ദൈവത്തെ അറിയാനുള്ള ത്വര നിങ്ങള്‍ക്കൊട്ടുമില്ല. കുട്ടിക്കാലം മുതല്‍ക്കുതന്നെ അവര്‍ നിങ്ങളെ പഠിപ്പിച്ചിരിക്കുന്നു, ദൈവത്തോടു പ്രാര്‍ത്ഥിച്ചാല്‍ നിങ്ങള്‍ പരീക്ഷയില്‍ ജയിക്കുമെന്ന്. അതാണ് നിങ്ങള്‍ക്ക് പ്രാര്‍ത്ഥനയുടെ അടിസ്ഥാനം. ദൈവത്തോടു പ്രാര്‍ത്ഥിച്ചാല്‍ നിങ്ങള്‍ക്ക് എളുപ്പത്തില്‍ പണം കൈവരും, നിങ്ങള്‍ ആരോഗ്യവാനായിത്തീരും, നിങ്ങളുടെ കുഞ്ഞ് ആരോഗ്യവാനായിത്തീരും, അങ്ങനെ ഒരുപാട് ലാഭങ്ങളുണ്ട് എന്ന് അവര്‍ നിങ്ങള്‍ക്കു പറഞ്ഞുതന്നിരിക്കുന്നു. അതുകൊണ്ടാണ് നിങ്ങള്‍ ദൈവത്തോട് പ്രാര്‍ത്ഥിക്കുന്നത്. ശരിയല്ലേ? ദൈവത്തോടു പ്രാര്‍ത്ഥിച്ചാല്‍ നിങ്ങള്‍ക്കുള്ളതെല്ലാം നഷ്ടപ്പെടുമെന്ന്, ദൈവത്തോട് പ്രാര്‍ത്ഥിച്ചാല്‍ ആവശ്യമില്ലാത്ത പ്രശ്‌നങ്ങളുണ്ടാവുമെന്ന് അവര്‍ നിങ്ങള്‍ക്കു പറഞ്ഞുതന്നിരിക്കുന്നുവെങ്കില്‍ നിങ്ങള്‍ ദൈവത്തോട് പ്രാര്‍ത്ഥിക്കുമായിരുന്നോ? ഒരിക്കലുമില്ല. അതുകൊണ്ട് നിങ്ങളുടെ അനേ്വഷണമെല്ലാം സുഖസൗകര്യത്തോടെയും സന്തോഷത്തോടെയും എങ്ങനെ കഴിഞ്ഞുകൂടാമെന്നാണ്.