 3.83. ഫുല്ലേന്ദീവരകാന്തിമിന്ദുവദനം ബർഹാവതംസപ്രിയം ശ്രീവത്സാങ്കമുദാരകൗസ്തുഭധരം പീതാംബരം സുന്ദരം . ഗോപീനാം നയനോത്പലാർചിതതനും ഗോഗോപസംഘാവൃതം ഗോവിന്ദം കലവേണുനാദനിരതം ദിവ്യാംഗഭൂഷം ഭജേ .. 3.84.. യന്നാഭീസരസീരുഹാന്തരപുടേ ഭൃംഗായമാനോ വിധി- ര്യദ്വക്ഷഃ കമലാവിലാസസദനം യച്ചക്ഷുഷീ ചേന്ദ്വിനൗ . യത്പാദാബ്ജവിനിഃസൃതാ സുരനദീ ശംഭോഃ ശിരോഭൂഷണം യന്നാമസ്മരണം ധുനോതി ദുരിതം പായാത് സ നഃ കേശവഃ .. 3.85.. രക്ഷന്തു ത്വാമസിതജലജൈരഞ്ജലിഃ പാദമൂലേ മീനാ നാഭീസരസി ഹൃദയേ മാരബാണാഃ മുരാരേഃ . ഹാരാഃ കണ്ഠേ ഹരിമണിമയാ വക്ത്രപദ്മേ ദ്വിരേഫാഃ പിഞ്ഛാചൂഡാശ്ചികുരനിചയേ ഘോഷയോഷിത്കടാക്ഷാഃ .. 3.86.. ദധിമഥനനിനാദൈസ്ത്യക്തനിദ്രഃ പ്രഭാതേ നിഭൃതപദമഗാരം വല്ലവീനാം പ്രവിഷ്ടഃ . മുഖകമലസമീരൈരാശു നിർവാപ്യ ദീപാൻ കബലിതനവനീതഃ പാതു ഗോപാലബാലഃ .. 3.87.. പ്രാതഃ സ്മരാമി ദധിഘോഷവിനീതനിദ്രം നിദ്രാവസാനരമണീയമുഖാരവിന്ദം . ഹൃദ്യാനവദ്യവപുഷം നയനാഭിരാമ- മുന്നിദ്രപദ്മനയനം നവനീതചോരം .. 3.88.. ഫുല്ലഹല്ലകവതംസകോല്ലസദ്ഗല്ലമാഗമഗവീഗവേഷിതം . വല്ലവീചികുരവാസിതാംഗുലീപല്ലവം കമപി വല്ലവം ഭജേ .. 3.89.. സ്തേയം ഹരേർഹരതി യന്നവനീതചൗര്യം ജാരത്വമസ്യ ഗുരുതല്പകൃതാപരാധം . ഹത്യാം ദശാനനഹതിർമധുപാനദോഷം യത്പൂതനാസ്തനപയഃ സ പുനാതു കൃഷ്ണഃ .. 3.90.. മാര മാ വസ മദീയമാനസേ മാധവൈകനിലയേ യദൃച്ഛയാ . ശ്രീരമാപതിരിഹാഗമേദസൗ കഃ സഹേത നിജവേശ്മലംഘനം .. 3.91.. ആകുഞ്ചിതം ജാനു കരം ച വാമം ന്യസ്യ ക്ഷിതൗ ദക്ഷിണഹസ്തപദ്മേ . ആലോകയന്തം നവനീതഖണ്ഡം ബാലം മുകുന്ദം മനസാ സ്മരാമി .. 3.92.. ജാനുഭ്യാമഭിധാവന്തം പാണിഭ്യാമതിസുന്ദരം . സുകുന്തലാലകം ബാലം ഗോപാലം ചിന്തയേദുഷഃ .. 3.93.. വിഹായ കോദണ്ഡശരൗ മുഹൂർതം ഗൃഹാണ പാണൗ മണിചാരുവേണും . മായൂരബർഹം ച നിജോത്തമാംഗേ സീതാപതേ ത്വാം പ്രണമാമി പശ്ചാത് .. 3.94.. അയം ക്ഷീരാംഭോധേഃ പതിരിതി ഗവാം പാലക ഇതി ശ്രിതോഽസ്മാഭിഃ ക്ഷീരോപനയനധിയാ ഗോപതനയഃ . അനേന പ്രത്യൂഹോ വ്യരചി സതതം യേന ജനനീ- സ്തനാദപ്യസ്മാകം സകൃദപി പയോ ദുർലഭമഭൂത് .. 3.95.. ഹസ്തമാക്ഷിപ്യ യാതോഽസി ബലാത്കൃഷ്ണ കിമദ്ഭുതം . ഹൃദയാദ്യദി നിര്യാസി പൗരുഷം ഗണയാമി തേ .. 3.96.. തമസി രവിരിവോദ്യന്മജ്ജതാമംബുരാശൗ പ്ലവ ഇവ തൃഷിതാനാം സ്വാദുവർഷീവ മേഘഃ . നിധിരിവ വിധനാനാം ദീർഘതീവ്രാമയാനാം ഭിഷഗിവ കുശലം നോ ദാതുമായാതു ശൗരിഃ .. 