സൗന്ദര്യലഹരി 100

ശ്രികുമാരമേനോന്‍

ശങ്കരം ലോകശങ്കരം

Sunday 8 September 2019 3:00 am IST

പ്രദീപജ്വാലാഭിര്‍ ദിവകരനീരാജനവിധിഃ

സുധാസൂതേശ്ചന്ദ്രോപലജലലവൈരര്‍ഘ്യരചനാ

സ്വകീയൈരംഭോഭിഃ സലിലനിധിസൗഹിത്യകരണം

ത്വദീയാഭിര്‍വാഗ്ഭിസ്തവ ജനനി വാചാം സ്തുതിരിയം

വാചാം ജനനി - വാക്കുകളുടെ അമ്മയായ ദേവീ!

പ്രദീപ ജ്വാലാഭിഃ - സ്വന്തം കൈവിളക്കിന്റെ ജ്വാലകൊണ്ട്

ദിവസകര നീരാജനവിധിഃ - സൂര്യദേവന് നീരാജനം ചെയ്യുന്നതുപോലെയും

ചന്ദ്രോപലജലലവൈഃ - ചന്ദ്രകാന്തക്കല്ലില്‍നിന്നും ഊറുന്ന ജലത്താല്‍

സുധാസൂതേ - അമൃത കിരണനായ ചന്ദ്രന്

അര്‍ഘ്യരചനാ - അര്‍ഘ്യം അര്‍പ്പിക്കുന്നുപോലെയും

സ്വകീയൈഃ അംഭോഭി - തന്റേതായ ജലങ്ങളാല്‍

സലിലനിധി സൗഹിത്യകരണം - സമുദ്രത്തിന് തര്‍പ്പണം ചെയ്യുന്നതുപോലെയും.

ത്വദീയാഭി വാഗ്ഭി തവ ഇയം സ്തുതി - അവിടുത്തെത്തന്നെ വാക്കുകളെക്കൊണ്ട് ഈ സ്തുതി (രചിക്കപ്പെട്ടിരിക്കുന്നു.)

വാക്കുകള്‍ക്ക്  അമ്മയായ അല്ലയോ ദേവീ! സ്വന്തം ദീപജ്വാലത്തെക്കൊണ്ട് സൂര്യന് നീരാജനം ചെയ്യുന്നതുപോലെയും, ചന്ദ്രകാന്തക്കല്ലില്‍നിന്നൂറുന്ന ജലംകൊണ്ട് ചന്ദ്രന് അര്‍ഘ്യം അര്‍പ്പിക്കുന്നതുപോലെയും, സമുദ്രജലംകൊണ്ട് സമുദ്രത്തിന് തര്‍പ്പണം ചെയ്യുന്നതുപോലെയും, നിന്തിരുവടിയുടെ തന്നെ വാക്കുകളെക്കൊണ്ട് ഈ സ്തുതിയും രചിക്കപ്പെട്ടിരിക്കുന്നു.

ലേഖകന്റെ സൗന്ദര്യലഹരീസപര്യ ഇവിടെ സമ്പന്നമാകുന്നു. സൗന്ദര്യലഹരിയോടും തത്കര്‍ത്താവായ ആചാര്യസ്വാമികളോടും എത്രകണ്ട് നീതിപുലര്‍ത്താനായിട്ടുണ്ട് എന്നെനിക്കറിയില്ല. പൂര്‍വ്വസൂരികളുടെ വ്യാഖ്യാനങ്ങളും മറ്റു  വിദ്വാന്മാരുടെ ഉപദേശങ്ങളും എനിക്ക് സഹായം ചെയ്തിട്ടുണ്ട്.

മഹാകവി കാളിദാസന്‍ പറഞ്ഞതുപോലെ 

''പ്രാംശു ലഭ്യേ ഫലേ ലോഭാ-

ദുദ്ബാഹുരിവ വാമനഃ എന്നേയുള്ളൂ ഈ രചന കുറച്ചുപേര്‍ക്കെങ്കിലും പ്രയോജകീഭവിച്ചിട്ടുണ്ടെങ്കില്‍, ധന്യോഹം.

ദൂരീകരോതുദുരിതം

ഗൗരീചരണപങ്കജം.