വാല്മീകി രാമായണം-12

എല്ലാവരുടേയും അഭിമാനത്തെ നീക്കുന്ന എല്ലാവരുടേയും പ്രകൃതത്തെ അറിയുന്ന സദാ പ്രസന്നനും പ്രിയനും ആയിരിക്കുന്ന സംഗീതമേ സ്വരൂപമായിരിക്കുന്ന നാരദർ വാല്മീകിയുടെ ഈ ചോദ്യം കേട്ട് അതീവ പ്രസന്നനായി. അദ് ദേഹം പറഞ്ഞു നിങ്ങളുടെ ഈ ചോദ്യത്താൽ എന്റെ ഹൃദയത്തിൽ ഈശ്വരൻ പ്രകാശിക്കുന്നു. ഈ ചോദ്യത്താൽ എനിക്കിങ്ങനെ ഒരു ഭാഗ്യം സിദ്ദിച്ചിരിക്കുന്നു.ഒരു ഗുണമെങ്കിലും ഉള്ളവനെ കണ്ടുകിട്ടുക ബഹു പ്രയാസമെന്നിരിക്കെ ഇത്രയധികം ഗുണങ്ങൾ ഉള്ള ആളെ എങ്ങനെ കണ്ടു കിട്ടാനാണ്. എന്നാലും അങ്ങനെയൊരു നരനെ കുറിച്ചു ഞാൻ പറയാം.

ഇക്ഷാകൂ വംശത്തിൽ ഉദിച്ച ഒരു സൂര്യൻ. രാമനെന്ന് നാമം. വാല്മീകി രാമായണത്തോടെ പിറന്ന ഒന്നല്ല രാമ നാമം. രാമചരിതമാനസത്തിൽ തുളസീദാസ് പറയുന്നു ശത കോടി രാമായണം എന്ന ഒന്ന് ബ്രഹ്മാവിന്റെ മുഖത്ത് നിന്ന് നിർഗ്ഗളിച്ചതായി ഒരു കഥ. ദേവൻമാരും അസുരന്മാരും മനുഷ്യരും മൂന്നു കൂട്ടരും അത് ബ്രഹ്മാവിൽ നിന്നും കരസ്ഥമാക്കാനായി വന്നു.നൂറു കോടി ഗ്രന്ഥം. മുപ്പത്തിമൂന്ന് കോടി വീതം ഒരോ കൂട്ടർക്കുമായി പരമേശ്വരൻ പിരിച്ചു കൊടുത്തു. ഒരു കോടി ഗ്രന്ഥം മിച്ചമായി പിന്നേയും മുപ്പത്തിമൂന്നു ലക്ഷം വീതം മൂവർക്കും വീതിച്ചു കൊടുത്തു. ഒരു ലക്ഷം മിച്ചമായി. മുപ്പത്തി മൂവായിരം വെച്ച് പിന്നേയും വീതിച്ചു ആയിരം ശ്ലോകം മിച്ചമായി. മുന്നൂറ്റി മുപ്പത്തി മൂന്ന് വച്ച് പിരിച്ചു കൊടുത്തു ഒരു ശ്ലോകം മിച്ചം വന്നു. മുപ്പത്തി രണ്ടക്ഷരത്തിൽ പത്ത് വച്ച് വീതിച്ചു രണ്ടക്ഷരം ബാക്കി വന്നു. ആ രണ്ടക്ഷരം രാമ എന്നായിരുന്നു അത് ഹൃദയത്തിൽ വച്ചോളു എന്ന് പറഞ്ഞു.
Nochurji 🙏🙏