3.97.. കോദണ്ഡം മസൃണം സുഗന്ധി വിശിഖം ചക്രാബ്ജപാശാങ്കുശം ഹൈമീം വേണുലതാം കരൈശ്ച ദധതം സിന്ദൂരപുഞ്ജാരുണം . കന്ദർപാധികസുന്ദരം സ്മിതമുഖം ഗോപാംഗനാവേഷ്ടിതം ഗോപാലം സതതം ഭജാമി വരദം ത്രൈലോക്യരക്ഷാമണിം .. 3.98.. സായങ്കാലേ വനാന്തേ കുസുമിതസമയേ സൈകതേ ചന്ദ്രികായാം ത്രൈലോക്യാകർഷണാംഗം സുരനരഗണികാമോഹനാപാംഗമൂർതിം . സേവ്യം ശൃംഗാരഭാവൈർനവരസഭരിതൈർഗോപകന്യാസഹസ്രൈ- ര്വന്ദേഽഹം രാസകേലീരതമതിസുഭഗം വശ്യഗോപാലകൃഷ്ണം .. 3.99.. കദംബമൂലേ ക്രീഡന്തം വൃന്ദാവനനിവേശിതം . പദ്മാസനസ്ഥിതം വന്ദേ വേണും ഗായന്തമച്യുതം .. 3.100.. ബാലം നീലാംബുദാഭം നവമണിവിലസത് കിങ്കിണീജാലബദ്ധ- ശ്രോണീജംഘാന്തയുഗ്മം വിപുലരുരുനഖപ്രോല്ലസത്കണ്ഠഭൂഷം . ഫുല്ലാംഭോജാഭവക്ത്രം ഹതശകടമരുത് പൂതനാദ്യം പ്രസന്നം ഗോവിന്ദം വന്ദിതേന്ദ്രാദ്യമരവരമജം പൂജയേദ്വാസരാദൗ .. 3.101.. വന്ദ്യം ദേവൈർമുകുന്ദം വികസിതകുരുവിന്ദാഭമിന്ദീവരാക്ഷം ഗോഗോപീവൃന്ദവീതം ജിതരിപുനിവഹം കുന്ദമന്ദാരഹാസം . നീലഗ്രീവാഗ്രപിഞ്ഛാകലനസുവിലസത്കുന്തലം ഭാനുമന്തം ദേവം പീതാംബരാഢ്യം ജപ ജപ ദിനശോ മധ്യമാഹ്നേ രമായൈ .. 3.102.. ചക്രാന്തധ്വസ്തവൈരിവ്രജമജിതമപാസ്താവനീഭാരമാദ്യൈ- രാവീതം നാരദാദ്യൈർമുനിഭിരഭിനുതം തത്വനിർണീതിഹേതോഃ . സായാഹ്നേ നിർമലാംഗം നിരുപമരുചിരം ചിന്തയേന്നീലഭാസം രാത്രൗ വിശ്വോദയസ്ഥിത്യപഹരണപദം മുക്തിദം വാസുദേവം .. 3. 103.. കോദണ്ഡമൈക്ഷവമഖണ്ഡമിഷും ച പൗഷ്പം ചക്രാബ്ജപാശസൃണികാഞ്ചനവംശനാലം . വിഭ്രാണമഷ്ടവിധബാഹുഭിരർകവർണം ധ്യായേദ്ധരിം മദനഗോപവിലാസവേഷം .. 3.104.. അംഗുല്യാഃ കഃ കവാടം പ്രഹരതി കുടിലേ മാധവഃ കിം വസന്തോ നോ ചക്രീ കിം കുലാലോ ന ഹി ധരണിധരഃ കിം ദ്വിജിഹ്വഃ ഫണീന്ദ്രഃ . നാഹം ഘോരാഹിമർദീ കിമസി ഖഗപതിർനോ ഹരിഃ കിം കപീന്ദ്രഃ ഇത്യേവം ഗോപകന്യാപ്രതിവചനജിതഃ പാതു വശ്ചക്രപാണിഃ .. 3.105.. രാധാമോഹനമന്ദിരാദുപഗതശ്ചന്ദ്രാവലീമൂചിവാൻ രാധേ ക്ഷേമമയേഽസ്തി തസ്യ വചനം ശ്രുത്വാഽഽഹ ചന്ദ്രാവലീ . കംസ ക്ഷേമമയേ വിമുഗ്ധഹൃദയേ കംസഃ ക്വ ദൃഷ്ടസ്ത്വയാ രാധാ ക്വേതി വിലജ്ജിതോ നതമുഖഃ സ്മേരോ ഹരിഃ പാതു വഃ .. 3.106.. യാ പ്രീതിർവിദുരാർപിതേ മുരരിപോ കുന്ത്യർപിതേ യാദൃശീ യാ ഗോവർധനമൂർധ്നി യാ ച പൃഥുകേ സ്തന്യേ യശോദാർപിതേ . ഭാരദ്വാജസമർപിതേ ശബരികാദത്തേഽധരേ യോഷിതാം യാ പ്രീതിർമുനിപത്നിഭക്തിരചിതേഽപ്യത്രാപി താം താം കുരു .. 