ശ്രീവാണീപാണ്യവലംബസ്തുതിഃ 
ജാഡ്യവാരിധിനിമഗ്നസുബുദ്ധേര്‍ജാതരൂപസദൃശച്ഛവികായേ ।
വാസവാദിദിവിഷത്പ്രവരേഡ്യേ വാണി ദേഹി മമ പാണ്യവലംബം ॥ 1॥

പാണിനിര്‍ജിതസരോരുഹഗര്‍വേ പാരദേ വിവിധദുഃഖപയോധേഃ ।
വാസനാവിരഹിതൈര്ലഘുലഭ്യേ വാണി ദേഹി മമ പാണ്യവലംബം ॥ 2॥

ശൃങ്ഗശൈലശിഖരാദൃതവാസേഽനങ്ഗഗര്‍വഹരശംഭുസഗര്‍ഭ്യേ ।
തുങ്ഗമങ്ഗലനിദാനകടാക്ഷേ വാണി ദേഹി മമ പാണ്യവലംബം ॥ 3॥

ശാരദാഭ്രസദൃശാംബരവീതേ നാരദാദിമുനിചിന്തിതപാദേ ।
നീലനീരദസദൃക്കചഭാരേ വാണി ദേഹി മമ പാണ്യവലംബം ॥ 4॥

യത്പദാംബുരുഹപൂജകവക്ത്രാദാശു നിഃസരതി വാഗനവദ്യാ ।
സ്വര്‍ധുനീ ഹിമഗിരേരിവ സാ ത്വം വാണി ദേഹി മമ പാണ്യവലംബം ॥ 5॥

ജാതുചിത്പ്രണമതോഽപി പദാബ്ജേ ദേവരാജസദൃശാന്‍പ്രകരോഷി ।
യത്തദംബ ചരണൌ തവ വന്ദേ വാണി ദേഹി മമ പാണ്യവലംബം ॥ 6॥

ശാന്തിദാന്തിമുഖസാധനയുക്തൈര്‍വേദശീര്‍ഷപരിശീലനസക്തൈഃ ।
ആദരാദഹരഹഃപരിസേവ്യേ വാണി ദേഹി മമ പാണ്യവലംബം ॥ 7॥

കോശപഞ്ചകനിഷേധനപൂര്‍വം ക്ലേശപഞ്ചകമപി പ്രവിഹായ ।
യാം പ്രപശ്യതി യതിര്‍ഹൃദി സാ ത്വം വാണി ദേഹി മമ പാണ്യവലംബം ॥ 8॥

വന്ദ്യമാനചരണേ സുരവൃന്ദൈര്‍ഗീയമാനചരിതേ തുരഗാസ്യൈഃ ।
ജപ്യമാനനിജനാംനി മുനീന്ദ്രൈര്‍വാണി ദേഹി മമ പാണ്യവലംബം ॥ 9॥

സന്നിരീക്ഷ്യ കമലാനി യദങ്ഘ്രീസാംയമാപ്തുമനയോസ്തപസാംഭഃ ।
കണ്ഠദഘ്നമധിജഗ്മുരസൌ സാ വാണി ദേഹി മമ പാണ്യവലംബം ॥ 10॥

പുണ്യമംബ ന കൃതം മതിപൂര്‍വം പാപമേവ രചിതം ത്വതിയത്നാത് ।
തേന തപ്തമനിശം ഹൃദയാബ്ജം വാണി ദേഹി മമ പാണ്യവലംബം ॥ 11॥

നാഹമംബ സരസാം ച സുവര്‍ണാമാതനോമി കവിതാം വിവിധാര്‍ഥാം ।
കേന പൂജയതി മാം ഭുവി ലോകോ വാണി ദേഹി മമ പാണ്യവലംബം ॥ 12॥

അക്ഷപാദകണഭുക്ഫണിനാഥൈര്‍ദേവഹൂതിസുതജൈമിനിമുഖ്യൈഃ ।
പ്രോക്തശാസ്ത്രനിചയേ ന ഹി ബുദ്ധിര്‍വാണി ദേഹി മമ പാണ്യവലംബം ॥ 13॥

