🌸🌸പ്രാരാബ്ദം തെളിയുമ്പോൾ അറിവും തെളിയുന്നു 🌸🌸 അറിവ് ഒരാളിൽ കുറവില്ലാതെ ഉണ്ടായേക്കാം. പക്ഷേ പ്രാരാബ്ദം കണ്ണുതുറക്കാതെ ഇരുന്നാൽ ആ അറിവ് എന്നും മൗനത്തിലായിരിക്കും. എണ്ണയും തിരിയും എല്ലാം തയ്യാറായിട്ടുണ്ടെങ്കിലും തീപ്പെട്ടി കാണാതായാൽ വിളക്ക് വെറും അലങ്കാരമാകുന്നതു പോലെയാണത്. കാലം അനുകൂലമാകുമ്പോഴാണ് വിദ്യയ്ക്ക് ശബ്ദവും വെളിച്ചവും കിട്ടുന്നത്. അതുവരെയും അറിവ് ഉണ്ടെന്ന് പറഞ്ഞിട്ട് കാര്യമില്ല. സന്ദർഭം വരുമ്പോൾ സ്വ ജീവിതത്തിൽ പോലും അതിനെ ഉപയോഗിക്കാൻ ആകാതെ പോകും. അപ്പോൾ ആ അറിവ് വിറകിനുള്ളിലെ അഗ്നിയെപ്പോലെ ചൂടുണ്ടെങ്കിലും, പുറത്തു തീയായി തെളിയാതെ കിടക്കും. അറിവുണ്ടെന്ന ആത്മവിശ്വാസത്തിൽ എടുത്ത ചില തീരുമാനങ്ങൾ പിന്നീടു നോക്കുമ്പോൾ ചെറിയതും അല്പത്തരമുള്ളതുമായതായി തോന്നും. നേർവഴി മുന്നിലുണ്ടായിട്ടും അബദ്ധവഴികളിലൂടെയാണ് കാൽവെപ്പ് ഉണ്ടാകുക. യാത്ര തുടങ്ങുമ്പോൾ എല്ലാം മനോഹരമായി തോന്നും; പക്ഷേ മുന്നോട്ട് പോകുന്തോറും ആ സൗകര്യങ്ങൾ തന്നെ ദുഃഖങ്ങളായി തീരും. ഇങ്ങനെ ഓടിക്കൊണ്ടിരിക്കുന്ന ജീവിതത്തിൽ ഒരുനാൾ കാലം വഴിമാറുന്നു. അന്നാണ് ജീവൻ സത്യം തിരിച്ചറിയുന്നത്. അതുവരെ ചെയ്തുകൂട്ടിയ കർമ്മങ്ങളുടെ പാദചിഹ്നങ്ങൾ പിന്നിലുണ്ടാകും — ചിലത് ഓർമ്മകളായി, ചിലത് വേദനകളായി, ചിലത് തിരിച്ചറിവുകളായി. 🌹🌹🌹🌹