3.107.. കൃഷ്ണാനുസ്മരണാദേവ പാപസംഘാതപഞ്ചരഃ . ശതധാ മോഘമായാതി ഗിരിർവജ്രഹതോ യഥാ .. 3.108.. യസ്യാത്മഭൂതസ്യ ഗുരോഃ പ്രസാദാദഹം വിമുക്തോഽസ്മി ശരീരബന്ധാത് . സർവോപദേഷ്ടുഃ പുരുഷോത്തമസ്യ തസ്യാംഘ്രിപദ്മം പ്രണതോഽസ്മി നിത്യം .. 3.109.. .. ഇതി ശ്രീകൃഷ്ണകർണാമൃതേ തൃതീയാശ്വാസഃ സമാപ്തഃ .. .. ഇതി ശ്രീകൃഷ്ണകർണാമൃതം സമാപ്തം .. Poet Bilwamangala (Leelashuka) lived during 1220-1300 AD. In the early days, he was very mu involved in a dasi by name Chintamani; once she told him that if he diverted even one percent of the attention he gave to her to Lord Krishna, he would attain salvation. This statement changed him completely, he became an ardent devotee of Lord Krishna, and obtained mukti throu his Guru Somagiri. He composed shrI Krishnakarnamrtam, beginning wi the words `Chintamanirjayati.' It contains three AshvAsas (chapters), and a total of 328 shlokas, (wi the addition of the extra slokas, the number of slokas will be: 112+109+112=333) ea one depicting an incident in the story of Krishna. The poem is full of literary beauties, and tongue-twisting alliterations, and many of the shlokas are well-known. There is another version in the South. Fed up wi his relations wi the dasi, his wife makes him promise in front of the Lord that hencefor he will not tou another woman. In front of the Lord, he promisesd `Henceforth, I will not tou any woman' and immediately left his wife and home and became a Krishna devotee.) Notes : AshvAsa 1 : In the book edited by Sri Sushil Kumar De (Bengal version), there are 112 slokas in the 1st AshvAsa. shloka No.100 (mandAramUle) in this version has been omitted. 