നൈവ പാദസരസീരുഹയോസ്തേ പൂജനം പ്രതിദിനം പ്രകരോമി ।
ഹേതുശൂന്യകരുണാജനിഭൂമേ വാണി ദേഹി മമ പാണ്യവലംബം ॥ 14॥

സന്നിരുധ്യ ഹൃദയാംബുജമധ്യേ സ്വാന്തമംബ തവ സുന്ദരമൂര്‍തേഃ ।
ധ്യാനമപ്യനുദിനം ന ഹി കുര്‍വേ വാണി ദേഹി മമ പാണ്യവലംബം ॥ 15॥

ദുഃഖജന്‍മവസുധാ വിഷയാ ഇത്യാദരേണ ശ്രുതിഭിഃ ശ്രുതിശീര്‍ഷൈഃ ।
ബോധിതോഽപി ന ഹി യാമി വിരക്തിം വാണി ദേഹി മമ പാണ്യവലംബം ॥ 16॥

പുത്രമിത്രഗൃഹദാരജനന്യോ ഭ്രാതൃബന്ധുധനഭൃത്യമുഖാ വാ ।
നൈവ കാലവശഗസ്യ സഹായാ വാണി ദേഹി മമ പാണ്യവലംബം ॥ 17॥

ഏകമേവ സദബാധിതമന്യത്തുച്ഛമിത്യസകൃദാഗമശീര്‍ഷം ।
വക്ത്യഥാപി ന നിവൃത്തിരനിത്യാദ്വാണി ദേഹി മമ പാണ്യവലംബം ॥ 18॥

ജന്‍മമൃത്യുഭയനീരധിമധ്യേ മജ്ജതോ വിവിധരുങ്മകരാഢ്യേ ।
പശ്യതോഽപി ന ഹി ഭീതിരനേകാന്വാണി ദേഹി മമ പാണ്യവലംബം ॥ 19॥

ത്വത്പദാംബുരുഹയുഗ്മമപാസ്യ പ്രാക്തനാഘപരിമാര്‍ജനദക്ഷം ।
നാസ്തി താരണവിധാനസമര്‍ഥം വാണി ദേഹി മമ പാണ്യവലംബം ॥ 20॥

ബാലചന്ദ്രപരിചുംബിതശീര്‍ഷേ ബാഹുസക്തകനകാങ്ഗദരംയേ ।
കണ്ഠലോലവരമൌക്തികഹാരേ വാണി ദേഹി മമ പാണ്യവലംബം ॥ 21॥

ആനനേന ചരണേന കടാക്ഷൈര്‍നീരജാസനമനോഹരകാന്തേ ।
ചന്ദ്രമംബുജമലിം ച ഹസന്തീ വാണി ദേഹി മമ പാണ്യവലംബം ॥ 22॥

മധ്യനിര്‍ജിതമൃഗാധിപഗര്‍വേ മത്തവാരണസദൃഗ്ഗതിശീലേ ।
മഞ്ജുശിഞ്ജിതമഹാഭരണാഢ്യേ വാണി ദേഹി മമ പാണ്യവലംബം ॥ 23॥

താപമംബ വിനിവാര്യ സമസ്തം പാപമപ്യഹരഹഃകൃതമാശു ।
ചിത്തശുദ്ധിമചിരാത്കുരു മാതര്‍വാണി ദേഹി മമ പാണ്യവലംബം ॥ 24॥

പാദപദ്മയുഗമര്‍ദനരൂപാ പാത്രവസ്ത്രപരിശുദ്ധിമുഖാ വാ ।
ശ്രീഗുരോര്‍ന ഹി കൃതാ ബത സേവാ വാണി ദേഹി മമ പാണ്യവലംബം ॥ 25॥

മന്ത്രരാജലയപൂര്‍വകയോഗാന്യോഗിനീഹൃദയമുഖ്യസുതന്ത്രാന്‍ ।
നൈവ വേദ്മി കരുണാമൃതരാശേ വാണി ദേഹി മമ പാണ്യവലംബം ॥ 26॥

