ശ്രീമദ് വാല്മീകി രാമായണം - ശ്ലോകം 5

ശ്രീരസ്തു പഠനോത്സുകതാം വീക്ഷ്യ പരമാ തുഷ്ടിരസ്തി മേ സർവ്വേ കവിത്വം സമ്പ്രാപ്യ കുർവ്വന്തു രചനാം സ്വയം. ശ്ലോകം 5 വാല്മീകിമഹർഷി ചോദ്യങ്ങൾ ഉപസംഹരിച്ചുകൊണ്ട് പറയുന്നതു കേൾക്കാം. ഏതദിച്ഛാമ്യഹം ശ്രോതും പരം കൗതൂഹലം ഹി മേ മഹർഷേ ത്വം സമർത്ഥോfസി ജ്ഞാതുമേവംവിധം നരം പദച്ഛേദം ഏതദ് ഇച്ഛാമി അഹം ശ്രോതും പരം കൗതൂഹലം ഹി മേ മഹർഷേ! ത്വം സമർത്ഥ: അസി ജ്ഞാതും ഏവം-വിധം നരം. പദവിശ്ലേഷണം ഏതദ് - സർവ്വനാമം ദ.ന.ദ്വി.ഏ. = ഈ ഇച്ഛാമി - ഇഷ് കർത്തരി - ലട്.ഉ.ഏ. = (ഞാൻ) ആഗ്രഹിക്കുന്നു അഹം - സർവ്വനാമം ദ.പ്ര.ഏ. = ഞാൻ (വാല്മീകി) ശ്രോതും - അവ്യയം (തുമുന്നന്തം) = കേൾക്കുവാൻ പരം - അ.ന.പ്ര.ഏ. = ഏറ്റവുമധികം കൗതൂഹലം - അ.ന.പ്ര.ഏ. = കൗതുകം, ആഗ്രഹം ഹി - അവ്യയം (യസ്മാദിത്യർത്ഥകം) = എന്തുകൊണ്ടെന്നാൽ മേ - സർവ്വനാമം ദ.ഷ.ഏ. = (മമ/മേ) എൻറെ മഹർഷേ - ഇ.പു.സം.(സംബോധനാ പ്രഥമാ) ഏ. ത്വം - സർവ്വനാമം ദ.പ്ര.ഏ. = അങ്ങുന്ന് (നീ) സമർത്ഥ: - അ.പു.പ്ര.ഏ. = കഴിവുള്ളവൻ അസി - അസ് കർത്തരി ലട്.മപു.ഏവ. = (നീ) ആകുന്നു. ജ്ഞാതും - അവ്യയം (തുമുന്നന്തം) = അറിയുവാൻ ഏവംവിധം - അ.പു.ദ്വി.ഏ. = ഇപ്രകാരത്തിലെല്ലാം നരം - അ.പു.ദ്വി.ഏ. = മനുഷ്യനെ അന്വയം മഹർഷേ! അഹം ഏതത് ശ്രോതും ഇച്ഛാമി, ഹി മേ പരം കൗതൂഹലം (അസ്തി). ത്വം (ച) ഏവംവിധം നരം ജ്ഞാതും സമർത്ഥ: അസി. അന്വയാർത്ഥം/സാരം അല്ലയോ നാരദമഹർഷേ! ഞാനിതറിയുവാൻ ആഗ്രഹിക്കുന്നു. എന്തെന്നാൽ എനിക്കതിന് വലിയ കൗതുകമുണ്ട്. അങ്ങാണെങ്കിൽ ഇപ്രകാരം ഗുണവിശേഷങ്ങളുള്ള ആളെ അറിയുവാൻ കഴിവുള്ളവനുമാണല്ലോ. സംസ്കൃതേ ഭാവാർത്ഥ:  ഹേ മഹർഷേ നാരദ! യതശ്ച ഏതത് സർവ്വം ജ്ഞാതും മേ മനസി മഹതീ ഉത്കണ്ഠാ വിദ്യതേ. ത്വം ച മമ ജിജ്ഞാസിതം ഗുണസമ്പന്നം തം പുരുഷം ജ്ഞാതും സർവ്വഥാ സമർത്ഥ: അസി. (അത: ത്വത്ത:) ശ്രോതുമിച്ഛാമി. വിശേഷശ്രദ്ധയ്ക്ക് 1. നാരദമഹർഷി ത്രിലോകങ്ങളിലും സഞ്ചരിക്കുന്ന ആളാണല്ലോ. അതുകൊണ്ടാണ് "ത്വം ഏവംവിധം നരം ജ്ഞാതും സമർത്ഥ: അസി." എന്നു പറഞ്ഞത്. നിരവധി മഹാപുരുഷന്മാരെ കണ്ടിട്ടുണ്ടാകുമല്ലോ. 2. 'അഹം', 'ത്വം', 'ഏതദ് ' എന്നിവ സർവ്വനാമങ്ങളാണെന്നു കണ്ടുവല്ലോ. ഇവയെ യഥാക്രമം 'അസ്മദ് ', 'യുഷ്മദ് ', 'ഏതദ് ' ശബ്ദങ്ങൾ എന്നു പറയും. 3. സംസ്കൃതഭാഷയിൽ അവ്യയശബ്ദങ്ങളും സർവ്വനാമശബ്ദങ്ങളും അല്പാക്ഷരപദങ്ങളാണെങ്കിലും അനവധി കാര്യങ്ങൾ പറയാതെ പറയാൻ കഴിവുള്ളവയാണെന്നറിയണം. ഇവിടെ 'ഏതദ് ' എന്ന ഒറ്റവാക്ക് 'മുമ്പേ ഞാൻ പറഞ്ഞ ഗുണഗണങ്ങളുള്ള പുരുഷന്റെ വിഷയത്തിൽ' ശ്രോതുമിച്ഛാമി എന്നാണറിയേണ്ടത്. മറ്റൊരു ഭാഷയ്ക്കുമില്ലാത്ത അനന്യമായ ഗുണവിശേഷമാണ് ഇതെന്നും ധരിയ്ക്കണം. നാം ടീവിയിൽ വാർത്ത കേൾക്കാറുണ്ടല്ലോ. വാർത്താസമാപനം മലയാളത്തിൽ: "ഇതോടു കൂടി ഈ വാർത്താപ്രക്ഷേപണം സമാപിയ്ക്കുന്നു". ഇംഗ്ലീഷിലാകട്ടെ: "And that is the end of this news bulletin". സംസ്കൃതത്തിലോ? "ഇതി വാർത്താ:" കഴിഞ്ഞു. 'ഇതി' എന്ന അവ്യയപദം ആ വാർത്തയുടെ സംഗ്രഹം മുഴുവൻ ഉൾക്കൊള്ളുന്നു എന്നും അറിയണം. നമ്മുടെ ശാസ്ത്രങ്ങളെല്ലാം'സൂത്രബദ്ധ'മായി പറയാൻ സാധിച്ചതും ഭാഷയുടെ ഈ വൈശിഷ്ട്യം കൊണ്ടാണ്. പാണിനീസൂത്രം, ബ്രഹ്മസൂത്രം, ഭക്തിസൂത്രം, ഗണിതസൂത്രം, യോഗസൂത്രം ഇത്യാദി. സംസ്കൃതം പഠിച്ചവർ മിതഭാഷികളാകുന്നതും ഇതുകൊണ്ടാണെന്നു തോന്നുന്നു. സർവ്വേഷാം ഭദ്രം കലയതു!                     ശുഭമസ്തു pradikshanam.