3 extra slokas have been included in De's book as under: 1 കിമിദമധരവീഥീകൢപ്തവംശീനിനാദം കിരതി നയനയോർനഃ കാമപി പ്രേമധാരാം . തദിദമമരവീഥീദുർലഭം വല്ലഭം നഃ ത്രിഭുവനകമനീയം ദൈവതം ജീവിതം ച .. - as shloka 72 2 ധന്യാനാം സരസാനുലാപസരണീസൗരഭ്യമഭ്യസ്യതാം കർണാനാം വിവരേഷു കാമപി സുധാവൃഷ്ടിം ദുഹാനം മുഹുഃ . വന്യാനാം സുദൃശാം മനോനയനയോർമഗ്നസ്യ ദേവസ്യ നഃ കർണാനാം വചസാം വിജൃംഭിതമഹോ കൃഷ്ണസ്യ കർണാമൃതം .. - as shloka 111 3 അനുഗ്രഹദ്വിഗുണവിശാലലോചനൈരനുസ്മരൻ മൃദുമുരലീരവാമൃതൈഃ . യതോ യതഃ പ്രസരതി മേ വിലോചനം തതസ്തതഃ സ്ഫുരതു തവൈവ വൈഭവം .. - as sloka 112 The resultant AshvAsa will have 112 slokas. AshsvAsa 2 : 1 : In the book edited by Sri Sushil Kumar De (Bengal version), there are 110 slokas in the 2nd AshvAsa. The extra shloka in the book is as under: മുഗ്ധാം സ്നിഗ്ധാം മധുരമുരലീമാധുരീധീര-നാദൈഃ കാരം കാരം കരണവിവശം ഗോകുലവ്യാകുലത്വം . ശ്യാമം കാമം യുവജനമനോമോഹനം മോഹനത്വം ചിത്തേ നിത്യം നിവസതുമഹോ വല്ലവീ-വല്ലഭം നഃ .. included as shloka 50. AshvAsa 3: Doubtful portions are in shlokas 25, 59 and 73 above.  $1 % Text title : kRiShNakarNAmRitam % File name : kkarna.itx % itxtitle : kRiShNakarNAmRitam % engtitle : kRiShNakarNAmRitam.h % Category : vishhnu, krishna, vishnu % Location : doc_vishhnu % Sublocation : vishhnu % SubDeity : krishna % Texttype : pramukha % Author : Kavi Bilvamangala (Lilasuka) % Language : Sanskrit % Subject : hinduism % Transliterated by : P. P. Narayanaswami (swami at math.mun.ca) % Proofread by : P. P. Narayanaswami (swami at math.mun.ca), PSA EASWARAN psaeaswaran at gmail.com % Indexextra : (Scanned 1 2 Bengali, 3 Bengali, 4) % Latest update : May 23, 2012 % Send corrections to : Sanskrit@cheerful.com % Site access : https://sanskritdocuments.org  This text is prepared by volunteers and is to be used for personal study and research. The file is not to be copied or reposted for promotion of any website or individuals or for commercial purpose without permission. Please help to maintain respect for volunteer spirit.