കാമലോഭമദപൂരിതചേതഃപ്രാണിദൂരനിജപാദപയോജേ ।
കാമനിര്‍മഥനദക്ഷസഗര്‍ഭ്യേ വാണി ദേഹി മമ പാണ്യവലംബം ॥ 27॥

അങ്ഗയഷ്ടിരുചിനിര്‍ജിതഭര്‍മേ കുംഭികുംഭപരിപന്ഥികുചാഢ്യേ ।
ഭൃങ്ഗനീലചികുരേ തനുമധ്യേ വാണി ദേഹി മമ പാണ്യവലംബം ॥ 28॥

സ്വാങ്ഘ്രിസേവനസമാഗതകാഷ്ഠാകാന്തദാരകരമര്‍ദിതപാദേ ।
സ്വാമിനി ത്രിജഗതാം ധൃതവീണേ വാണി ദേഹി മമ പാണ്യവലംബം ॥ 29॥

നീലനാഗനിവഹാ വിവിശുര്യദ്വേണികാം മുഹുരവേക്ഷ്യ ബിലാനി ।
ലജ്ജയാഽഽശു വിധിഭാമിനി സാ ത്വം വാണി ദേഹി മമ പാണ്യവലംബം ॥ 30॥

ശാന്തിദാന്തിവിരതിപ്രമുഖാ മാം മോഹകോപമുഖരോഗവിശീര്‍ണം ।
വീക്ഷ്യ യാന്തി തരസാ ബഹുദൂരം വാണി ദേഹി മമ പാണ്യവലംബം ॥ 31॥

കാകലോകസദൃശഃ പികലോകഃ കേകിജാലമപി ശോകിനിതാന്തം ।
യദ്വചഃ ശ്രവണതഃ ഖലു സാ ത്വം വാണി ദേഹി മമ പാണ്യവലംബം ॥ 32॥

രാജരാജപദവീം ക്ഷണമാത്രാദ്യാതി യത്പദസരോരുഹനത്യാ ।
ദീനരാഡപി ജനോ ഭുവി സാ ത്വം വാണി ദേഹി മമ പാണ്യവലംബം ॥ 33॥

ശ്രീഘ്രകാവ്യകരണേഽംബ പടുത്വം യാന്തി മൂകബധിരാദിമമര്‍ത്യാഃ ।
യത്പദപ്രണതിതോ ഭുവി സാ ത്വം വാണി ദേഹി മമ പാണ്യവലംബം ॥ 34॥

ബ്രാഹ്മി ഭാരതി സരസ്വതി ഭാഷേ വാക്സവിത്രി കമലോദ്ഭവജായേ ।
പാണിപങ്കജലസദ്വരവീണേ വാണി ദേഹി മമ പാണ്യവലംബം ॥ 35॥

ചാമരപ്രവിലസത്കരഗൌരീവിഷ്ണുദാരപരിസേവിതപാര്‍ശ്വേ ।
ചാമരാജസുതപാലനസക്തേ വാണി ദേഹി മമ പാണ്യവലംബം ॥ 36॥

ശേഷശൈലപതിനാമകമന്ത്രിശ്രേഷ്ഠപാലനപരായണചിത്തേ ।
ശേവധേഽബ്ജഭവപൂര്‍വവൃഷാണാം വാണി ദേഹി മമ പാണ്യവലംബം ॥ 37॥

ശ്രീനൃസിംഹശിശുരാമയുതശ്രീകണ്ഠപാലനനിഷക്തമനസ്കേ ।
ശ്രീശശങ്കരമുഖാമരപൂജ്യേ വാണി ദേഹി മമ പാണ്യവലംബം ॥ 38॥

ഇതി ശൃങ്ഗേരി ശ്രീജഗദ്ഗുരു ശ്രീസച്ചിദാനന്ദശിവാഭിനവനൃസിംഹ-
ഭാരതീസ്വാമിഭിഃ വിരചിതാ ശ്രീവാണീപാണ്യവലംബസ്തുതിഃ സമ്പൂര്‍.

sanskrit documents